HOSEA 14 - Ngawm Bible

Hosea In Israel Kun

¹ Israel mite aw, Topa na Pathian nelah kikleh un. Na sualnak uh hang bahin, lum zo uh ci.

² Topa lakah kikleh unna, hi bangin thungen un: “Ka sualnak uh hempoh ngaidam zal inna; ka thungetnak uh sansakin, ka thutiamsa uh bangin pahcawi tuk ung hi.

³ Assiria in pan thei cuang tukma, ka cipuhleng uhte vangin pan zo cuang haw tukma hi. Khut tuah bawlmi milim tei nelah nang cu, ka Pathian uh hi ci, tin ti tukma toh ung. Topa bawmtu nei ngawl tei nelah hehpihnak pia litu nangmah hi ci tin ti un.”

Topa In Israel Ca Tukin Nunnak Thak Tiam

⁴ Topa in hi bangin ti hi. “Ka miphunte cu ka nelah kiklehtik tung. Ka lungmu ngangai tuah itleh tung. A muh tei humah ka thinukleh tukma toh ing.

⁵ Israel tei ca in ngamko a, nguahtui bang hi tung hi. Lily pak bangin pak haw tuk a, Lebanon thingkung bangin kho zetin poto haw tuk hi.

⁶ A zik thak tawtmi olif thingkung bangin mawi haw tuk hi. Lebanon ngam a, sidar thing kung bangin namtuizet tuk hi.

⁷ Keima humhimnak sungah ankungte cingin, sabit huan sung a, sabittui bangin a min haw thang tuk hi.

⁸ Israel mite cu milim tuah pehdunnak neileh haw tukma toh hi. A thungetnak haw ngai in, cingkhawi leleng tung hi. A ceh a hing lelengmi thingkung pi bangin ka lim nuai ah koih tung hi. Keimah cu a muicu ngahnak bulpibel ing hi tin,” ti hi.

⁹ Micip hempoh ten hih laingatmi hi theitumin, a lungmu sung hawah cing leleng haw hen. Topa i lampi cu manin, midik hempoh ten zui haw hi. Mahnaven misual ten mah lampi a zui haw ngawl hangin bahin lum haw hi.