HOSEA 12 - Ngawm Bible

¹ Zing khuavak pepan taklam nitum tian Israel tei bawlmi cu nemcuamnak um ngawl, siatsuahnak bebek hi. Amuh tei lakah mi mualphohnak le siatnak lam bebek luaitik haw hi. Assiria tuah ngallemnak bawlin, Izipt tuah van lei dunnak bawl haw hi.

² Topa in, Judah mite mawhsiat tuk nei hi; Israel mite cu a nungcang a phat ngawl hangin bawlsia tukmi hi. A bawlmi haw humah phu la tung.

³ A pu haw Jakob cu a u Esau tuah a nu i pum sung pen haudun sa in le a upat ten Pathian tuah vang buandun haw hi.

⁴ Vancungmi tuah buandunin neh hi. Jakob cu kapin, muicu thupha ngen hi. Pathian cu Bethel mun pen Jakob nelah hungin thuhilh hi.

⁵ Amah cu a humtabel Topa Pathian hi; Topa tih cu amah ka biaknak tuk uh min hi toh hi.

⁶ Mah hangin Jakob casuante, na Pathian uh cu muangin, ama nelah kikleh un. Muantak zetin nung unna, Pathian nadek tukin thinsau zetin ngak un hi.

Thukhennak Awnkam

⁷ Topa in, Israel mite cu Kanaan mite bangin awklawlzet haw hi. A van leitute cu cuai man ngawl tuah zol tum haw hi.

⁸ Hau ngah zo ung, nei ngah zo ung kuamah in thuman ngawl tuah hau ngah zo uh ci tin, siatson thei haw tukma ti haw hi.

⁹ Mahnaven kei cu Izipt ngam pen a puitultu Topa na Pathian uh ing. Phillawn sung a, na nel uhah ka hun laihin, puanbuk sung na um uh bangin umtikleh tung hi.

¹⁰ Profet tei lakah thu tampi hilhin, muhnak tampi lak ing. Profet mangin ka miphun tei lakah ngallinnak tuk thupia ing.

¹¹ Gilead ah Gilgal milim bia haw in, a biatu hempoh cu thi haw tuk hi. Gilgal ah khuicang tuah biakpiaknak bawl haw in, a biaknak biaklandawh haw cu hampa lak suangsehin cang tuk ti hi.

¹² A pu uh Jakob cu Aram ngamah tai in, mahlai ah zi tuk tha lawhin tuu cing hi.

¹³ Israel mite Izipt saltannak pen kaisuah tuk le cingkhawi tukin profet pa khat hah hi.

¹⁴ Israel miten Pathian cu nase zetin, a thinuktikin, a sualnak haw hangin thi takzet haw hi. Pathian humah nautatnak a hentik haw hangin Amah in dantatleh tuk hi.