ISAIAH 23 - Ngawm Bible

Foenisia Humah Thu Heng

¹ Taiar khua ca in, a hengmi thu cu hi bangin hi. Tuipi thuanthum hum a khualzin mite, lungsia in kap un! Na suah le na tumnak uh Taiar khuapi cu sia khawng zo, innte le timbaw colhnakte sia khawng zo hi. Saipras pen na timbaw uhte a kihleh ten mah thu thei uh ci.

² Maw Sidon khua a, sumbawltute aw tauli bek un! Na mi uhte cu

³ Izipt ngam pen a tulmi ante lei le zuakin ngam tihkimah sumbawl tukin tuipi thuanthum humah hah uh ci.

⁴ Maw, Sidon khuapi zahcak huai thong ci. Tuipi le tuipi thuanthum ten awn sia hahin, “Cano nei awng mang, canu le capa hei vak awng mang,” ti hi.

⁵ Taiar cu sia khawng tih a zak haw ten, Izipt mite hei lamdangsa haw tuk a, a thasia haw tuk hi.

⁶ Foenisia mite aw, Spain ngamah tai in, thasia zetin kap un!

⁷ Ni dang laihin, a toh haw mi, nopsaknak tuah a dimmi Taiar khuapi a tih haw cu a hihi kha nen ti maw? Tuipi thuanthum ngalkhat lamah ngam lon tuk le luah tuk a zeitu tukmi a hahtu khuapi cu a hihi kha nen tim maw?

⁸ Leihum pen upatbelmi sumbawl nase tei umnak, Taiar khuapi i humah akua kaw hi tih bangin thu a sontu?

⁹ Cungnungbel Topa i ngaihsutmi hi! A ultunnak haw le a tuangkhawnnak haw botik tukin le a upat haw mite mualphotik tukin Pathian i bawlmi hi.

¹⁰ Maw Spain ngam luahtute hawh unna, lo bung un! A huptu tuk kuamah um haw ma toh.

¹¹ Topa in, a khut cu tuipi thuanthum humah dangin ngam tampi vawk khawng zo hi. Phoenician ngam a nunkhua saknak mun nasezette kiamsuk khawng tukin thupia hi.

¹² Maw Sidon khuapi na lungdamnak bo zo hi. Na mite cu bawlsiatnak thuakin Saipras ah a tai haw hei in him cuang haw tukma hi.

¹³ (Taiar khuapi ngamsa tei tatnakin, a cangtiktu cu Assiria mi hi kha haw ma, Babilon mi haw hi. Ngaldonak inn sangpi cu Babilon ten sa in, Taiar khuapi kulhtian pheletin khuapi cu siatsuah khawng haw hi.)

¹⁴ Maw, tuipi thuanthum hum a tinbaw zuitute, lungsia in kap un! Na muansanzet uhmi khuapi cu sia khawng zo hi.

¹⁵ Taiar khuapi cu kumpi khang khat, kum sawm salih sung a phawhngilh haw hun heng tuk hi. Mah kum a bo ten Taiar khuapi cu la sung a, numei pha ngawl bang tuk hi.

¹⁶ Na tingtang la inna, khuasungah vakin; Nang phawhngilh sa mi numei pha ngawl! A theih kiklehnak haw tukin; Na tingtang tum inna, na lasa lehin hi.

¹⁷ Mah kum sawm salih a bo ten Topa in, Taiar cu ama nadeh sa leng dektikleh tuk a, leihum ngam hempoh ah numei pha ngawl cangleh tuk hi.

¹⁸ A sumbawlnak le a nadehnak pen a ngahmi sum cu Topa i lakah piak hi tuk hi. A sumpai cu khawl li sap tukma naven Topa a biatu ten a sumpai cu an leinak le a kin haw mi nikcen puansilh leinakah mang haw tuk hi.