EZEKIEL 8 - Ngawm Bible

Ezekiel In Pathian A Muh Vei Nihnak ( 8:1-10:22 ) Jerusalem Ah Milim Biaknak

¹ Sal ka tannak uh kum luk kum, ha luk ha, ni nga ni-in, sal mat Judah mi hotute cu ka innah khungin thuson ung. Thakhat thu in, Cungnungbel Topa i khut cu a huham tuah ka humah heng hi.

² Ka zoto le mei bangin mihing pian bang mu ing. A tai nuailam cu mei bang hi; a tai humlam cu nawt ciangmi daal bangin de hi.

³ Khut bangkekin keimah sawkin, ka sam pen man hi. Pathian i hawvangin huih lakah cawi in, Jerusalem ah koih hi. Pathian a thinuktiktu milim a koihnak haw Biakinn saklam kongkhah sunglam kongka ah hawhpih hi.

⁴ Mahlai Khebar Ngunpi mawkah ka umlaihin, ka muhmi, Israel Pathian i umnak mun hi tih langtiktu, a de zetmi vaknak mu ing.

⁵ Pathian in, “Mihing pa, Ezekiel aw, saklam zo hemin ti hi!” Ka zoto le Pathian thinuktiktu milim cu kongkhah el a, biaklandawhah umin mu ing.

⁶ Pathian in, “Mihing capa, hi a bawl haw mi hi mu cim? Ka mun thiangtho pen a khawlanakah keimah a hawlvawk pepeltu, Israel tei bawlmi ningdelhhuai nate hi zo hemin! Hi sangin a ningdelhhuai sesem mu tuk ci,” ti hi.

⁷ A pualam inntual tumnak kongkhahah hawhpihin, pang awng pa khat keimah lak hi.

⁸ “Mihing pa, Ezekiel aw, hilai pen pang keulet hemin ti hi!” Ka keulet le kongka pa khat mu ing.

⁹ “Tum inna, mahlai a, ningdelhhuai a bawl haw khi zo in ti hi!”

¹⁰ Ka tum le ka zoh ten pang humah ngulzukte, a dang ngamsa thiang ngawl zuk a suai haw cu mu ing.

¹¹ Mahlai ah Israel hotu upa sawm salih um haw in, Shafan i capa Jaazaniah vang tel bok hi. Namtui halnak kuang cawi tek haw in, namtui a halmi haw pen meikhu kaito ngut hi.

¹² Pathian in, “Mihing pa, Ezekiel aw, Israel hotu ten khuathim sungah a bawlkuh haw mi mu a cim? Khan pa khat sungah a dimin ummi milim bia li haw! Amuh ten, ‘Topa in mu sapma poh! A ngam uh nunghek zo ti haw hi.’ ”

¹³ Topa in ka lakah, “Hi sangin a nawngkai saw a bawl haw mi mu tuk laih ci,” ti hi.

¹⁴ Mah hangin Biakinn saklam kongkhahah hawhpihin, numei ten a pathian haw Tammuz a thih hangin a kah lih haw lak hi.

¹⁵ Topa in, “Mihing pa, Ezekiel aw, hihi mu cim? Hi sangin a ningdelhhuai saw mu tuk laih ci,” ti hi.

¹⁶ Biakinn sunglam khanah hawhpih leleu. Mahlai ah Topa i inn thiang kongka el biaklandawh le inntual laklawhah mihing sawm nih le pa nga um haw hi. Mun thiangtho cu nunghek sanin, ni suahnak lam hekin, kun haw in, a suak limi ni cu bia haw hi.

¹⁷ Topa in, “Mihing pa, Ezekiel aw, hi khi mu cim? Hi Judah miten hi na muhmi ningdelhhuai a bawl haw hum pen a ngamsung haw muntihkimah thisan luannak zaitik pepel haw naven, a thincim haw ma laih. Biakinn sung loli ah hungin a bawl haw hangin ka thinuk dedeuh hi. Iti zahin mitkem hahin kaw kei a zotsak haw hi zo tehin! A naal hawah thingkakte khaih haw hi.

¹⁸ Ka thinuknak nase zetin thuak haw tuk hi. Kuamah khawih tuk mang, hehpih tuk mang. Ka lakah a aw neih tawp haw tuah thungenin, au haw tuk naven theihsak tuk mang,” ti hi.