EZEKIEL 1 - Ngawm Bible

Ezekiel In Pathian Amuh Masabelnak ( 1:1-7:27 ) Pathian Khunnak

¹ Ka kum, kum sawm thumnak ha li ha, ni nga ni-in, keimah thiampi Ezekiel, Buzi i capa cu Babilon ngam Khebar Ngunpi elah sal matmi Judah mite tuah um ung. Van cu hongin, Pathian i lakmi mu ing.

² Mah kum cu kumpi Jehoiakhin sal a mat haw a kum nganak hi.

³ Babilon ngam Khebar Ngunpi el pen Topa in ka lakah a otmi za ing a, a huham vang thei ing.

⁴ Ka zo le saklam pen huihpi hung tih cu mu ing. Meingo sahzet sung pen khuaphelep zawzokin, a elkimte cu vak susul hi. Mah khuaphelep zawnah daal bangin a de mi mu ing.

⁵ Huihpi laizangah a nungmi ngamsa bang, mihing mel bang pa li mu ing a;

⁶ mai pa li le ha pa li nei tek haw hi.

⁷ A ke haw cam zetin, a tinte cu khuicang tin bang hi, de zetin nawtmi daal bang hi.

⁸ Mai pa li le ha pa li ten nei tek haw in, a ha haw nuai ah mihing khut pa khat ten nei haw; mahten pa khatin khut pa li ten nei haw hi.

⁹ Mah ngamsa pa khat tekin, a ha pa nih ten phalhin, kil li nei a tung le a vang cankimin, a ha lek cu tawngkhadun khawng haw hi. A thawn haw ten a taksa pum hel kul ngawlin a honpi in thawn haw hi.

¹⁰ Ngamsa nung pa khatin, mai phun dadang pa li ten nei haw hi. A mailam cu mihing mai, taklamah kiosa mai, veilamah khuicang mai nei in nunglamah muvanlai mai nei hi.

¹¹ Ngamsa nung pa khatin, a ha pa nih ten phalhin, mahten ngamsa dang tei ha lek tawngkha ten haw hi. A ha pa nih haw cu phalh ngawlin a taksa hum hawah khup haw hi.

¹² Ngamsa nung pa khatin mun li ten hekin, mahten a pumpi haw hel lih kul ngawlin a nuamnak hawah a honpi in hawh thei haw hi.

¹³ Mah ngamsa nung tei lakah meiling vam bang a al zawzokmi umin, amah cu cawlngawlin thawn leleng hi. Mah meiling vam sung pen khuaphelep bangin a al zawzokmi tul hi.

¹⁴ Mah ngamsate cu khuaphelep bangin nunglam le mailamah manlangzet dawk haw hi.

¹⁵ Mah ngamsa pa li cu ka zoh lih laih takin ngamsa pa khat elah lengke pa khat ten, lengke pa li lei tawngkha in mu ing.

¹⁶ Mah lengke pa li cu bangten haw hi; suang manpha bangin de haw a; mah lengke sungah lengke dang pa khat cam zetin, a tan zawngin, a tummi na um ten haw hi.

¹⁷ Mah hangin lengke cu a nuamnak hawah hel thei haw hi.

¹⁸ Lengke tei a mawk kual cu sah zetin mit ngeh dim hi.

¹⁹ Ngamsa nungte cu a thawn haw ten lengkete vang kaito bok haw hi.

²⁰ Ngamsa nungte cu amu nuamnak tekah a hawh haw bangin lengkete vang hawh bok haw; itahim titale ngamsa ten a uk haw hangin hi.

²¹ Mah hangin ngamsa nungte a hawh haw ten hihen, a din haw ten hihen, huih lakah a kai haw ten hihen, lengkete vangin cung khawng bok haw hi.

²² Ngamsa tei lu humah a lamdang zetin, a ngomi humkhuh ngengzet um hi.

²³ Mahmi nuai ah ngamsa nungte cu ding haw hi. A ha pa nih cu a ngualcam ngamsa tei lamah phalhin, a dang ha pa nihin, a taksa pum khuh haw hi.

²⁴ A ha zah nging cu tuipi thum aw bang haw hi. Ngalkap sialcelh ngawl tei thawm bang hi a, Cungnungbel Pathian aw nging bang hi. A len ngawl ten a ha cu khup haw hi.

²⁵ Mahnaven a lu hum a ummi humkhuh pen thawmnging cu thang leleng hi.

²⁶ Mah humkhuh kum humah suang manpha de tuah bawlmi kumpi khunnak bang um hi. Mah humah a khungtu cu mihing pianzia keng hi.

²⁷ Mah pianzia cu mei sungah a vakmi daal vam bang hi. A elkim hempoh cu vak zetin al hi.

²⁸ Uical bangin pianzia phunkim nei in, vaknak cu Topa i umnak langtiktu hi.