HABAKKUK 3 - Ngawm Bible

Habakkuk Thungetnak

¹ Profet Habakkuk i thungetnak cu hi bangin hi.

² Topa aw, na thil bawlmi thei zo ing, thasiahhuaizet haw hi. Na thil bawlmite cu a thakin, keimu khanah bawlleh zazalin hi. Na thinuk laih vangin keimu humah hehpihnak nei zazalin hi.

³ Pathian cu Edom pen hungleh hi. Pathian thiangtho cu Paran mual pen hung hi. A sunloihnakin vankhuhin, pahcoihnak cu leihumah dim hi.

⁴ A hun ten khuaphelep bangin vak hi. A khut pen khuavak al susulin, mahlai ah a ngilnak cu selkuhin um hi.

⁵ Natnak a mai ah hahin, thihnak cu a nung pen zui tukin thupia hi.

⁶ Amah a cawlh ten leipi hing dudum hi. A mit a zoh bek hei ten miphun hempoh can tawtok haw hi. Kumkhua a khomi mualsangte vang keh khawng haw hi. Khang tuanin, a ummi mual cu nimsuk khawng hi. Tanglaih pepan a zui awng uhmi mualte hi.

⁷ Kushan mite thinsu in, a um haw mu ing. Midian mite vang can tawtok haw hi.

⁸ Topa, luitui in, na thinuktik maw? Tuipi thuanthumin, na thinuktik maw? Nang cu meingo humah khung ci. Na mihing tei nelah nehnak na piak ten, Huihpi cu na cipuhleng hi.

⁹ Na thal cu kau in, na thalcang kap tukin el li ci. Na khuaphelepin leipi cu sukeh hi.

¹⁰ Mual sangpi ten amuh haw ten a lau in, can tawtok haw hi. Van pen tui leih sukin, leinuai a, tuite thum li haw hi. Tuicawk cu sang zetin tho haw hi.

¹¹ Na thalcang de zuzulin, a tul ten le na ceipi al susulin, a let ten, ni le hade cu a umnak mun hawah ding leng haw hi.

¹² Thinukin leipi cu tanpek ci, thinuk zetin miphunte ngawizan ci.

¹³ Mahnaven na mihingte pan tukin tul ci, na tenmi kumpi pan tukin le mipha ngawl tei puitu cu khesukin, a nungzuite cu siatsuah khawng hi ci.

¹⁴ Na thalcangin, a ngalkap bawipa kha hi. Keimah khenkhek tukin huihpi bangin a hun haw ten; a kuhno in mi ca-ngah a bawlsiatu bangin, keimuh nuihsan thahin, hung haw hi.

¹⁵ Na cipuhte tuah tuipi thuanthum na kaltan ten, a nase zetmi tuipi cu phuan cucul hi.

¹⁶ Mah thute ka zak ten lau in can ing, ka mul cu ka lau leita hangin tho khawng hi. Ka pumpi cu phe thei ngawlin ka kete vang ding thei haw ma hi. Keimuh dotu Pathian in, a dantat tuk hun can cu, thinsau zetin ngak tung hi.

¹⁷ Theipi in ngah nei ngawlin, sabit kung pen sabit a ngah ngawl vangin, olif kung a, olif ngahte sia khawngin le lo an a suak ngawl vangin, tuute thi khawngin khui inn alawng khawng vangin,

¹⁸ Ka lungdamin ka thinnop leleng tung hi. Itahim titale Topa Pathian cu keimah pantu pa hi.

¹⁹ Cungnungbel Topa in ngilnak pia hi. Sazuk bangin ka ke khotikin, mualsang humah himdamno in koih hi.