HEBRU 1 - Ngawm Bible

A Capa Tawnin Pathian Awnkam

¹ Tanglaihin Pathian in, a pu le pa tei lakah profette mangin vei tampi in thuhilh hi.

² Mahnaven hun dawllam ten ohtei lakah a Capa tawnin hilh hi. A Capa tawnin lei le van bawlin a dawlbel ten ihempoh nei khawngtu tukin teng hi.

³ Amah cu Pathian sunloihnak langtiktu hi a, Pathian bang cikcek hi. Huham a neihmi thu tuah lei le van pumpi cu umtikin, cingkhawi hi. Mihing tei sualnak ngaidam le sual a thiantik ceng ten vanhum a Cungnungbel Pathian taklamah khung hi.

Pathian Capa i Thawmngengnak

⁴ Pathian in, a capa lakah min a piakmi cu vancungmi tei min sangin a ngeng saw mi a hih bangin vancungmite sangin cungnung saw in bawl hi.

⁵ Itahim titale Pathian in itih bang vancungmi hihen, “Nang cu ka Capa ci, tuni in, na Pa ah cang zo ing” ti awng ma hi. Mah humah i bang vancungmi hei hihen, “Kei cu a Pa hi tung a, amah cu ka Capa hi tuk hi,” tin ti awng ma hi.

⁶ Mahnaven Pathian in, a catawntil lei humah a tiik ten, “Pathian i vancungmi hempoh ten, amah cu bia haw tuk,” ti hi.

⁷ Mahnaven vancungmi tei thu ah, “Pathian in, a vancungmite cu huihah bawlin, a nadektute cu mei alhin bawl,” ti hi.

⁸ Mahten a Capa i thu ah Pathian in, “Nangmah cu Pathian ci, na kumpi khunnak cu kumkhua in kho tuk hi!

⁹ A dikmi cu deihin, a khialmi cu hua ci. Mah hangin ven Pathian, na Pathian in teng zo hi. Na ngualcam tei lak a piakmi sangin a ngeng saw cuangmi upat lungdamnak pia hi,” ti hi.

¹⁰ “Mahten Topa nangmah in, a pattungin leipi bawlin, na khut loli tuah van bawl ci.

¹¹ Mahte cu lalthong khawng haw tuk naven nang cu a bangleng tuk ci. Amuh cu puan bangin sia haw tuk hi.

¹² Puan bangin hep tuk ci a, silh le cen bangin thekdun khawng haw tuk hi. Mahnaven nang cu a banglengin, na nunnak cu bo tih umma,” ti hi.

¹³ Pathian in, a vancungmi lakah, “Na ngalte na ke nuai ah ka koih laklawh ka taklamah khungin hi,” tin ti awng ma hi.

¹⁴ Mah ahi tale vancungmite cu akua hum? Amuhte cu Pa i nadektu hawvang hi haw in, nunpatnak a ngahnak tuk bawmtu tukin Pathian i nadektute haw hi.