GALATI 1 - Ngawm Bible

¹ Paul in mihing tei samnak le cial thong hangin a dektu hi ngawlin, Jesuh Khrih thihnak pen a tholehtiktu Pa Pathian le Jesuh Khrih i tenmi le tiikmi ing ti hi.

² Galati ngam a um pawlpimi hempoh tei lakah keimah tuah a um langkhattu Khristian unaupih ten nuksat ung hi.

³ A Pa Pathian uh le Topa Jesuh Khrih in hehpihnak le lemdaihnak cu nohte pia tahen.

⁴ Tuhun hi hunsia sung pen ohte luattik tukin Khrih in Pa Pathian i deihnak zui in, ohtei sualnak hangin a nunnak pia zo hi.

⁵ Pa Pathian nelah sunloihnak cu a kumkhua in um leleng tahen! Amen.

Thuthangpha Pa khat

⁶ Khrih i hehpihnak tuah a samtu cu nunghekin Thuthangpha dang na pompaih zen uh ka muh ten lamdang sa mahtak ing.

⁷ Thuthangpha a dang, a um ngangai hangin ka tihnak hi kha ma hi; na lungmu uh a nautiktu le Khrih i Thuthangpha thek tum litu mihing a um haw hangin ka tihmi hi.

⁸ Eimuh hihen, vancungmi hei hihen nangmu lakah ka phuan lih sa uhmi Thuthangpha hi ngawlin thuthangpha a dang hilhtu a um haw tale bawlsiatnak munah heng haw tahen!

⁹ Hilh zo naveng hilh lehleu poh nang inna, na pom sa uhmi Thuthangpha sial ngawl thuthangpha a dang a hilhtu cu bawlsiatnak hellah heng haw hen!

¹⁰ Hitih bangin ka tih ten mihing tei lungkimnak a zei li bang ing maw? Ka tupmi cu mihing tei lungkimpihnak hi ma hi, Pathian i lungkim pihnak saw hi. Mihing tei thangphat tuk zei ing maw? Mihing tei mai ah minphatnak zei ka hi tale Khrih i nadektu hi tuk mang hi.

Khrih i Tiikmi A Cannak

¹¹ U le naute aw, Thuthangpha ka phuanmi hi mihing tei lak pen a piangmi kha ma, tih hi nangmu lakah ka langtik nuammi hi.

¹² Mihing tei lak pen ka ngahmi hi kha ma hi; Mihing kuamah i zilhmi hei kha ma hi. Jesuh Khrih amah in kei ma lakah a phuanmi hi.

¹³ Ka nundan cu thei khawng zo uh ci. Judah biaknak ka zui laihin, Pathian i pawlpi bawlsia i le a cimit tukin heh tin zuam ing.

¹⁴ Judah biaknak zui lamah ka khuk pih lak pen a manbel ing. Ka pu le pa tei daan zui lamah vang a cuangin muantak mi ing hi.

¹⁵ Mahnaven Pathian in, a hehpihnak hangin ka hin laih ngawlin teng zo in, ama nadektu tukin sam hi.

¹⁶ A Thuthangpha cu miphun dang tei lakah phuang thei tukin, a Capa ka lakah a langtik ten mihing kuamah i lakah thu siampih tukin zuan mang hi.

¹⁷ Keima laih ngawlin Jerusalem a um nungzuitu tei lakah hei zuan mang hi. Thakhatin Arabia ngam saw ah hawhin, Damaskas ah kikleh ing.

¹⁸ Kum thum nungten Peter tawk tukin Jerusalem ah hawh ing a, a nelah nipi nih sung cam ing.

¹⁹ A Topa uh i nau James sial ngawl nungzuitu dang kuamah tawk mang hi.

²⁰ Hi tin ka ngatmi hi thuman hi; zolthu kha ma tih cu Pathian amah in thei hi.

²¹ Mah nungten Siria le Silisia ngamah hawh ing.

²² Mahlai takin Judah ngam a, Khristian ten bulpakin thei haw ma laih hi.

²³ “Eimuh a bawlsia litu ten atu-in siatsuah a tummi a upnak uh thu phuang li haw hi,” tin sonmi thei haw hi.

²⁴ Mahten keima hangin Pathian thangphat haw hi.