EZRA 1 - Ngawm Bible

Sairas In Judah Mi Kiktik

¹ Persia kumpi Sairas in kumpi a deh kum khatnakin, profet Jeremiah mangin Topa i thuhilhmi kimtik tukin, a ngamsung hempoh tei ngingzet sial tuk thusuahin kuat hi. Topa in, Persia kumpi Sairas lungsungah lainganin, piangtik hi.

² A thusuahmi sungah hi bangin ngan hi: “Hi thu hi Persia kumpi Sairas i thupiakmi hi. Topa, Van a Pathian in keimah cu leihum buppi uktu tukin bawl zo a, Judah ngam Jerusalem khua ah ama ca in biakinn sa tukin dehvo pia hi.

³ Pathian cu a mihing na venghawng uh i humah um zal tahen. Judah ngam Jerusalem khua ah kik unna, Jerusalem a, um Pathian, Israel i Topa Pathian biakinn cu saleh un.

⁴ Topa i mihing sungah hih saltannak pen kik tukin bop kul mite cu a innnel ten bawm ten haw hen. Sui le ngun, an le van puatu ngan le Jerusalem khua pen Pathian lakah a piak tukmi biakpiaknakte vang bawl haw hen,” ti hi.

⁵ Judah mi le Benjamin mi innkua hotute thiampi le Levi mite le Topa in Jerusalem pen Topa i Biakinn sa tukin a lungmu haw a thawhtikmi hempoh cu hawh tukin tuangtim haw hi.

⁶ A innnel ten na tampi pia in, a piak haw mi nate cu ngun kuangte, sui, an, thil puatu ngan, adang na manphate le biakinn a, biakpiaknak a man tuk mite hi.

⁷ Kumpi Nebuchadnezzar in Jerusalem pen la in, a pathian tei biakinn sung a koihmi kuang le khuatte cu kumpi Sairas in, a lak hawah pialeh hi.

⁸ Hi khuat le kuangte cu Judah uktu bawi Shehbazzar ca tukin kumpi na cingtu upabel Mithredath i bawlmite hi. Sairas in mah khuat le kuangte cu Mithredath lakah pia hi.

⁹ A piakmite cu a nuailamte cu na hi. Biakpiaknak ca in sui kuang sawm thum, Ngun kuang thawng khat, Ngun kuang dadang sawm nih le kuah,

¹⁰ Sui kuang sawm thum, Ngun kuang neu za li le sawm, Kuang dadang thawng khatte hi.

¹¹ A venghawngin sui le ngun kuangte, khuat le beel dadang tuah thawng nga le za li hi in, Babilon pen Jerusalem ah a kih haw ten Sheshbazzar in kihpih hi.