HOSEA 9 - Ngawm Bible

Hosea In Israel Dantat Tuk Thuthan

¹ Israel mite aw, midangte bangin puai na bawl uh cu cawl toh un. Na Pathian uh nel pen lam pialin, muantak ngawl mi in cang zo uh ci. Hi ngam buppi sungah numei pha ngawl bangin Baal nelah zuakdun tutuh uh ci. Aman piakmi tin, na ngaihsut uhmi tui le an ten na lung uh damtik hi.

² Mahnaven a ngei ngawlin an, olif thau le sabittuite khamthamin ngah tukma toh uh ci.

³ Israel mite cu Topa i ngam sungah um haw tukma toh hi. Izipt ngamah kiklehin, Assiria ngamah a thiang ngawlmi an eileh haw tuk hi.

⁴ Ngamdang pen Topa i lakah sabittui biakpiaknak pia thei haw tukma.

⁵ Biakpiaknak tuk hun le Topa ca tukin puai bawl hun a hen ten ikaw a bawl haw tuk?

⁶ Lungbingnak hun hengin, mipi a lengkek khawng haw ten Izipt ten Memfis khuapi ah vui tukin cawm khawng haw tuk hi. A sui le ngun, inn le lo umnak mun cu hampa le ling kungte po tuk hi.

⁷ Dantatnak a thuak hun haw heng zo, a hum hawah phu lak tuk hun heng zo hi. Mahtibang a hen hun ten Israel miten thei haw tuk! “Hi ka profet pa hi a sil toh si. Hi hawvang lamhuaitu pa vang a lung-am hi tin ti uh ci.” Na sualnak uh a tam leita hangin nase zetin keimah hua uh ci.

⁸ A miphun Israel tei nelah ngallinnak thu hilh tukin Topa in keimah cu profet tukin hah hi. Mahnaven ka hawhnak hempoh ah vano bangin thang tuah awk tuk tum uh ci. Pathian innsung hei pen mipi cu profet pa i ngalin cang haw hi.

⁹ A thil bawl haw cu a pha ngawl leita hangin Gibeah khua ah a bawl haw mi bangkek hi. Pathian in, a sualnak haw cu cing lelengin bawlsialeh tuk hi.

Israel Sualnak le A Sual Thaman

¹⁰ Topa in, “A masabel a Israel ka muh ten phillawn sung pen sabit ngah muh bang hi. Na pu le pa uhte ka muh phut lai in le theipi ngah hun laihin, a min masabel muh bangkek hi. Mahnaven Peor mual na hen uhten Baal bia pan uh ci.

¹¹ Israel tei sunloihnak cu vano bangin leng vawk khawng haw a, ca neileh ngawltohin le naupai le nau hing tih hei umleh haw tukma toh hi.

¹² Ca a nei haw hei in laksak tung a, nung haw tukma hi. Hi miphunte ka zamsan ten a hum hawah lauhuaizet nate heng tuk tin,” ti hi.

¹³ Topa aw, Israel cate cu ngamsa hawlvawkmi bangin thah a hih haw cu mu ing.

¹⁴ Hih mihing tei humah i bawl tukin ngen tung him? A numeite cingtik khawng inna, a nawitui haw vang kangtik khawngin hi.

Topa In Israel Thukhen

¹⁵ Topa in, “Thil sual a bawl haw mi hempoh cu Gilgal pepan hi. Mahlai mun pen a muhte hua pan ing. Thil sual a bawl haw hangin ka ngamsung pen hawlvawk tung hi. Ituk mah ten deihleh tukma toh ing, a lupi haw ten keimah langpang khawng haw hi.

¹⁶ Israel mite cu a bul ko mi le a ngah thei ngawlmi thingkung bang haw tuk hi. Ca neileh haw tukma toh.” Ca a nei haw hei in, a deih thawhzet haw mi a canote cu thah sak khawng tung,” tin ti hi.

Israel Humah Profet Awnkam

¹⁷ A na ka dehmi ka Pathian in, a mite cu a thu a ngaih nuam haw ngawl hangin lawl tuk a, minam dang tei lakah mi vakvai in cang haw tuk hi.