ISAIAH 1 - Ngawm Bible

¹ Amoz capa Isaiah in, Judah kumpi Uzziah, Jotham, Ahaz le Hezekiah tei khanin, Judah le Jerusalem humah Pathian i phuanmi cu hi bangin hi.

Pathian In A Mihingte Hilhhawl

² Topa in, “Maw lei le van, ka otmi hi ngai un. Ka cawm tohmi ka cano ten kei langpang haw hi.

³ Khui in, a neitu thei hi; laak hei in, a bawipa i an piaknak kuang thei hi. Mahnaven ka mihing Israel miten mahti bang hei thei haw ma. Imah thei bikbek haw ma hi.”

⁴ Maw Israel, noh misual phun, thilpha ngawl bebek bawlin, nawhthuh ei mihingte, bothal uh cei. Na sualnakin nangmuh dok vawk hi. Topa Israel Pathian thiangtho cu nunghek uh ci.

⁵ Ita kei langpang leleng uh cim? Nase dedeuhin bawlsiat tuk nuam uh cim? Maw Israel na lu cu meima tuah dimin, na thin le na lung cu natnak thuak hi.

⁶ Na ke lek pen na sip tian damnak tuk um vingviang ma. A lawngmi, a dupmi le bawhkekmi bebek tuah dim. Na meimate cu som ciangmi hei hi ma, tuammi vang hi sapma. Si noihmi vang hi ma hi.

⁷ Na ngam uh cu siatsuah khawng a hih tak veng diudeu in, na khua uhte mei in kang khawng zo. Na mitmuh cikcek uhah miphun dang ten na ngam uh cu longin, siatsuah khawng haw hi.

⁸ Jerusalem khua bek tangin, amah vang cu ngal tei upcihmi khuapi hi, sabit huan cingtu deubuk le cangmai huan a, buk bangin bawmtu le pantu nei ngawl khuapi hi.

⁹ Cungnungbel Topa in, mi khenkhatte a khawih ngawl ahin, Sodom le Gomorrah khua bangin a siatsuahmi khuapi hi zo tuk toh hi.

¹⁰ Maw Jerusalem, na mihing le na uktute cu Sodom le Gomorrah mihingte le uktute bang haw hi. Topa i awnkam hi phano ngai in hi. A Pathian uh i zilhmi kom zetin ngai tehin hi.

¹¹ Topa in, keimah na piak leleng uhmi biakpiaknakte hi deihzet hi, tin ngaisung uh cim? Biakpiaknakah na halkang uhmi tuu le na ngan thauzet uhte ciat zo ing. Na khui uh, na tuu uh le na keel tei thisante hi ciatzet toh ing!

¹² Keimah na biak uhten hite cu a kua in hunpihtik kaw? Ka Biakinn sung tanpek niknek tukin akua kaw noh a zawm?

¹³ Na thilpiak uhte nemcuamnak imah nei ma hi. Namtui na piak uhmite vang ningdelh ing. Na Ha Thak puai uhte, na Sabbath uhte le na pumkhawmnak uhte hi thuak thei ma toh ing. Na sualnak uhin, siatsuah khawng zo.

¹⁴ Na Ha Thak Puai le na can uhmi na puai ni thiang uhte hua ing. Ka ca in vanngit hahzet, thuakleh thei ma toh ing!

¹⁵ Baanzakin, thu na ngen li uh hei in, zokha tuk mang. Itizah na ngen uh hei in ngai khaleh tukma toh ing; itahim titale na khut uh thisan tuah dim zo hi.

¹⁶ Ciang zetin tuibual un; ka mitmuhah na bawl lih uhmi sualnakte bawl toh pahsuh un. Thilpha ngawl na bawl uhte cawl toh un.

¹⁷ Thilpha bawl cung un. A dikmi zei unna, bawlsiatnak a thuakte bawm un. Nu le pa nei ngawl, mi ca-ngahte bawm unna, meivongte pan un!

¹⁸ Topa in, “Hung unna, son khawm nung. Na sualnak uh cu sandang bangin a san hei in, vuk bangin ciangtik tung; Sandup bangin a dup vangin tuu mul bangin ngotik tung.

¹⁹ Ka thu na ngai uh ahi tale, hi ngam pen suakmi thilpha hempoh ei tuk uh ci.

²⁰ Mahnaven, ka thu elin, kei na langpang uh tale thi tatak tuk uh ci. Topa keimah in awn zo ing.”

Khuapi Sual

²¹ A muanhuai zetmi khuapi cu numei pha ngawl suakta hi. Tumasuanin, midik tei umnak khuapi hi naven atu-in, mi thattute bebek um haw hi.

²² Maw Jerusalem, tanglaihin, ngun bang hi uh ci; atu-in, man nei ma ci. Tanglaihin, sabittui ukzet bang ci, mahnaven atu-in, tui thawthong bang ci.

²³ Na hotute cu ngalthotu le nguca tei ngualcam ngeh hi hawta hei. Thu a son haw ten nu le pa nei ngawl ca-ngahte pan ngawlin le meivong tei thu vang ngai nuam haw ma.

²⁴ Cungnungbel Topa Israel i Pathian a thawmngengbel i hilhmi cu komno ngai in; Topa in, ka ngal a cang zomi, na humah phuba la tung a, ka humah buainak pialeh tukma toh ci.

²⁵ Na humah ka thinuknak a henleh ten thik a sek haw bangin pumsuknak mei ah sek tung, na nawngkainak hempoh cu vawk khawng tung.

²⁶ Tanglaih hotu le lem bawltute bangin hotu le lem bawltu thak pia tung. Jerusalem cu a dikmi le muantak khuapi tin, sammi hi tuk hi.

²⁷ Topa cu a dikmi a hih hangin Jerusalem cu hup tuk a, sualnak a sikkiktu hempoh cu pan tuk hi.

²⁸ Mahnaven a sualtu le amah dotu hempoh cu ngawivamin, amah lawltute cu that tuk hi.

²⁹ Thingkung na biak uh hangin le huan thiangtho sung a milim na biak uhmi hangin zakca in um tuk uh ci.

³⁰ A thi mi sasua kung bangin thim tuk uh ci a, kua ma tui leih ngawlmi huan bang hi tuk uh ci.

³¹ Hamko cu mei them neuno in, a kanglal theih bangin mi ngil le mi ngilte vang amu thil sual bawlmi tuah siatsuahin, mah siatsuahnak cu kuamah in, cuhmit thei haw tukma toh hi.