EZEKIEL 9 - Ngawm Bible

Jerusalem In Dantatnak Thuak

¹ Pathian in nging zetin, “Hung un, hi khuapi a bawlsiatu tuk noh mihingte, na hiamnam uh hunpih un ti hi.”

² Thakhatin, Biakinn saklam kongka pualam pen mihing pa luk cu hiamnam cawi tekin tul haw hi. A lak hawah puan pa dildelno a silhmi mihing pa khat umin, laingatnak cawi hi. A venghawng haw in daal biaklandawh elah ding haw hi.

³ Israel tei Pathian um hi tih langtiktu, a de zetmi vaknak cu, a um sa mi Cherubim ngamsa nung tei lak pen kaito in, Biakinn kongkhah lamah thawn hi. Topa in, laingatnak cawi in, puan ngo pa dildelno silhtu lakah,

⁴ “Jerusalem khuapi mun hempoh ah hawh inna, thasia le lungnop ngawlin a umtu hempoh tei calah sialsiahnak khenin,” ti hi.

⁵ Topa in, midang tei lakah, “Amah cu khuapi sungah zui unna, mi na that un. Kuamah khawih pahsuh unna, hehpih pahsuh un.

⁶ Putekte, tangvalte, khanglaite, nupite le naupangte vang that khawng un. Mahnaven a calah sialsiahnak a neite cu kuamah tawngkha pahsuh un. Ka Biakinn pepan un” tin, a tihmi za ing. Mah hangin Biakinn a ding hotu tei lak pepan haw hi.

⁷ Pathian in, a lak hawah, “Biakinn cu nawngkaitik un. A inntualte miluang dimtik un. Manlangin pan un,” ti hi. Khuasung mite cu that haw hi.

⁸ Mahtibang mi a thah lih haw laihin, Keimah bek um ing. Lei ah bokkhupin, “Cungnungbel Topa Israel ngam sungah a tang calamte nangawn that khawng tuk tianin maw Jerusalem humah na thin a uk?” tin nase zetin au ing.

⁹ Pathian in, “Israel le Judah miten mullinghah sualnak bawl haw hi. A ngamsung khua le ngam hempoh ah mi thatin, a khuapi haw Jerusalem cu sualnak tuah dimtik zo haw hi. Topa in, a ngam uh nunghekin, a bawl uhmi vang mu sapma ti haw hi.

¹⁰ A hum hawah hehpihnak nei tuk mang. Midang tei humah a bawl haw bangbokin, a hum hawah bawl tung,” ti hi.

¹¹ Mahten lai ngatnak cawi in, puan padildelno a silhtu cu kiklehin, Topa i lakah, “Na thupiakmi bangin bawl khawng zo ing hi tin hilh hi.”