HEBRU 8 - Ngawm Bible

Jesuh Ohtei Thiampi Sangbel

¹ Atu-in, a son nuambel uhmi cu: Vanhum a Pathian khunnak taklam loli ah a khung theitu Thiampi Sangbel nei hung tihmi khi hi.

² Mun Thiangthobel ah Thiampi Sangbel nadekin, mah mun cu mihing tei sakmi puanbuk hi ngawlin, Pathian amah loli i bawlmi puanbuk ngangai hi.

³ Thiampi hempoh tei nadeh cu Pathian nel a, piakmi laksawng le biakpiaknak tuk a piak haw mi nganhing ap tuk khi hi. Mahti bang bokin a Thiampi Sang uh hei in piak tuk a neih bok kul hi.

⁴ Leihumah a um leleng ahin thiampi dek tukma hi, itahim titale Judah daan in laksawng piakmi a aptu tuk thiampi a dang um leng haw hi.

⁵ Leihum lam pen thiampi tei na a deh haw mi cu vanhum a thiampi dehnak tuk limlaknak hi. Mahti bang bok lengin Moses thu ah vang hi bok hi. Moses in thutiamnak puanbuk a sak tuk ten Pathian in, a lakah, “Mualhum pen zohteh tuk ka lakmi bangkekin sa un,” ti hi.

⁶ Mahnaven amu dehmi sangin a cuangcung saw mi thiampi nadehnak cu Jesuh lakah piak hi zo hi. Pathian le a mitei laklawhah Jesuh i bawlmi thutiamnak cu a pha saw mi tepdunnak a hih bangin thiampi nadehnak vang cu a pha saw mi bok hi.

⁷ A masa thutiamnakah cangkim ngawlnak a umma ahin a dawlta thutiamnak cu kul tukma hi.

⁸ Mah hangin Pathian in, a mihingte cu mawhsiatin, “Topa in hi tin hilh hi; Israel le Judah mite tuah thutiamnak thak ka bawl tuk uh hun heng hi.

⁹ Izipt ngam pen puitul pih tukin, a pu le pate a khut haw pen ka puitul laihin, ka thutiamnak bang cu hi tukma hi. Amu lakah thutiamnak ka bawlmi cu a zui nuam haw ngawl hangin, kei hei in imah simsialleh bokma toh ing,” ti hi.

¹⁰ Topa in: “A heng tukmi hunah Israel mite tuah hi bangin thutiamnak bawl tung hi. Ka daan cu a ngaihsutnak hum hawah koih tung a, a lungmu sung hawah ngan tung hi, keimah cu a Pathian haw hi tung a, amuh cu ka mite hi haw tuk hi.

¹¹ Kuamah in, a unau le amu ngamsung a phunpih hihen, ‘Topa thei un,’ a tihdun haw kul tukma hi. Itahim titale upabel pen nautabel tianin, a venghawng haw in thei khawng haw tuk hi.

¹² A sualnak haw ngaithiam tung a, a sualnak haw hei cing leng tukma toh ing,” ti hi.

¹³ Hitih bangin Pathian in thukham thak a hilh hangin a masa cu a lunah cang zo hi, mahten a lunmi le a balkek zo mite cu a ngei ngawlin paithong tuk hi.