HOSEA 7 - Ngawm Bible

¹ “Ka miphun Israel, damtikin khangtotikleh tuk deih naveng, phat ngawlnak le thil sual bawl li bekin mu ing. Pa khat le pa khat zoldun haw, inn suletin van ngudun haw, lampi lak pen mi nate lonsak haw hi.

² Thilpha ngawl a bawl haw mi hi ciing leleng tung tih hi ngaisung baan haw ma; a sualnak haw in, amuh upbing khawng zo a, zothong thei viang mang,” ti hi.

Kumpi lnn Pen Suamnak

³ Topa in, “Mipi ten a kumpipa le a bawite zolin, suam haw hi.

⁴ A venghawng haw in angkawm sualnak bawlin, muantak haw ma hi. Cangho emtu pa in cangho copin, mei lingzet humah cangho em ten sa liklek bang hi.

⁵ Kumpipa i puai bawl ni ten kumpipa le a khutnuai bawi hempoh cu zu khamtikin misil cangtik khawng haw hi.

⁶ A mi suam nuamnak haw cu meiling bangin ling leleng hi. A thinuknak haw cu zankhua khu bubumin, zing khuavak ten mei alh bangin alh hi.

⁷ A thinuknak haw sosang leita in, amuh uktute nangawn that ngam haw hi. A kumpite cu pa khat nung pa khat thah tawk haw naven kuamah in bopnak ngenin, ka nelah thungen haw ma,” ti hi.

Israel le Minam Dangte

⁸ Topa in, Israel cu a lang khat bek a minmi cangho tuah bangve hi. A elkim haw a, miphun dangte muansan haw hi.

⁹ Ngamdangmi a muansan haw hangin a ngilnak haw a kiamlam thei haw ma hi. Ngeipi nung haw tukma toh, tihvang theidun kha sap haw ma.

¹⁰ A pualthaunak haw cu a sualnak haw langtiktu hi. Hiti bangin thil a cang khawng hei ten Topa a Pathian haw keima nelah kik nuam haw ma laih hi.

¹¹ Israel cu ngaihsutnak nei ngawl, misil bangin vak kawi hi. Amasa in bopnak ngen tukin Izipt ah hawhin, a dawlta ten Assiria nelah hawh leleu hi.

¹² Mahnaven amah matnak tukin suukthang siah tung a, a hawh laih takin vano bangin awk tung hi. Thil sual a bawl haw hangin dantat tung hi.

¹³ “Amuhte cu cimit haw tuk hi! Keimah taisanin langpang zo haw hi. Amuhte cu siatsuah hi haw tuk hi. Pan nuamzet naveng keimah a biak daan tuk khial haw hi.

¹⁴ Thintakin thungen haw ma, a thunget i haw cu lei ah lumin, milim biatute bang au in, tau li haw hi. An le sabittui ca in thu a nget haw ten milim biatute bangin sundun niknek haw hi. Izah tian kei langpang haw him!

¹⁵ Amuhte cawmtu le ngilnak piatu cu keimah hi naveng keimah mualphotiktu in cang haw hi.

¹⁶ Huham cahnak a nei ngawlmi pathian dang tei nelah pialsan lelem haw hi. Amuh cu a kawi mi thal bangin muantak haw ma hi. A lupi haw cu pualthau zetin, a ot haw hangin sak thihin thi haw tuk a, Izipt ten nuihsan haw tuk tin,” ti hi.