Esther 7 - Ngawm Bible

Haman That Haw

¹ Kumpipa le Haman cu an ei tukin Esther lakah,

² a vei nihnak hawh haw hi. Sabittui in haw a, kumpipa in, Esther cu, “Atu-in, kumpinu Esther, na deihmi cu hilh inna, pia tuk poh sing. Ka ukmi ngam a lang ahi hei in pia tuk poh veng,” ti hi.

³ Kumpinu Esther in, “Maw kumpipa niamkhiatnak tuah ka ngetmi na pia tuk ahi tale, ka nunnak le ka miphun tei nunnak hi, hu khawih sak zalin, tih ngen ing.

⁴ Ka miphunte le keimah hi that khawng tukin suam litu um haw; kohte cu siatsuah khawng le cimih khawng tukmi hi toh ung. Sal i zuak tuk bek ka hih uh ahin cu kumpipa simsial ngawlin daidenno in, um tuk nave ung, atu cu mahti bang kha ma hi, ka ci uh mit khawng tatak tuk ung,” ti hi.

⁵ Kumpi Xerxes in, “Mahtibang a bawl ngamtu cu akua kaw? Ilai ah kaw a um?” tin, Esther cu dong hi.

⁶ Esther in, “Keimuh a langpangtu le a bawlsiatu cu hi mi ngilo Haman hi,” ti hi. Mahlai takin Haman cu kumpi pa le kumpinu mai ah a tihnak tuk theih ngawlin, cantawtok li thong hi.

⁷ Kumpipa a thinuk leita hang dingto in, pualeu lam a huanah hawh hi. Kumpipa in khawih tukma tih cu Hamanin thei kiuhkeuh leng zo hi. Mah hangin a khunnakah khungin, a nunnak hup tukin kumpinu Esther cu ngen hi.

⁸ Kumpipa cu huan pen an eihnak khansungah a tumleh ten, hehpihnak ngen thahin, Haman cu Esther i khunnak humah vawkdun lok hi. Kumpipa in, “Hi pa hi ka innsung le ka maicang hihim pen kumpinu mat tum maw ikaw?” tin au hi. Kumpipa i ot ceng laihngawlin amah cingtu ten Haman i mai cu khuh haw hi.

⁹ Amu lak pen Harbonah in, “Kumpi bawipa i nunnak a hup suaktu Mordekai khainak tuk tin, Hamanin, a innah khai hupnak vang bawl khawng zo pah cuh. Mah khai hupnak cu pi sawm salih le pi nga sang,” ti hi. Kumpipa in, “Mahlai ah Haman cu khai un,” tin thupia hi.

¹⁰ Mah hangin Haman cu Mordekai thahnak tukin a bawlmi khai hupnakah khai hum haw hi. Kumpipa i thinuknak cu damleh hi.