ISAIAH 25 - Ngawm Bible

Thangphatnak La

¹ Topa aw, nangmah cu ka Pathian hi ci, Upat tung a, na min thangphat tung. A lamdang thasiahhuai nate bawl zo ci; Tanglaih pepan na tupmite cu cangcian zetin bawl khawng ci.

² Khuapi hempoh siatsuah khawng ci a, A kulhtian hempoh vang siatsuah khawng ci. Ka ngal tei sakmi kumpi innte cu, Ituk mah ten sakleh tuk ngawltohin, sia khawng haw hi.

³ Ngam a ngilzet sung a, mihing ten, Nangmah cu thangphat haw tuk hi. Hehpihnak nei ngawl khuapi ten, Nangmah cu lauzet haw tuk hi.

⁴ Mi ca-ngah le bawmtu nei ngawl ten zuan haw in; Haksatnak hun hei ten him haw hi. Huihsia a theu ten buknak pia ci a, Nisa ten colhnak nilim pia ci. Phalbi hun a, huihsia bangin, Hehpihnak nei ngawlmi ten do haw hi.

⁵ Ngamkonak lak a, nisa bangin; Topa nangmah in, Ka ngalte uh cu daitikin; Khawniimin nisa a nemtik bangin hehpihnak nei ngawl tei au thawm cu botik ci.

Pathian In An Eih Puai Timtuah

⁶ Hilai Zion Mualhum pen Cungnungbel Topa in, leihum ngam hempoh le miphun hempoh tei ca in, an eih puai bawl tuk hi. Mah an eih puai ah an ukbel le sabit ukbel pia tuk hi.

⁷ Hi mualhumah ngam hempoh le miphun hempoh tei lungsiatnak cu meingo bangin botik tuk hi.

⁸ Cungnungbel Topa in, thihnak cu kumkhua in paitik tuk hi. Mi hempoh tei mit hitui hu tuk a, leihum khua hempoh ah a mitei thuakmi mualpho zahcaknak cu la in botik tuk hi. Topa amah in hilh zo toh hi.

⁹ Mah hun a hen ten a kuakua hei in, “Amah cu ka Pathian uh hi! Amah cu muang zo toh ung, amah in nunpan zo hi! Amah cu Topa hi! Ama lakah ka muannak uh cu koih ung, lungdam thatui in um zo ung; itakaw titale pan zo toh hi,” tin ti haw tuk hi.

Pathian In Moab Dantat Tuk

¹⁰ Topa in, Zion Mual cu hup tuk hi; mahnaven cang kungko a sihpek haw bangin Moab mite cu sihpek hi haw tuk hi.

¹¹ Tuivat tuk bangin a khutzaak haw tuk, mahnaven Pathian in, amuh cu nemsukin, a khut haw in let tuk nei ngawlin nim haw tuk hi.

¹² Topa in, Moab tei tian mi kulhtian sangzette cu siatsuah tuk a, leivul suak khawng haw tuk hi.