ISAIAH 26 - Ngawm Bible

Pathian In A Mihingte Nehnak Pia Tuk

¹ Mipi ten hi la hi, Judah ngamsung pen a sak haw hun heng tuk hi; A khuapi uh cu ngilzet! Pathian amah in, a kulhtian hup hi!

² Muantak zetmi miphun le Thudik bek a bawltu miphun tumtik tukin, Khuapi kongkate cu hong un.

³ Topa aw, nangmah a muangtu tei lakah, A tuptahnak hawah a kho mi lemdaihnak cangkimzet pia ci.

⁴ Topa cu kumkhua in muang un! Amah in ohte hup leleng tuk hi.

⁵ Mi pualthaute cu nempekin, A umnak haw khuapi ngilzette vang siatik hi; A kulhtiante cimtikin, leivulah cangtik khawng hi.

⁶ Atu-in bawlsiatmi ten, mah leivul hum tawn haw in, a ke tuah sik haw hi.

⁷ Topa aw, mipha tei lampi cu tuangtik ci, a zui haw mi lampi cu lam phei hi.

⁸ Na deihnak cu zui ung a, ka muansannak uh na lakah um hi; Ka deih uhmi hempoh cu nangmah ci.

⁹ Zankhua in nangmah ngai ing. Ka lungmu hempoh tuah nangmah cian ung. Leipi le a mihing tei thu na khen ten, thudik cu thei khawng haw tuk hi.

¹⁰ Mipha ngawl tei humah hehpihnak nei navecin, a dikmi cu bawl nuam cuang haw ma; Mi taituang tei ngamsung hei ah, Thil sual bawl memek haw hi. Na thawmngeng cu imah sial haw ma hi.

¹¹ Bawlsia tuk ci tih na ngal ten thei haw ma. Maw Topa zakca in bawl inna, thuak haw tahen. Na ngaihsutsa mi thuaknak cu thei haw tahen. Na mite itihzah tianin it cim tih lakin hi.

¹² Maw Topa mi neinung le hauhnak pia in; Bawl thei hung ka tih uhmi hempoh, nangma bawlmi ngeh haw hi.

¹³ Maw Topa kohtei Pathian, mi dadang ten kohte uk zo haw toh; Mahnaven kohtei Topa cu nangmah bek hi ci.

¹⁴ Thi zo haw tohin, nungleh haw tukma hi; Bawlsia in, phathong khawng haw zo hi. Kuamah in theileh haw ma toh hi.

¹⁵ Maw Topa ka miphun uh khangtotik ci; Ka ngam uh cu mun tihkimah zaltik ci. Mah hangin na minin, upatnak co hi.

¹⁶ Maw Topa na mite dantat ci a, A lungkhamin na lakah thungen haw hi.

¹⁷ Maw Topa nangmah in kaptik ci; Nauhing tuk numei i natnak bangin,

¹⁸ Na ung, thuak ung a, kap ung hi. Mahnaven imah hing ma ung. Ka ngam pen nehnak imah suahpih ma ung; Ka bawlsuak uhmi imah umma hi.

¹⁹ Mahnaven a thi sa mite nung haw tuk; A luangpi haw cu nungleh tuk hi. Khansungah a hihbu mite cu khanglo in le lungdamin lasa haw tuk hi! A de sesepmi daita ten lei a hingtik bangin a thi sate cu Topa in nunglehtik tuk hi.

Bawlsiatnak le Ngaihdamnak

²⁰ Maw ka mihingte, na inn sungah tum unna, na kongka uhte khak un! Pathian thinuknak a bo laklawh cu ngelh un hi.

²¹ Leihum mite a sualnak haw i hangin dan a tat tukin Topa cu vanhum a umnak mun pen tolhsuk tuk hi. A kuhno in mi a deidat haw cu phuan suah khawng hi tuk a, a thi mite cu leipi in selleh tukma toh hi.