HOSEA 10 - Ngawm Bible

¹ Israel cu a ngah zetmi sabit kung bang hi. A hauh dedeuh haw ten biaklandawh tam dedeuh bawl haw hi. A ngam hawah an tam deuh a suah ten a biak haw mi thingmungte cu mawi dedeuhin bawl haw hi.

² A lungmu haw cu mizolnak tuah dimin, a sualnak haw hangin thuak haw tuk laih hi. Pathian amah loli in, a biaklandawhte siatsuahin, a thingmungte cu vat ek khawng tuk hi.

³ Ngei can ngawlin hi miphun ten, Topa a lau haw ngawl hangin kumpipa in i bawlsak thei cuang tuk him?

⁴ A kam bek haw poh si; phukthong thutiam dunnak bebek poh si. Thudik cu thudik ngawlah cangtikin, ngu nei hampa bangin khang zuzung tuk poh, tin ti haw hi.

⁵ Samaria khuapi sung a, ummite cu a thinsu haw in, Bethel a sui khuicang zuk a paih hangin, thasiazet haw tuk hi. Amuh le a thiampi ten khuicang zuk cu kah haw tuk hi. A mawinak sui hempoh a lak khawng haw ten kapin, au li haw tuk hi.

⁶ Mah khuicang zuk cu Assiria kumpipa i lakah siah ai-in pia haw tuk hi. A thu a ngaih haw hangin Israel miten zahcak le mualphonak tawk haw tuk hi.

⁷ A kumpi haw cu tui hum a thingtum tai bangin tai vawk tuk hi.

⁸ Israel tei biakmi Aven mualhum a, milimte cu siatsuah khawng tuk hi. A biaklandawh haw humah hampa le ling kungte po tuk hi. Mipi ten mualsang tei lakah, “Keimuh delhin,” tin kun haw tuk hi.

Topa In Israel Thukhen

⁹ Topa in, Israel mite Gibeah pen a sual pat haw pepan tutian ka humah cawl haw ma laih. Mah hangin ngal ten Gibeah pen pha tuk hi.

¹⁰ Hih misualte thuhilhnakin dantat tung. Minam tampi ten simtumin, a sualnak haw tampi hangin dantatnak tawk haw tuk hi.

¹¹ Israel cu zilh niknek sa khuicangno cangcil nuamzet tuah bangve hi. Mahnaven nadeh haksa dek thei tukin a mawi zetmi a ngawngah ngawngkol bulh ing. Judah in thee kai in, Israel in thuan kai hi, mahti bangin leilet haw hi.

¹² Nangmu ca un lei thak let un; thudik cu phut unna, keima lam na tanman uhin, thupha conak cangngui cu at un hi. Na Topa uh keima nelah na kihleh hun can uh kim zo; keimah hungin, na hum uhah thupha pia tung ti ing.

¹³ Mahnaven phatngawlnak na cin uh hangin phat ngawlnak at uh ci. Zolthu na sonnak i ngah cu ei zo uh ci. “Na cipuhleng le na ngalkap tampi na muansan uh hangin,

¹⁴ Na miphun tei lakah ngal hengin, ngalnannak mun hempoh siatsuah sak khawng haw tuk hi. Mah ni cu kumpi Shalmanin Betharbel khua siatsuahin numei le nau pangte a thah khawng ni bangin hituk hi.

¹⁵ Thilpha ngawl na bawl uh a tam leita hangin mahti bang bokin, noh Bethel mitei humah heng tuk hi. Ngaldonak a pat bek ten Israel kumpi cu thi tuk,” tin ti hi.