FILIPI 3 - Ngawm Bible

Dikcangnak Tatak

¹ Thukhupnakah ka hilh nuammi cu, u le naute aw, Topa tuah na pehzom uh hangin lungdam un. Amasa a nangmu lakah ka ngatsami nganleh tuk vang cu poi tisap mang hi. Thu ngangai in titale ngatleh tuk vang cu nangmu ca in nangmuhte a huptu hei na hi saw tuk poh hi.

² Thil pha ngawl a bawltu uico bang mihingte khi ngalling un hi; vunceptalhnak lam a tangtute a hih haw khi!

³ Amuhte hi ngawlin eimuh saw lehlam hi a manmi vunceptalhnak a cotu hi saw hung hi; itahim titale Hawvang i hangin Pathian bia hung a, a nunnak uh cu Khrih Jesuh tuah a pehzop uhnak hangin lungdamnak dim hi. A pualam bawlnak i humah imah muan tuk nei ma hung.

⁴ Mahti bangin a pualam zuinak muang nuam tale a muang thei mi hi bok ing. A kuakua hei in hihen a pualam zuinak muang ing hi tin, a ngaisung tale mahmi pa sangin tam saw sesemin, a ngaisung saw tukmi ing.

⁵ Ni pi khat ka kim ten vunceptalhmi ing hi; suahkehnak lam pen ti lehleu ahin Israel miphun Benjamin hin Hebru sit ing. Judah Daan zuinak lam pen Farasi mi ing a,

⁶ ka thin pulhang zetin pawlpi mite bawlsia ing. Daan zui in midik hih theihnak lamah keimah cu a khial ngawlmi ing.

⁷ Mahnaven hitih bang thil metnakin ka ngaihsutmi hi atu-in Khrih i hangin a venghawngin sunnak lamin ngaisung khawng zo ing.

⁸ Hi thil bek hei kha ma hi; thildang hempoh hei hi ihempoh sangin a sunglawi saw mi ka Topa Khrih Jesuh ka theihnak hangin sunnak tawp khawk, tin ngaisung ing.

⁹ Amah i hangin ihempoh cu vawk khawng ing. Khrih ka co theihnak tukin le amah tuah thiamting zetin ka pehzomdun theihnak tukin ihempoh hi buak bang thongin ngaisung ing. Keima bulin dikcangnak nei lehma toh ing. Atu a dikcangnak ka neihmi cu Khrih upnak hangin piakmi diknak hi; upnak thawmin Pathian lak pen a ngah uhmi diknak hi.

¹⁰ Ka deihmi cu Khrih le a thawhlehnak i cahnak khi tep bokin le a thuaknak le a thihnakah vang telbokin,

¹¹ thihnak pen nunnakah thawhtik lehmi hi bok tukin ka muansanmi hi.

Muitin Lam Zuanin Tai Ing

¹² Hitih bangin ka tih ten, heng tukin ka tuptahnak lamah heng zo ing ka tihnak hi ma hi; cangkim zo ing ka tihnak hei kha ma hi. Khrih Jesuh in ama ca in, a mat ngah zo toh hangin keima ca a koihmi zuam man laksawng co tukin mailamah a nawt li mi ing.

¹³ U le naute aw, mahmi cu co ngah zo ing tin ngaisung hihim mang hi. Ka bawlmi cu pa khat bek hi; ka nunglam a, a bosa mi thil khi phawkngilin, ka mailam a ummi khi a pha tukin hil li ing.

¹⁴ Mah hangin mailamah zuamman laksawng co tukin cam zetin tai li ing. Mahmi laksawng cu Pathian in Khrih Jesuh sung pen kumkhua nung tukin a samnak khi hi.

¹⁵ Hawvang lam pen pasal; a pitingmi ohte hi a venghawng uhin hitih bang lungput a nei ten tukmi hung hi. Mahnaven mi khenkhat ten lungmu ngaihsut dan a dang na nei uh tale mahmi cu Pathian in ciang zetin nangmu lakah langtik tuk hi.

¹⁶ Mahlai ngawl sung cu tuni tian a zui uhmi daante zui in, mailamah hawh ten nung hi.

¹⁷ U le naute aw, ka nundan hi cung leleng un hi. Na zoh tukin nangmu mitmai ah zo cih tuk koih zo ung a, mahmi a zuitute khi zo leleng un hi.

¹⁸ Hi thu hi a laih ngawlin vei tampi hilh ham zo naveng atu-in hitui tuah notleh tung hi; mi tampi cu a nundan haw in, Khrih thinglamtehah thihnak ngalin cang haw hi.

¹⁹ Mahte cu hellah heng haw tuk hi, itahim titale a pathian haw cu amu taksa nopnak bek hi. Zakca tukmi hi haw naven ultunnakin mangleh lam haw, hi leihum a thil bebek ngaisung haw hi.

²⁰ Mahnaven a ngam ngangai uh cu vancung khi hi a, eimuhte a Pantu, Topa Jesuh Khrih vancung pen a hun tuk khi ngak hung hi.

²¹ Amah in imah ngawl a thi thong theimi a taksa pumpi uh hi a sunglawi mi ama pumpi bangin thek tuk hi; mahmi bawlnakin ihempoh ama uknak nuai ah koih theihnak huham mang tuk hi.