ISAIAH 22 - Ngawm Bible

Jerusalem Humah Thu Heng

¹ Muhnak Munlawn ca in, a hengmi thu cu hi bangin hi. I cang haw kaw? Itakaw khuapi sung a, mite a inn hum hawah puai a bawl duaduam haw?

² A khua mipi ten lungdam au le kio in, a thawmnging haw cu nase ngangai hi. Atu hun ngaldonakah a thi mi na mite uh cu ngal a donak haw hangin kha ma hi.

³ Na hotute uh tai khawngin, thal vei khatno hei a kah man haw laih ngawlin matmi haw hi.

⁴ Mah hang zamsan khawng un; keimah bek ka mihing a thi tei ca thasia in kap li tung. Lem hei tum vanglak pahsuh un!

⁵ Muhnak Munlawnah atu hi lauthawng le buai hun, ngal sun hun le vansang a um hun hi a, mahmi cu Cungnungbel Pathian Topa in, eimu humah a hentikmi hi. A khuapi kulhtian uh cu phelet khawng zo haw toh a, bopnak ngenin, aunak aw cu mual hempoh ah thang khawk ngut hi.

⁶ Elam ngam pen ngalkapte cu cipuh hum khungin thalkung le thalcang cawi thahin hung haw hi. Kir ngam ngalkap ten lumphaw tuah tuangtim sa khawng zo haw hi.

⁷ Ngamphazet Judah munlawnah cipuhleng dimin, cipuh ngalkapte cu Jerusalem kongka mai ah ding khawng zo haw hi.

⁸ Judah tei kulhtian cu cim khawng hi. Mah hun a hen ten ngal hiamnam koihnak inn pen hiamnam kaisuah susuih uh ci.

^9-10 Jerusalem Khuapi kulhtian bawlleh tuk a kulte mu in, Jerusalem khua sung a innte sial tawtok uh ci, khuapi kulhtian lepnak tukin, a kulmi suang kinin, inn khenkhatte phia uh ci. Khuapi sungah tui khawlnak tukin,

¹¹ khuapi kulhtian sunglamah tui khawlnak ngengpi tiang uh ci a, tui khawlnak lun pen tui luangtik uh ci. Mahnaven hi thil hempoh a tumtahtu le a cangsuaktiktu Pathian cu imah simsial ma uh ci.

¹² Cungnungbel Topa in, kap le tau tukin, na sam uh metkolh tukin le thangkhau puan silh tukin nangmuhte cu sam hi.

¹³ Nuihsan leilui in puai bawl saw uh ci. Eih tukin khui le tuu ngo in, sabittui viak aw ok uh ci. “Ei in, in pah nung! Zingten thi tuk toh poh hung,” tin ti uh ci.

¹⁴ Cungnungbel Topa amah loli in ka lakah, “Hi a phat haw ngawlnak hi a nunsung haw hempoh ah ngaihthiam hi haw tukma. Keimah Cungnungbel Topa in, ti zo ing,” ti hi.

Shebna Lakah Ngallin Piaknak

¹⁵ Cungnungbel Topa in, kumpipa i innkua hotu Shebna lakah hawh tukin,

¹⁶ “Akua ing hum tin ngaisungdun nge cim? Mualhum suang lak pen nangma ca khan co tukin akua in, thupia kaw?

¹⁷ Mi upa pa khat hi bok navecin Topa in, na pum leisehnakin vawk lalthong tuk vei.

¹⁸ Bawhlung bangin a lumvo in vawkto tuk a, ngam zalpi ah vawk tuk hi. Mahlai ah na ultung pih zetmi cipuh leng elah thi tuk ci. Na bawipa i innkua zakcatik tuk ci.

¹⁹ Topa in, na nadehnak pen vawk tuk a, na nadeh sang pen khiasuk tuk,” tin, a hilhtik hi.

²⁰ Topa in, Shebna i lakah, “Mah hun a hen ten Hilkiah capa ka sila Eliakim sam tung.

²¹ Na zung nadehnak angki cualpi, na taikhap le na thuneihnak hempoh la tung a, a lakah pia tung. Amah cu Jerusalem le Judah miphun tei ca in pa hi tuk hi.

²² Amah cu David casuan kumpipa i khutnuai ah thuneihnak cangkim zetin pia tung. Na deh theihnak tukin a khutah tawhcangte pia tung a, ama hon mi cu kuamah in khak haw tukma. Ama khakmi cu kuamah in hong haw tukma hi.

²³ Amah cu a khim zetmi puanzaknak thingkhet bangin khimtik tung a, innkua venghawng ca in mitmai pha ngahnak bulpi hi tuk hi.”

²⁴ “Mahnaven a unaute le amah beeltute cu ama ca in vanngitzet hi haw tuk hi. Puanzaknak thingkhetah beel le kuang a khaih haw bangin a humah khaih luih haw tuk hi.

²⁵ Mah ni a hen ten khim zetin khetmi ngolh khet cu khim ngawlin hong tuk hi. A hum a khaihmi vang cu bo khawng haw tuk hi.” Topa in hilh zo toh hi.