FILIPI 2 - Ngawm Bible

Khrih i Niamkhiatnak le Thawmngengnak

¹ Khrih tuah na pehzomdun uhnak hangin na nunnak uh kho cuangin, a itnakin, na lung uh muangtik hi. Hawvang tuah pawlkomnak nei uh ci a, pa khat le pa khat humah hehpihnak nei si uh si maw?

² Mahti bang ahi tale hitih bang hin so nuam ing hi; na ngaihsutnak uh munkhat hen, itdunnakah vang pa khat le pa khat itdun un hi. Na lungmu uhte le na tuptah uhmi ah vang bangten hen na, mahten lungdamnak ka neihmi hi kimtik tuk uh ci.

³ Mi nautat nimnak nei in, mai matan bek ngaisungin le mai minphatnak tuk bek zei in imah bawl pahsuh un hi. Pa khat le pa khat niamkhiat dunnak nei unna, midang sangin pha saw deuh ing tin, itik mah hei ten tidun pahsuh un hi.

⁴ Nangmu deihnak bek hi ngawlin, midang ten amu ca thupibelin, a ngaihsut haw mi khi amuhdan thiam bok un hi.

⁵ Na lungputdan uh cu Khrih Jesuh i lungputdan bangin hihen.

⁶ Khrih cu Pathian hihnak nei leleng hi. Mahnaven Pathian bang tukin tumlo awng ma hi.

⁷ Mah hangin ama lungthono in, a hihnak hempoh zamsanin, umlawh bangin um hi. Mihingah cangin mihing pianzia in piang hi.

⁸ Niamkhiatnak lungmu nei a, Pathian i thu cu zui in, thinglamtehah thihnak tianin thuak hi.

⁹ Mah hangin a sangbelnak munah Pathian in cawisangto a, min hempoh lak pen a ngengbel min pia hi.

¹⁰ Mahti bang a hih hangin Jesuh i min cu upatnak pia in, Vancung a, a ummi hempoh hei in hihen, leihum le leinuai a ummi hempoh hei in hihen, khukdinin,

¹¹ Jesuh Khrih cu Topa hi, tin Pa Pathian sunloihnakin phuang khawng haw tuk hi.

Leihumah Khuavak Bangin

¹² Mah hangin, ka ihmi ngualcamte aw, nangmu lak ka umlaih a, ka thu na man leleng uh bangin le mah sangin a thupi saw laihmi cu nangmu lak ka um ngawl vangin ka thu na zui tuk uh khi hi. Nunpatnak cangkim na ngahnak tukin upat le lauthawng thahno in dek li poh un hi.

¹³ Itahim titale ama tuptahmi deih tukin le nadek suak tukin Pathian cu nangmu sungah nadek hi.

¹⁴ I pawpoh nadeh uhten phuciak li ngawlin le eldun li ngawlin dek un.

¹⁵ Mahtin na hi uh tale, hi leihum a mipha ngawl le misual tei lakah a ummi nohte cu a cangkimmi Pathian cate sual nei ngawl le mithiangin cang tuk uh ci. Van a, aksi vak bangin leihum mitei lakah vak un hi.

¹⁶ Nunnak Thuthangpha phuan laihin mahtih bangin vak un hi. Mahti bangin na hi uh tale, Khrih Ni ten maitainak nei tung a, ka nadehnak le teimak ka suahnak hempoh khi thawnthong a hih ngawlnak langtik tuk hi.

¹⁷ Na upnak uh cu Pathian nelah biakpiaknak bangin na piak uhmi humah, thah tawkin ka nunnak thisan cu leih ahi tale mahmi cu ka lungdamnak hi tuk a, na venghawng uhin ka lungdamnak cu kawmbok nuam ing.

¹⁸ Mahti bang bokin nohte vangin na lungdamnak uh cu keimah kawm bok un hi.

Timote le Epafroditas

¹⁹ Pathian i lungkimnak ahi tale, na thu la uhte ka theih ten tha ngah tung tin muansannak ka neih hangin a ngei ngawlin Timote cu noh tei lakah hawhtik nuam ing hi

²⁰ Amah bek hi ka lungmu theitu le nangmuh sehelhnak a nei tataktu hi.

²¹ Midangte cu amu ca tek ngaisungin, Jesuh Khrih ca imah ngaisung kha sap haw ma hi.

²² Amah cu itihzah muantakmi him tih nangmuh loli in, na theih uhmi hi. Keimah tuah Thuthangpha i hangin nadek langkhat haw tih khi mu zo uh ci.

²³ Mah hangin ka thu le la ah hin iti bangin thu soncatnak um tuk him, tih a cel bek ten amah cu hah tung a,

²⁴ keimah loli nangmu nelah heng palleh thei tung tin Topa muannak tuah um ing.

²⁵ Mahten a nau uh Epafroditas hi nangmu lakah hawhtik kul tin ngaisung ing. Amah cu keimah tuah nadek langkhat le ngaldo langkhatmi ung a,

²⁶ keimah bawm tukin na hah uhmi hi. A nat thu na theih uhmi khi a thinnop ngawlnakah cangin, nangmuh tawk tuk ngakhelzet hi.

²⁷ A na tih thong tuk hei kha ma, thi awndiak hi. Mahnaven Pathian in hehpihin; amah a hehpih bek sial ngawlin keimah vang hehpihin keima lakah lungsiatnak ngeng sesem a heng tukmi pen luattik hi.

²⁸ Mah hangin nangmu lakah ka hawhtik nuamnak hi a, amah na muh uhten na thin uh nop lehin kei ka lungsiatnak vang boleh tuk hi.

²⁹ Amah cu Topa i sungah a unau uh hi a, lungdam thatuino in upatnak pia un hi.

³⁰ Amah bang mihing cu maizahnak pia un. Itahim titale Khrih i ca in nadehnak le nangmuh tei piak theih ngawlmi bopnak khi pia tukin a nunnak hei ngaisung ngawlin nadekin nunnak tian bo awndiak hi.