HEBRU 11 - Ngawm Bible

Upnak

¹ Upnak nei tihmi cu a muansan uhmi ngah loli tuk hung tin muan le mit tuah amuh uh ngawlmi um tatak tuk tin upmi khi hi.

² Mahti bang upnak a neihnak haw hangin Ni dang laih a, mihing ten Pathian i lungkimnak co ngah haw hi.

³ Upnak a neih uh hangin lei le van hi Pathian awnkam tuah bawl tih khi thei hung hi; mah hangin Pathian in muh theihmi bawlnakin, muh theih ngawlmi mang hi.

⁴ Abel cu Pathian a upnak hangin Pathian nelah a piakmi biakpiaknak cu Kain i biakpiaknak sangin pha saw hi. A upnak hangin Pathian in midikah cosang hi, itahim titale a laksawng cu Pathian a lungkim hi. Abel cu thi zo naven a upnakin mi lakah thu hilh li laih hi.

⁵ Enok cu thi ngawlin Pathian nelah a latotu cu a upnak hi. Kuamah in, a luang mu haw ma, itahim titale Pathian in la hi. Lai Thiangtho sungah, “Pathian nelah laktoh a hih laih ngawlin, Enok in Pathian lungdamtik,” tin um hi.

⁶ Upnak ngawl tuah kuamah in Pathian lungdamtik theih ma hi, itahim titale Pathian a zuantu in Pathian um hi, tih le amah a zeitu tei lakah laksawng pia hi tih a up haw kul hi.

⁷ Noah in, a muh theih ngawlmi mailam a, a heng tukmi Pathian i ngallin piakmi a theitiktu cu a upnak hi. Pathian thu ngai in, timbaw bawl a, mah sungah amah le a innkua cu himdamno in suakca haw hi. Mah hangin leihum cu thukhennak tawkin Noah cu a upnak hangin Pathian lak pen dikcangnak co hi.

⁸ Abraham cu upnak a neih hangin Pathian in pia tung hi tin, a tiammi ngamah hawh tukin a sam ten Pathian deihnak a zuinak cu a upnak hangin hi. Ilai lamah hawh tung tih hei thei ngawl na pi in, a khua le tui cu tulsan hi.

⁹ Pathian i tepsami ngam sungah a upnakin mikhualah cangin um hi. Pathian thutiamnak a co bokmi Isaak le Jakob bangin buk sungah um bok hi.

¹⁰ Itahim titale Pathian hi kumkhua kho tukin bulphuhmi, a tawphah khimmi le a sakmi khuapi sung um tukin ngak hi.

¹¹ Abraham cu tekzet zo in, Sarah vang ca nei theileh ngawl toh naven upnak a neih hangin Abraham cu pa in cang hi. Pathian in, a thutepmi cu bawlsuak tuk hi tin um hi.

¹² Abraham cu a thisa zo tin ngaihsutmi hi naven ama sung pen a casuante cu van aksi zah le tuipi mawk a, sialcelh ngawl ngunphil zahin tam haw hi.

¹³ Hih mite cu upnak neitu cu a hih haw hangin upnak tuah thi haw hi. Pathian i tepsa mite a co ngah haw ngawl hei in, ngalcuanin, mu in lungdam haw hi. Lei humah mikhual le mi vakvai a hihnak haw theicop haw hi.

¹⁴ Mahtibang a theicoptu cu amuta tuk ngam zei haw hi tih lang hi.

¹⁵ A tulsan haw mi ngam cu mahel leh haw ma toh hi. A ma haw ahin, kihlehnak hun nei haw tuk naven,

¹⁶ A muh tei ngaihsutmi le a ngaih haw mi cu ngam pha deuh saw mi van cung ngam khi hi.

¹⁷ Mah hangin Pathian cu amuh ten “Ohtei Pathian” tin, a sam haw ten Pathian a zakca ma hi. Itahim titale amu ca in khuapi bawlsak zo hi. Abraham cu umnak a neih hangin Pathian in thiatha a zoh ten Pathian nelah a capa Isaak khi biaknakin pia hi. Pathian i thutepmi cu Abraham hi. Mahnaven a capa a neihcalam cu biakpiaknakah piak tukin a bawlsami hi.

¹⁸ Pathian in Abraham lakah, “Ka tepsami casuante cu Isaak hi cikhaihmi hi tuk tin,” ti hi.

¹⁹ Abraham i ngaihsutnakah Pathian in Isaak cu thihnak pen tholehtik tuk hi tin ngaisung hi. A ngaihsutnak bangin, a thi sa tin ngaihsutmi Isaak cu a pa Abraham in, a nungin tawkleh hi.

²⁰ Isaak in upnak a neihnak hangin mailam ten thupha ngah tuk uh ci tin Jakob le Esau lakah thutiam hi.

²¹ Jakob in upnak a neih hangin a thih deuh laih ngawlin Josef capate thupha muicu pia hi. A thiangkhut ngaingam thahin Pathian bia hi.

²² Josef cu upnak a neih hangin a thih kuan hei ten Israel mite Izipt ngam pen suakleh haw tuk hi tin hilh hi. A thih ten a luang cu iti bang bawl tuk tih thu cah khawng hi.

²³ Moses i nu le pa ten upnak a neih haw hangin a hin ceng ha thum tian sel haw hi. A capa Moses cu deih awhzet a hih hangin kumpi thupiakmi el tuk hei lau haw ma hi.

²⁴ Moses cu upnak a neih hangin a upat ten Izipt kumpi canu i capa tin sam tuk deih ma hi.

²⁵ Hun comno sung sualnak sungah nunnopin um tuk sangin Pathian i mihingte tuah haksat thuak tuk teng saw hi.

²⁶ Khrih ca in nautatnak thuak cu Izipt ngamsung a hauhnak hempoh sangin mannei saw, tin ngaisung hi. Itahim titale a muibatmi cu mailam ten a ngah tukmi laksawng hi.

²⁷ Moses cu upnak a neih hangin Izipt ngam kumpipa i thinuknak hei lau ngawlin Izipt ngam taisan ngam hi. Muh theih ngawlmi Pathian cu amu bangin kik nuam hihim ma zo hi.

²⁸ Upnak a neih hangin Kaltan Puai cu bawlin kongka humah thisan theh tukin thupia hi. Mahtin a bawlnak cu Israel tei capa tawntil, a thattu vancungmi in that pahsuh hen tihnak hi.

²⁹ Upnak hangin Israel miten tuipi san cu leiko bangin tan phei thei haw hi. Izipt miten a tan tum bok haw naven tui in khuhin, thi khawng haw hi.

³⁰ Israel miten ni salih sung a kip haw nungten, Jerikho khuapi upnak kulhtian pi cimtiktu cu upnak hi.

³¹ Numei pha ngawl Rahab cu Pathian thu a ngai ngawltu Jerikho khua mitei lak pen thi ngawlin a hupsuak theitu cu upnak hi. Mahmi cu Israel mi, ngal vilvengtute a pat hangin hi.

³² Hilh pepel tuk laih ing maw? Gideon, Barak, Samson, Jefthah, David, Samuel le profet tei thu la hilh tuk tampi um naven hilhnak hun can umma hi.

³³ Upnak tuah ngam tampi do in neh haw hi. A phami bawlin Pathian thutepmi co haw hi. Kiosa tei kam ciptik haw hi.

³⁴ A lauhuai zetmi meipi mitin, ngalnam thahnak pen luat haw hi. Mi nawmtam hi haw naven mi ngilzetah cang haw hi. Ngaldonakah ngilin, ngamdang ngalkap tampi neh haw hi.

³⁵ Upnak hangin numei tei sangngam thihnak pen nun lehtik hi haw hi. Midang cu nunnak pha saw ah thawhtikleh tuk a deih haw hangin luatnak teng ngawlin bawlsiatnak sungah thih tuk khi teng saw haw hi.

³⁶ Mi khenkhat cu zotsak le vah tawk haw. Mi khenkhat cu thik taicin tuah khihin, thawnginnah khia haw hi.

³⁷ Suang tuah seh hup co haw. Hluah tuah tum nih ahtawng thuakin, ngalnam tuah thah tawk haw hi. Tuu le keel phaw silhin, mun hempoh ah vakin, zotsak le nautat zetmi hi in, bawlsiatnak thuak haw hi.

³⁸ Amu ca in leihum hi umnak pha ma hi. Ngaltaimi bangin hampa lak le mualhum lakah vakvai in, suanghol le lei kua lakah um haw hi.

³⁹ Upnak a neizet haw hei in Pathian i tepsa mite co ngah haw ma laih hi.

⁴⁰ Itahim titale Pathian in eimu ca in khuakhannak pha deuh a neih hang hi. A tumtah ngangai mi cu eimuh tuah munkhatno in, a um uh bek ten cangkimnak ngah haw tuk hi, tin ti hi.