EZRA 4 - Ngawm Bible

Biakinn Sak Lungkim Ngawlte

¹ Judah mi le Benjamin mi a huatu ten Topa Israel Pathian i Biakinn sak cu saltannak pen a kikmi ten pan zo haw tih za haw hi.

² Mah hangin Zerubbabel le a hin tek hotu tei lakah hawhin, “Na biakinn sak uh cu bawm tuk ung. Na biak uhmi Pathian cu bia bok tuk ung hi. Assiria kumpi Esarhaddon in hi ngamah um tukin a kuat bek ten a lakah biakpiaknak bawl leleng bok ung,” ti haw hi.

³ Zerubbabel, Joshua le a hin tek hotu ten, “Topa ka Pathian uh i Biakinn saknak tukin noh tei bop kulma ung. Persia kumpi Sairas i thupiak bangin keimuhno in sa tuk poh ung,” tin ti haw hi.

⁴ Mah ngam a um mihing ten Biakinn sa tuk ngawlin le a tha haw nau tukin Judah mite cu thum het haw hi.

⁵ Biakinn sak cawltik haw hen tin Persia cozah bawite cu nawhthuh pia in, a tuptah haw mi bawlsuak thei tuk ngawlin le a lung haw bing tukin kumpi Sairas in, a uksung ngam hempoh le kumpi Darias bawi a deh tianin mahti bangin thilpha ngawl bawl haw hi.

⁶ Kumpi Xerxes bawi a deh ten Judah le Jerusalem a, ummite zuaknak lai cu kumpi lakah pia haw hi.

Kumpi Lakah Laikuatmi

⁷ Persia kumpi Artakzaksis in ngam a uk laihin, Bishlam, Mithredath, Tabeel le a ngualcam pih ten kumpi lakah lai ngan haw hi. Mahlai cu Aramik awn tuah nganin, a sial haw tenleh kul hi.

⁸ Ngamuk bawi Rehum le ngamsung sungta Shimshai ten Jerusalem thu cu kumpi Artakzaksis lakah a nuailam bangin lai ngan haw hi.

⁹ Ngamuk bawi Rehum le ngamsung a, sungta dektu Shimshai le amuh bawmtute, thukhentute le Erek, Babilon le Elam ngam Susa khuasungmi hi a, atu-in bawi a dektute,

¹⁰ mah hum pen mihau le mi ngil Ashurbanipal in, a khua le a ngam haw pen thawnin, Samaria khua le Eufrates Nitumnak lam Ngam a, umtikmi mipi ten mahlai cu ngan haw hi.

¹¹ A laingat haw cu hi bangin hi. Eufrates pen nitumnak lam a, um na sal ten kumpi Artakzaksis na lakah laikuat ung hi.

¹² “Bawipa, na ngamsung mun dadang pen Judah mi hilai ah heng haw a, Jerusalem khua ah umin, hi khua pha ngawl le ngaltho khua cu dinleh haw hi. Khuapi kulh tianglehin, a bul suangphum mite lemleh haw a, ceng pal haw tuk hi.

¹³ Kumpi bawipa, hi khua hi tungdingleh ngangai in, a pangte a tiang ceng ngangai haw tale hilai mipi ten siah pia haw tukma toh hi, na siah khawlmi kiam tuk hi.

¹⁴ Atu-in, Bawipa, na khutnuai ummi hi ung a, na ngamsung a, thupha ngawlte theitik tuk cu ka nadeh uh hi. Siah a piak haw tuk ngawl le na siah kiam tuk cu ka deih uh ngawlmi hi.

¹⁵ Mah hangin na pu le pa tei zammi a thu sialsiahnak laibupi sungah zo inna, mah sungah hi khua hi tumasuan hun laihin, ngaltho mi khua a hi thu le kumpi le ngam uk bawite haksatnak piatu leleng mite haw hi tih cu mu tuk ci. Hi khuasung mite hi uk haksami hi leleng haw hi. Mah hangin pahcuh, hi khua a siatsuah khawngnak haw cu!

¹⁶ Hi khua tungdingleh ngangai in, a pangte a tian ceng ngangai haw tale, kumpipa, Eufrates Nitumnak lam Ngam cu ukleh thei tukma toh ci, tih cu ciang zetin mu ung,” ti haw hi.

Kumpi i Lulhlehnak Lai

¹⁷ Kumpi bawipa in, hi bangin a lai haw lulleh hi. Ngamuk bawi Rehum, ngamsung sungta a dektu Shimshai le Samaria le Eufrates Nitumnak lam a, um amuh bawmtute na khut uh len ing.

¹⁸ “Ka lak a na laikuat uhmi cu awnletin, keima zakin sial haw hi.

¹⁹ Na hilh uh bangin sialsiahnak laibu sungah dongkan tukin thupia ing, a dotkan haw ten tumasuanin, Jerusalem khua cu kumpi a dodaltu, mi langpangtiktu le ngaltho tei umnak hi leleng hi tih cu mu ngangai haw hi.

²⁰ Kumpi ngilzet ten Jerusalem le Eufrates Nitumnak lam Ngam cu ukin, siah le ngam sapnakte na la haw hi.

²¹ Mah hangin thu ka thatleh laklawh a khua haw tundin lehnak nadeh cu cawl tukin thupia un.

²² Zulzau viang ngawlin manlangin, na bawl un. Ka uk sungah thilpha ngawl suahtik sual haw kawn,” ti hi.

²³ Kumpi Artakzaksis laikuat cu Rehum, Shimshai le amuh bawmtu mai ah a sialcelh bek haw ten manlang zetin Jerusalem ah hawhin, a zazalin, a nadeh cawltik haw hi.

²⁴ Tu loli hei in, mahti bang lelengin Biakinn sak cu cawltik zo haw a, Persia kumpi Darias bawi a deh kum nihnak tian imah bawl thei ngawlin cawl haw hi.