EZEKIEL 2 - Ngawm Bible

Ezekiel Samnak

¹ Mahmi ka muh ten lei ah bok ing a, aw pa khat za ing, mah aw cu, “Mihing pa, Ezekiel aw dingin hi. Na lakah thu hilh tung,” ti hi.

² Mahtibang a ot laihin, Pathian i hawvang ka sungah tumin, dingtik hi. Mah aw in,

³ “Mihing pa, Ezekiel aw nangmah cu Israel tei lakah hah tung. A pu le pate haw bangin ngal tho in, keimah langpang haw a, tutian ngal hi haw laih.

⁴ Mi lunglian a hih haw hangin keimah upat tuk vang thiam haw ma; mah hangin Cungnungbel Topa keimah in, a lak hawah ka ot nuammi hilh tukin hah tung.

⁵ Hi ngaltho phun ten na thuhilhmi a ngai vang, a ngai ngawl haw hei in, a lak hawah profet um hi tih bek thei haw tuk hi.

⁶ “Mihing pa, Ezekiel aw, amuhte hihen, a ot haw mi cu lau pahsun. Nangmah langpang haw tuk a, ling le so le micik thei aikam tei lakah um bang tuk ci. Mahnaven hi ngalthote cu lau pahsun; a otmi haw hei lau pahsun.

⁷ A ngai haw vang, ngai haw ngawl hei in, a lak hawah hilh tuk ka tihmi cu hilhin hi. Amuhte cu keimah ngaltute haw tih cu cing lelengin hi.

⁸ “Mihing pa, Ezekiel aw, ka thuhilhmi cu ngai in hi. Amuhte bangin langpang pahsun. Na kamka inna, ka piakmi cu ei in,” ti hi.

⁹ Khut pa khatin keima lamah zakin, mah khut sungah laizial um mu ing.

¹⁰ Khutin laizial cu phalhin, a sunglam le a pualam tuah laingatmi cu khaw-ngaihnak le kahnak thu mu ing.