EFESA 1 - Ngawm Bible

¹ Pathian i lungkimnak bangin Khrih Jesuh i kamtai keimah Paul in Efesa khua ah a ummi Pathian i mite, Khrih Jesuh tuah na pehzop dunnak uhah muantakin, a nungmi, nangmu lakah hilai hi kuat ing.

² A Pa uh Pathian le a Topa uh Jesuh Khrih in hehpihnak le lemdaihnak pia zal tahen.

Khrih Lak Pen Hawvang Thupha

³ A Topa uh Jesuh Khrih tuah a pehzop dunnak uh i hangin vancung a, hawvang thupha a phunkim cu eimuhte pia hi.

⁴ Hi leipi a bawl pat laih ngawl hei in, Pathian in ohte hi Khrih tuah a pehzopnak uh hangin ama mai ah mi thiangtho le sual nei ngawlmi hi tukin amata in teng zo hi. A itnak i hangin,

⁵ Pathian in Jesuh Khrih sung pen a cate hi tukin tumtah zo hi. Mahmi cu a lungdammi le a tuptahmi hi.

⁶ Pathian cu a sunglawimi a hehpihnak le a itmi a Capa i sung pen laksawng a piaknak i hangin thangphat hi tahen.

⁷ Itahim titale Khrih i thisan i hangin a sualnak uh cu zahin, a luatmi hi zo hung hi. Pathian in, a hehpihnak cu eimu lakah tam zetin, a piak hangin,

⁸ a hehpihnak cu ngeng mahtak thong si maw!

⁹ Pathian in, a cihnak le a thukmi a thutheihnakin, a tuptah sami cu bawlsuakin, Khrih sung pen kimtik a nuammi a thu-ip cu oh tei lakah langtik zo hi.

¹⁰ Huncan a kim ten Pathian in cangkimin, a bawl tummi cu vanah hihen, lei ah hihen, bawlmi thil hempoh hi hulawm khawngin, Khrih cu lubelin koih tuk khi a tuptahmi hi.

¹¹ Ihempoh hi Pathian ama tuptahsa le soncat sa bangin kim khawng hi. Khrih tuah a pehzop dunnak uh thawmin a mihing hi tukin Pathian in teng zo hi, Mahmi cu ama tuptahmi, a pattungin khau a khihsami hi.

¹² Mah hangin Khrih sungah muansannak a nei masabeltu oh ten Pathian nelah sunloihnak pia nung hi.

¹³ Nangmu lakah nunpatnak a hentu Thuthangpha a manmi thuthang cu na zak uhten nangmuh vang Pathian i mihing bok uh ci. Khrih sungah um uh ci a, Pathian in amata na hihnak uh langtiknakin nangmu humah melciknak pia hi; mahmi melciknak cu pia tukin a tepsami Hawvang Thiangtho khi hi.

¹⁴ Pathian in, a mitei lakah a tepsami ngah loli tuk hung tih langtiknakin, mah Hawvang Thiangtho cu thutepnak na hi. Mihing tei lakah luatnak cangkimin pia tuk tih a theihciannak uh hei hi bok hi. A sunloihnak cu thangphat hi tahen.

Paul i Thungetnak

¹⁵ Topa Jesuh na upnak uh le Pathian i mitei hum a itdunnak na neih uh ka theih pat tung pepan,

¹⁶ Nangmu hangin Pathian nelah lungdam thu hilh tawp awng mang hi. Ka thungetnakah phawkngil hihim mang.

¹⁷ Mahten a Topa uh Jesuh Khrih i Pathian a sunglawimi a Pa uhin, nangmu lakah Hawvang pia zazal tukin ngen ing. Mah Hawvangin theiciangtik tuk a, Pathian cu nangmu lakah langtik bok tuk hi. Mahten Pathian cu thei tuk uh ci.

¹⁸ Iti bang muansannak nei tukin kaw nohte samin, a mihing tei ca in, a tepsami cu iti bang nalamdang him!

¹⁹ Amah a umtu tei sungah na a deh theihnak huham cu itih zahin ngeng kaw tihvang khi mu thei tukin le a vaknakte na muh theihnak tukin na lungmu uh awngtik zal tahen tin, a lakah thungen ing. Eimu sung a ummi ngilnak cu,

²⁰ Khrih thihnak pen a thawhlehtik nungten vancung khua a taklamah a khungtiktu cu Pathian i cahnak huham leleng khi hi.

²¹ Mahlai ah Khrih cu uktu hi in, vancung a uktu dangte le thuneitu dadang hihen, huhamnei dangte hei hihen, a hum hawah Khrih cu thuneitubel hi. Hi lei humah hihen a hengleh tukmi leihumah hihen thuneitu hempoh tei humah Tobel hi.

²² Pathian in Khrih i ke nuai ah ihempoh koihin, thu hempoh ah pawlpi i lu in, Khrih cu koih hi.

²³ Pawlpi cu Khrih i pumpi hi; mah hangin pawlpi cu ihempoh a cangkimtiktu Khrih i pumpi hi.