HEBRU 10 - Ngawm Bible

¹ Judah tei Daan in, a tatakmi cu ciangzet le kim zetin langtik thei ma hi; a heng tuk laihmi thilpha i limlak hamnak bek hi. A bawl lih mek haw biakpiaknak cu kumsialin bawl leleng haw hi. Mah ahi tale itakaw Daan zui in, Pathian a zuantu khi mi cangkimin, a bawl theih tuk?

² Pathian a biatu a sualnak haw thiantik ngangai bang ahin sual cangkhualnak umleh tukma tohin, biakpiaknak tihmi hempoh vang um tukma toh hi.

³ Mahnaven thil umdan ngangai cu, kumsialin, a sualnak haw phawktiktu tuk biakpiaknak bek hi.

⁴ Itahim titale khuicang thisan le keel thisanin sualnak thiangtik thei awng ma hi.

⁵ Mahti bang a hih hangin lei humah Khrih a hunsuk ten Pathian nelah, biakpiaknak le piaknak cu na deihmi kha ma hi; mahnaven keima ca in taksa pum tuangtim sak zo ci.

⁶ Ngannung pumin piakmi meihal biakpiaknak humah lungkimnak nei ma ci, sualthiannak tuk biakpiaknak hei in, lungdamnak nei cuang ma ci.

⁷ Mahten Daan laibu sung a, keima cungcang a ngat haw bangin, a nelah, Pathian aw, na deihnak bangin bawl tukin hilai ah um ing, “Tin ti ing,” tin hilh hi.

⁸ A masabelin, a hilhmi cu, “Biakpiaknak le piaknakah hihen, biaklandawh hum a ngan le sualthiannak tukin biakpiaknakah hihen, lungdamnak nei ma ci, na deihmi hei kha haw ma,” ti hi.

⁹ Mah nungten amah in, “Pathian aw, na deihmi bawl tukin hilai ah um ing,” ti hi. Mah hangin Pathian in biakpiaknak lun cu vawkin, mah ai-in Khrih cu biakpiaknak tukin koih hi.

¹⁰ Itahim titale Pathian i dehtik a nuammi cu Khrih in, a bawl khawng hangin ama pumpi kumkhua phatmi a piaknak hangin ohte a sualnak uh pen thiangtik hi.

¹¹ Judah thiampi tei dehvo cu nisial dekin, a piak mek haw biakpiaknak cu vei tampi pia haw hi. Mahnaven biakpiaknakin sualnak thiang awng ma hi.

¹² Mahnaven Khrih i biakpiaknakin vei khat pia in, mahmi cu kumkhua ca phaat hi; mah nungten Pathian i taklamah khung hi.

¹³ Mahlai pen Pathian in, a ngalte a sihpektik laklawh ngakin um hi.

¹⁴ Vei khat biakpiaknakin sualnak pen a thiantik mite cu kumkhua cangkimin bawl hi.

¹⁵ Mahten Hawvang Thiangtho hei in, a theihpihnak eimu lakah langtik hi. A masabelin,

¹⁶ “Topa in hi bangin awn hi: Mailam ten amuh tuah ka bawl tukmi cu hi bangin hi. Ka daan cu a lungmu sung hawah koih tung, a ngaihsutnak haw humah ngan tung,” ti hi.

¹⁷ Mah humah hilh thuah tung, “A sualnak haw le a mawhnak haw cu phawkngil tung,” ti hi.

¹⁸ Mah bangin a sualnak ngaihthiam ahi tale sualhah biakpiaknak cu imah kul lehma toh hi.

Pathian Neek Tuk Hung

¹⁹ Mah hangin u le naute, Jesuh thisan i hangin Mun Thiangthobel tum theihnak luatnak cangkim nei zo hung hi.

²⁰ Amah in lampi thak, lampi nung, puanzak sung pen hong sak zo hi. Mah puanzak cu ama taksa pumpi khi hi,

²¹ Vanhum a Pathian i innpi cingkhawitu tukin thiampi cuangcung nei hung hi.

²² Mah hangin a kho mi upnak tuah Pathian cu neek tuk hung. Sualnak lungmu thiantikmi le tui tuah thiantikmi a pumpi uh tuah Pathian cu zuan un hi.

²³ Muansannak nei hung tin, a langtik uhmi khi, khim zetin pom tuk hung; itahim titale a thutepnak a kimtiktu Pathian cu muantak hi.

²⁴ Pa khat le pa khat ngaihsak dunnak neinung; pa khat le pa khat bawmdunin itnak le phatnak langtikdun nung.

²⁵ Munkhatno in, a pumkhawm mek uhmi khi zamsan thong ma nung. Mi khenkhat ten zamsan haw naven Topa i Ni a nai dedeuh li toh hangin, oh cu pa khat le pa khat thazaang a piadun dedeuh tuk mite hung hi.

²⁶ Thutak a theih ngah ceng uhten, sualnak khi thei leng na pi in, sualnak a bawl leleng uh tale sualthiannak tuk biakpiaknak a dang imah umleh ma toh hi.

²⁷ Amu ca in, a heng tukmi Pathian thukhennak le Pathian a dotute kang khawngtu tuk a lauhuai meipi khi lau mahtakin ngak tuk bek na hi haw hi.

²⁸ Moses Daan thu a zui ngawltu cu tetti pa nih pa thum ten sual hi tin, a soncat haw tale hehpihnak um ngawlin thah co haw hi.

²⁹ Mahti bang ahi tale Pathian Capa a simsial ngawltu le sualnak pen a thiangtiktu Pathian thutepmi thisan a simsial ngawltu le hehpihnak neitu, Hawvang a zawnsaktu itih bangin bawl haw kam ni? Mahti bang mihing ten itihzah bawlsiatnak thuak haw kam ni? Ngaisung un!

³⁰ Itahim titale “Keimah in phu la in, thukleh tung,” a tih i humah, “Topa in, a mihing tei thu cu khen tuk hi,” a titu cu akua him tih thei hung hi.

³¹ A nungmi Pathian khutsung a hen cu lauhuaizet hi.

³² Ni dang laih na nundan uh ngaisung un. Nangmu lakah Pathian vaknak a hen sem laih khin, thuaknak le haksatnak a phunkim tawk nave uhcin mah haksatnakin neh ma hi.

³³ Vei kha khat ten mipi muhah haksatnak le bawlsiatnak tawk uh ci, mahtih bangin zotsaknak le bawlsiat a thuaktu midang tei haksatnak thuakpih bok uh ci.

³⁴ Thawngtate a haksatnak haw thuakpih uh ci. Na neih uhmi van hempoh a lonsak khawng haw ten, na sunnak uhte cu lungdamin umpih thei uh ci; itahim titale hi vante sangin a pha saw mi le kumkhua a kho leleng tukmi nei leng hung tih khi thei uh ci.

³⁵ Mah hangin thinkham pahsuh unna, ngalphatnak na neih uhmi paitik pahsuh un, laksawng ngengpi ngah tuk uh ci.

³⁶ Pathian deihnak a bawl thei tukin le a thutepmi co thei tukin thinsau in um un.

³⁷ Itahim titale Lai Thiangtho in, “A ngei ngawlin amah cu heng tuk hi.

³⁸ A dikcangmi ka miphun ten sangin nung haw tuk a, mahnaven nungkiktu a um haw tale, a hum hawah ka lungdam tuk mang,” ti hi.

³⁹ Ohte cu nungkikin, a pha thongmi hi ma hung hi. Upnak nei in, nunpatnak a cotu saw hung hi.