HOSEA 3 - Ngawm Bible

Hosea le Muantak Ngawl Numei

¹ Topa in, hi bangin hilh hi, “Hawh inna, midang a ngaitu numei pha ngawl cu it lehin hi. Israel miten pathian dadang bia in, milim mai ah sabit kote a pia li haw hei in, amuhte ka ih bangin mah nu cu it lengin tin,” ti hi.

² Mah hangin mah nu leinak tukin ngun tangka sawm le pa nga le barli cang seu salih pia ing.

³ Hun ngeipi sung numei pha ngawl nadek ngawlin le nupa sualnak bawl ngawlin a ngah leng bangin atu-in nangmah cu ngak bok tung, tin hilh hi.

⁴ Mahti bangin Israel mite cu kumpi le hotu nei ngawl, biakpiaknak le suang khuam thiang nei ngawlin, zuk le milim nei ngawlin ngeipi um haw tuk hi.

⁵ Mahnaven Israel mite cu Topa Pathian lamah hekkikin, David kumpipa i casuan lakah zuan kikleh haw tuk hi. Mah ni ten Topa cu kihca in, laksawng pha co haw tuk hi.