ISAIAH 31 - Ngawm Bible

Pathian In Jerusalem Pan Tuk

¹ Bopnak deihin Izipt ah a hawhtute cu lalthong haw hi! Izipt ngalkapte muang haw; a cipuh, a cipuhleng le ngalkap ngilzette muang haw hi. Topa Pathian, Israel i Pathian thiangtho cu muang ngawlin bopnak hei ngen haw ma.

² Topa in, a deh haw mi cu thei hi, thilpha ngawl cimnak hengtik hi. Mipha ngawl a pantute bawlsia tung a tih bangin bawlsia ngangai hi.

³ Izipt mite cu Pathian hi haw ma, mihing hi haw poh hi! A cipuhte vang hawvang kha haw ma, tisa nei thongpoh! Topa in, a khut phalhin thil a bawl ten a ngil zetmi ngam cu tu tuk a, mahmi a ngil zetmi ngamin, a ngil ngawl ngam vang lup pih tuk hi. A ngam nih haw in sia langkhat tuk hi.

⁴ Topa in, ka lakah, “Ngamsa a mantu kiosa cu tuucing ten itih zahin au in, a kio li haw hei in, a hilvawk theih haw ngawl bangin, kei Cungnungbel Topa cu Zion Mual ka pat nuamnak pen kuamah in kham thei haw tukma hi.

⁵ A cano pan tukin vano cu a bu hum pen a kimlih bangin kei Cungnungbel Topa hei in Jerusalem cu humhimin pan tung,” ti hi.

⁶ Pathian in, “Israel mite aw, ka mai ah sualin kei nunghek zo uh ci! Mahnaven ka lakah kikleh un.

⁷ Na venghawng uhin sui le ngun tuah a nawngkai mi milim na bawl uhte vawk khawng tuk hun cu heng tuk hi.

⁸ Ngaldonakah Assiria cu sia khawng tuk naven mihing khut tuah hi tukma. Assiria mite cu ngaldonak pen tai haw tuk a, a khangnote cu salah man haw tuk hi.

⁹ A kumpi haw cu thinsu in taivawk tuk a, a ngalbawite cu a lau leita in alan haw hei taisan haw tuk hi.” Jerusalem ah a biak haw mi Topa Zion Mualah mei tuah biakpiaknak a kangtiktu Topa in hilh zo toh hi.