EZRA 7 - Ngawm Bible

Ezra Jerusalem Ah Heng

¹ Kum ngeizet nung, Artakzaksis cu Persia kumpi a deh ten, Ezra a tihmi pa na um hi. Ezra i pu le pate cu Thiampi Sang Aaron i casuante haw hi. Ezra cu Seraiah i capa hi, Seraiah cu Azariah capa hi, Azariah cu Hilkiah capa hi.

² Hilkiah cu Shallum capa hi, Shallum cu Zadok capa hi, Zadok cu Ahitub capa hi.

³ Ahitub cu Amariah capa hi, Amariah cu Azariah capa hi; Azariah cu Meraioth capa hi.

⁴ Meraioth cu Zerahiah capa hi, Zerahiah cu Uzzi capa hi; Uzzi cu Bukki capa hi.

⁵ Bukki cu Abishua capa hi, Abishua cu Finehas capa hi; Finehas cu Eleazar capa hi; Eleazar cu Aaron capa hi.

⁶ Ezra cu Daan thiamzet hi a, Topa Israel Pathian in, Moses lakah a piakmi Daan thute thei siksek hi. Ezra cu Topa in muicu a piak hangin a ngetmi hempoh kumpipa in pia hi.

⁷ Artakzaksis kumpi a deh kum salih kumin, Ezra cu Babilon pen Jerusalem ah Israel mi le thiampite Levi mite, Biakinn lasatute, Biakinn kongka cingtute le nadektute tuah hawh haw hi.

^8-9 Ha khat ha, ni khat ni-in, Babilon pen tul a, Pathian bopnak hangin Jerusalem cu ha nga ha, ni khat ni-in heng haw hi.

¹⁰ Ezra in, a hun hempoh cu Topa i piakmi Daan zilnak le zuinakin hihen, mah daan le thupiakmite cu Israel mite zilh pepelnak tukin mang hi.

Artakzaksis In Laingatmi Ezra Pia

¹¹ Kumpi Artakzaksis in, a nuailam a laingatmi cu Topa in Israel tei lakah a piakmi daan le thupiakmite a theizettu, thiampi le laithiam zetmi Ezra lakah pia hi.

¹² Kumpi Artakzaksis lak pen Van Pathian i Daan thu a thei siksektu thiampi Ezra lakah,

¹³ ka uk sung khua tihkim a, um Israel mi thiampite le Levi mite, Jerusalem ah a kiknuam hempoh cu na lakah kik thei haw tuk hi, tin thupia ing.

¹⁴ Kumpi keimah le ngaihsutnak a piatu ka mihing salih ten na dehvo tuk a koihmi Pathian i piakmi Daan cu Judah le Jerusalem ah iti bangin zui haw tih zo tukin hah ung.

¹⁵ Israel Pathian, Jerusalem khua Biakinn neitu lakah, keimah le ngaihsutnak a piatu ka mihing salih ten ka piak nuam uhmi sui le ngun hunpih un hi.

¹⁶ Mah hum pen Israel mi le a thiampi ten Jerusalem a, um Pathian Biakinn ca tukin a piakmi haw le Babilon peng sung pen na khopsa mi sui le ngunte vang hunpih un.

¹⁷ “Hi sumpaite cu khuicang, tuucang, tuuno, cangho vam le sabittuite leinak tukin kom zetin mang inna, mah mite cu Jerusalem Biakinn ah biakpiaknak, an biakpiaknak le inmi biakpiaknakin mangin hi.

¹⁸ A tanglaihmi sui le ngun a umlaih tale nangmah le na ngamsung miten a mawi na tihnak uhah le na Pathian uh i deihnak bangin mang thei tuk uh ci.

¹⁹ Biak inn sung nadehnak le Pathian biaknakah man tukin a piak haw mi kuang hempoh cu Jerusalem khua, Pathian nelah pia khawng un.

²⁰ Biak inn man tukin na kulmi dadang a umlaih tale kumpi sumpai sung pen mang thei tuk ci.

²¹ “Kumpi Artakzaksis keimah in, thiampi le Van Pathian i Daan thu a thiamzettu Ezra i a ngetmi hempoh cu manlang zetin pia tukin, Eufrates nitumnak lam peng sung a, um sumpai cingtu hempoh cu thupia zo ing.

²² A ngetmi hempoh cu: ngun talent za khat tian, sangvut seu za luk sawm nga tian, sabittui pung za le sawm nga tian, olif thau pung za le sawm nga tian, ci cu a kulzah pia thei tuk uh ci, tin ti ing.

²³ Van Pathian in, a biakinn ca tukin a kinmi hempoh cu pia khawng tukin hahkhat zetin dek inna, Pathian cu ka humah le ka nungten ngamuktu tei humah ituk mahten a thinuk ngawlnak tukin cingcai zetin dekin hi.

²⁴ Thiampite, Levi mite, lasatute, kongka cingtute, nadektute le hi Biakinn tuah a pehdun mi hempoh lak pen siah le adang khawl mite hihen, lak theihnak nei hihim ma uh ci.

²⁵ Ezra nangmah in, “Na Pathian i piakmi cihnak cu mang inna, Eufrates Nitumnak lam pengah Topa i piakmi daan bangin a nungte uk tukin ngamuktu le thukhentu bawi koih inna, a theih laih ngawl tei lakah hi daan cu zilhin hi.

²⁶ Kua hei in, na Pathian i daan, ahimata ngamsung daan cu a zui ma tale thahin maw, hawlvawkin maw, a thil neihmi hempoh lonsak khawngin maw, thawngkhia in maw thakhatin bawlsiat thuak tuk hi,” ti hi.

Ezra In Pathian Thangphat

²⁷ Ezra in, “Ka pu le pa tei Pathian, Topa cu thangphatin um hen! Amah in, nadekin hi tibangin Jerusalem a um, Topa i Biakinn humah kumpi in upatnak a neih hi!

²⁸ Pathian hehpihnakin kumpi le a ngaihsutnak piatute, thuneizettu a khutnuai bawi tei mitmai pha tawk zo ing. Topa ka Pathian in ngalphatnak pia in, Israel nam sung pen innkua lubel tukmi tampi cu keimah tuah kik tukin lem thei ing.”