HOSEA 11 - Ngawm Bible

Pathian In A Ngalte It

¹ Topa in hi bangin hilh hi; Israel cu a naupang laih pen pan ka ihmi hi. Ka capa a hih hangin Izipt ngam pen sam tul ing.

² Mahnaven ka capa tin ka sam dedeuh ten ka nel pen khua la dedeuhah pial hi. Ka miphunte cu Baal nelah biakpiaknakte pia in, milim nelah namtui haal haw hi.

³ Mahnaven Israel lamciah a zilhtu cu keimah ing. Ka angsungah cawi ing. Mahnaven ka cinkhawi lih cu thei haw ma hi.

⁴ Itnak le hehpihnak tuah pui ing. Cawi in, a biang pen thut ing a, kun thahin ancah ing.

⁵ Mahnaven ka nelah kikleh nuam ma hi. Mah hangin Izipt ngamah kiklehin Assiria in ukleh tuk hi.

⁶ Ngal ten a khua haw laksak khawngin, a khua kongkhahte siatsuah khawng tuk hi. Amu deihnak bek a bawl haw hangin ka miphunte cu siatsuah khawng hi haw tuk hi.

⁷ Ka nel pen taitul tuk a tum leleng haw hangin, a hum hawah ngawngkol suan ing; a au li haw hei in, a dawntu tuk kuamah nei haw tukma hi.

⁸ “Israel, iti bangin kaw nang ka hah thong theih tuk? Israel, ita nang nunghek san thei tung kaw? Admah bangin ita siatsuah tung heng? Zeboiim bang ka bawl tuk cu ngaisung thei mang hi. Ka ihnak ka lungmu cu lumin, nemzet hi.

⁹ Ka thinukin cawh tuk mang, Israel cu siatsuahleh tuk mang hi. Itahim titale kei cu mihing hi kha mang, Pathian ing hi. Noh tei nelah a um mi thiangthobel hi ing a, thinukin hung tuk mang.

¹⁰ “A ngal tei lamah kiosa bangin hawk tung a, ka miphun ten zui in, nitumnak lam pen manlang zetin zuan haw tuk hi.

¹¹ Izipt pen vano bangin manlang zetin hung haw tuk a, Assiria pen khulo bangin heng haw tuk hi. Amu inn tekah pinpih tung tin, Keimah Topa in hilh zo ing.”

Israel le Judah Liat Tawk

¹² Topa in, hi bangin ti hi, “Israel miten zolthu a sonnak le a mizolnak haw tuah keimah kim haw hi. Muantak le a thiangtho zetmi Pathian hi naveng Judah miten keimah langpang leleng haw hi.”