ISAIAH 14 - Ngawm Bible

Saltannak Pen Kikleh Haw

¹ Topa in, a mi Israel tei lakah hehpih lainatnak neileh tuk a, ama mihingin tengleh tuk hi. Amu ngamah umlehtikin, amu lakah ngamdang mite hei um haw tuk hi.

² Topa i piakmi amu ngamah a kihleh haw ten miphun tampi ten Israel mite cu bawm haw tuk hi. Miphun tampi ten Israel tei na dehsakin, Israel mi sila in, a mantute cu Israel miten salah man haw tuk, amuh a bawlsiatute cu Israel miten uk khawng haw tuk hi.

Babilon Kumpi Mithi Khua Ah

³ Topa in, Israel tei cimnak, a thuaknak haw le a nadeh haksatnak pen cawlhnak hun bawlsak tuk hi.

⁴ Mah ni a hen ten Babilon kumpi cu nuihsanin, mi hehpihnak nei ngawl kumpipa caksuk zo! Kuamah bawlsialeh thei tukma toh!

^5-6 A neh haw mi le a lak haw mi ngam, mihingte nuainemtu le thinukin, a bawlsiatu kumpi sehuaite cu a thil tihtheihnak le a huham haw tuah botik khawng zo hi.

⁷ Atu-in, leihum buppi ah lemdaihnak le lungnopnak um tuk toh hi, a kuakua hei hihen lungdam thatui in, lasa haw tuk hi.

⁸ Hi kumpi a caksuk zo toh a hih ten Lebanon ngam a, cak thing le sidar thingte cu a lungdam haw tuk hi. Itahim titale amuh phuktu kumpi umma toh hi.

⁹ “Babilon kumpi muak tukin mithi khua cu ngallingin um hi. Leihumah a nun haw lai a, upa tei hawvang cu tuangtimsa in, kumpi tei hawvangte cu a khunnak haw pen dingto haw hi.

¹⁰ A venghawng au haw in, ‘Atu-in keimuh bangin va bokma zo ci! Keimuh bangkek thong sisi!’

¹¹ Tingtang aw mawi tuah a muah lih awng haw mi, atu-in mithi khua Sheol ah heng bok thong sisi maw! Thante cu na zaunakah cangin, na puansilhte tale thanlung leleng thong si maw,” tin ti haw hi.

¹² Oh! Babilon kumpi, nikonghong aksi, nang cu van pen caksuk zo ci. A bosa hunah ngam tampi neh ci, atu-in lei ah vahvawk hi zo ci!

¹³ Vanah kai tum navecin, a sangbel aksi humah na khunnak koih tum ci. Dawih tei tawhdun khawmnak saklam mualhumah kumpi bangin khung tukin ngaisung ci.

¹⁴ Meingo humah kai tung a, Cungnungbel bang hi bok tung, ti ci.

¹⁵ Mahnaven a thuknakbel mun mithi khua ah dawhsuk vawk hi zo ci.

¹⁶ “Mithi ten mitphelep ngawlin zo ngengu haw tuk a, ‘Leihum hempoh a hingtiktu le ngam tampi in, a cangtiktu hi pa nei pah?

¹⁷ Khua tampi a siatsuahtu le leihum ngamte phillawn a cangtiktu cu hi pa na hi pah? A sal matmi a hah awng ngawltu le a inn haw hei ah hentik a phal ngawltu cu amah hi na hi pah?’ tin ti haw tuk hi.

¹⁸ Leihum kumpi hempoh cu a phazet le a mawi zetmi khanah vui hi haw hi.

¹⁹ Mahnaven nang cu khan nei ma ci, na luang cu uih thong tuk a, vawkthongmi tuk hi. Ngal a thah haw mi ngalkap tei luangte tuah munkhatah suangkua sungah vawkmi na hi ci a, sihpek lihmi ci!

²⁰ Na ngam siatsuahin, na mite na thah hangin kumpi dangte bangin sunglawi in, vui tawk tukma ci. Mipha ngawl tei sung, na unau innkuate vang kuamah nung haw tukma hi.

²¹ That khawngta un! Hi kumpipa i capate cu a pu le pa tei sualnak hangin thi haw tuk hi. Amu sung pen kuamah in, leihumah mi uktu cang awng haw tukma, khuasattu hei um haw tukma hi.”

Pathian In Babilon Siatsuah Tuk

²² Cungnungbel Topa in, “Babilon do tung a, siatsuah khawng tung, naupang vang khawih tuk mang; kuamah luat haw tukma hi. Keimah Topa in hilh zo ing.

²³ Babilon cu cikdupin cangtik tung a, mahlai ah simbute um haw tuk hi. Babilon cu siatsuahnak buakphiah tuah phiat tung a, ihempohin phiatcai khawng tung hi. Cungnungbel Topa keimah in hilh zo ing.”

Pathian In Assiria Siatsuah Tuk

²⁴ Cungnungbel Topa in tiamdun zo a, “Ka vaihawmmi cu kim tuk hi. Ka tuptah hempoh cu bawl khawng hi tuk hi.

²⁵ Kata a himi Israel ngamsung a, Assiria mite cu siatsuahin, ka mualhumah sikpek tung. Ka mihing tei puakmi Assiria tei kolhak duhsak tung a, vanngitte cu lawlsak tung.

²⁶ Mahmi cu leihum buppi ca in ka tuptahmi hi a, miphunte a bawlsia tukin ka khut dang zo ing.”

²⁷ Hihi a bawlnak tukin Cungnungbel Topa in, tumtah zo hi. A khut cu dantat tukin dang zo a hih ten kuamah in kham thei haw tukma toh hi.

Pathian In Filistin Siatsuah Tuk

²⁸ Kumpipa Ahaz i thih kumin, hi thu hi Pathian lak pen heng hi.

²⁹ Filistin mite aw, nangmuh a vahnak ngolh ek zo hi; mahnaven, lungdam nuam pahsuh un! Ngul pa khat a thih ten, a ai-awhin, a hang saw mi ngul pa khat tul hi. Ngul in, a tui cu tui in, op a, a leng thei mi ngulpi keuh hi.

³⁰ Topa cu a mihing tei lakah, mi nuncim le mi ca-ngahte cingkhawitu a hih tak himdamno in umtik tuk hi. Mahnaven noh Filistin tei humah nase zetin, paam tungtik tuk a, pa khat hei luat tukma uh ci.

³¹ Filistin khua mite aw, bopnak ngenin, au unna, tau ngungun un! Na venghawng uhin thinsu un! Saklam pen ngalkap tei hunnak leikhu cu khua nim bangin heng hi. Mah ngalkap sung pen ngal nawm pa khatno hei um haw ma.

³² Filistin ngam pen a hengmi palaite cu iti bang donleh kam nung? Topa in, Zion cu dingkhotik zo si, haksatnak a thuak lelengtu a mihingte cu mahlai pen humhimnak ngah haw tuk, tin don tuk hung.