HEBRU 4 - Ngawm Bible

¹ Atu-in, Pathian in colhnak cu ngah theih tukin thutiamnak pia zo hi. A tepsami colhnak sungah heng thei ngawl kha kawn hung tih hi ngalling zetin um nung hi.

² Itahim titale amuh tei zak bangin eimuh vangin Thuthangpha cu za zo toh hung. Mahnaven Thuthangpha a zak haw mi cu amu ca in nemcuamnak imah umma hi. Itahim titale a zak bek zata zamin upnak tuah pom nuam haw ma hi.

³ Oh a thu umtute cu Pathian i tepmi colhnak a cotu hi saw hung hi. “Ka thinukzet hangin, ‘A colhnak haw tukin ka tihmi ngamah tum hihim tukma uh ci,’ tin thutiam ing,” a tihmi cu kim hi. Itahim titale leipi a bawl pepan a nadeh cu ceng khawng zo toh naven hitih bangin hilh hi.

⁴ Itahim titale Lai Thiangtho in mun kha khatah ni salih thu ah, “Ni salih ni-in Pathian cu nadehnak pen cawl,” ti hi.

⁵ Hi thu ah a hilhmi um nawm laih hi, “A colhnak haw tuk ka tihmi ngamah tum hihim haw tukma,” ti hi.

⁶ Thuthangpha a za masatu ten mah colhnak cu ngah haw ma hi, itahim titale sang haw ma hi. Mahnaven co ngahtu tuk midang um hi.

⁷ Hihi cu Pathian i “Tuni” a tihmi ni dang pa khat a koih lehmi in ciangtik hi. Kum tampi nungten a humah a sonsami Lai Thiangtho sungah a um bangin Pathian in David lak pen, “Tuni Pathian i aw na za uh tale lungmu ngoltolmi hi pahsuh un,” tin hilh hi.

⁸ Pathian tepsami colhnak khi mipi tei lakah Joshua in, a pia ngahta bang ahin, “Tuni” tihmi ni a dang i thu khi hilh tukma hi.

⁹ Tu bang ahi tale Pathian cu ni salih ni ah a colh bangin Pathian i mihing tei ca in colhnak a dang umlaih hi.

¹⁰ Itahim titale Pathian i tepmi colhnak ngahtu, Pathian in nadeh a celh ten a colh bangin a nadehnak haw pen cawl bok haw tuk hi.

¹¹ Mah hangin Pathian i tepmi colhnak a co theihnak tukin zuam theih tawp zuam nung hi. Amuhte cu upnak a neih haw ngawl hangin a co theih haw ngawl bangin ohte cu mahtih bang hi kha hihim tukma hung.

¹² Pathian i thu cu nungin, thil tithei hi. Lang nih a hiammi naam sangin hiam saw hi. Nunnak le hawvang a tawhdunnak haw le nguh le ling tei pehdunnak tianin paihlet veu in sunlet khawng thei hi. Mihing tei lungmu deihnak le a ngaihsutnak haw thei khawng hi.

¹³ Pathian lak pen sel theihmi imah umma hi, Pathian i semsuahmi na hempoh cu ama mai pen hon khawngmi le phalhlet zingzengmi bangin lang haw hi. Ni kha khat ten a venghawng uhin ama mai ah phuangleh khawng pilpial tuk laih hung hi.

Jesuh Thiampi Sangbel

¹⁴ Mah hangin a upnak uh khi khim zetin lenkhim lo tuk hung. Itahim titale Pathian Capa Jesuh cu eimuh tei Thiampi Sang hi a, amah cu Pathian i umnak loli ah heng zo hi.

¹⁵ Ohtei Thiampi Sang cu a nawmtamnak uh theihpih ngawltu Thiampi Sang kha ma hi, Eimuh bangin sualsohnak a phunkim a tawkmi pa bok hi. Mahnaven amah cu sual ma hi.

¹⁶ Mah hangin hehpihnak umnak mun Pathian i khunnakah ngalpha zetin zuan nung. Mahlai pen a kul le sap uhten hehpihnak cu ngah tuk hung hi.