DANIEL 9 - Ngawm Bible

Daniel In A Miphun Tei Ca Thungen

¹ Ahasueras i capa Media mi Darias in Babilon ngam uk hi.

² Kumpi a deh kum khatnakin laibu thiangthote sial ing a, Topa in profet Jeremiah lakah a hilh hamsa bangin Jerusalem cu kum sawm salih sung siatsuahin um tuk hi tihmi thu cu ngaisung li ing.

³ Topa Pathian nelah lungmu tatak tuah ancang thungen ing a, thangkhau puan silhin, vut lakah khungin ngen ing.

⁴ Topa ka Pathian lakah thungenin ka mihing tei sualnakte phuang ing. Keimah in, “Topa Pathian, nang cu a maksanmi ci, upat ngangai ing. Na thutepmi humah muantakzet hi ci, nang a deihtu le na thukham a zuitu humah a khomi itnak nei ci.

⁵ “Kohte cu sual zo ung, mi suaksualte hi ung, khelhnak a bawltute ung. Ka thupiak bangin zui ngawlin, na thupiakmi cu lawlin, thudik pen lampial zo ung hi.

⁶ Na minin ka kumpi uhte, ka uktu uhte, ka pu le pa uhte le ka miphun venghawng tei lakah na profet ten thuhilh haw naven na nadektu tei thu cu ngai nuam ma ung.

⁷ Topa aw, nangin, a dikmi bawl leleng navecin, kohten ka hum uhah zahcaknak bebek hengtik ung. Judea, Jerusalem khua a khawla le a nainak mun hempoh ah khenkhekmi Israel mi hempoh ka venghawng uhin mualpho khawng zo ung hi.

⁸ Ka kumpi uhte, keimuh uktute le ka pu le pa uhte cu zahcakhuai le ningdelhhuai in nung haw in, Topa, na humah sual zo ung.

⁹ Na humah langpang phun ka hi uh hei in, kohte cu ngaidamin hehpih ci.

¹⁰ Topa kohtei Pathian, na profet tei lak pen na piakmi na daante bangin nung tukin hilh li navecin ngai nuam cuang ma ung.

¹¹ Israel mi hempohin, na daante cu siatsuahin, na thungai ma ung. Mahti bangin na humah ka sual uh hangin na sila Moses i Daan sung a ummi tamsiatnakte cu ka hum uhah hengtik ci.

¹² Keimuh le ka uktu tei humah hengtik tung na tihmi cu hengtik ngangai ci. Leihum khua dangte sangin Jerusalem cu nase saw deuhin bawlsia ci,

¹³ Moses Daan sung a ummi bawlsiatnak hempoh cu ka hum uhah hengtik khawng ci. Mahtibang hi leng napi in, Topa aw, ka Pathian, ka sualnak uh sikkikin le thudik zui in, na lungdamtik tuk tum ma laih ung.

¹⁴ Topa ka Pathian in, a dikmi na bawl leleng hangin le na thu ka ngaih nuam uh ngawl hangin keimuh bawlsia tuk tumin, na tum bangin bawlsia tatak ci.

¹⁵ “Maw Topa kohtei Pathian na cahnak le na huham langtik inna, na mihingte Izipt ngam pen tultik ci a, na huham cu cing leng haw laih hi. Sual zo ung, khial leita zo ung.

¹⁶ A bosa hun sungin nang cu kohte pantu hi leleng ci, mah hangin Jerusalem humah na thinuk zal toh pahsun. Jerusalem cu nangma khuapi le na mual thiangtho hi. Keimu sual hangin le ka pu le pate a sual haw hangin a elkim ngammi hempoh ten Jerusalem le na mihingte cu nautat haw hi.

¹⁷ Maw Pathian aw, ka thungetnak le ka ngetnakte hi hu theihsak zalin hi. A sia khawng zomi na Biakinn cu masa laih bangin tungdingleh inna, Pathian ngangai na hihlam cu thei haw tuk hi.

¹⁸ Maw Pathian aw, hu ngai zalin hi. Zo inna, haksatnak ka tawh daan uh le na minputu khuapi in haksatnak a tawh daan hi muhsak zalin hi. Thudik ka bawl uh hang hi ngawlin nang cu mi hehpihtu na hih hangin na lakah thungen ung hi.

¹⁹ Topa, hu thei in hi. Topa ngaidam zazalin hi. Topa ngai inna, bawlsak zalin hi! Mi hempoh ten Pathian na hih daan hi a theihnak haw tukin khuanu toh pahsun! Hi khuapi le mihingte hi nangma tahaw hi.”

Gabriel In Hilhciang

²⁰ Ka sualnak le Israel tei sualnak phuangin, thungen leleng ing, ama Biakinn thiangtho cu masa laih bangin a tundin lehnak tukin Topa Pathian lakah catngawlin ngen ing.

²¹ Mahti bangin thu ka nget laihin, ka muhsa mi Gabriel cu ka umnak munah leng hi. Taklam biakpiaknak bawl hun hi.

²² Gabriel in ka lakah, “Daniel, hi thu na theih thiamnak tukin nangmah bawm tukin hung ing.

²³ Pathian lakah na nget ten amah in donleh hi. Nangmah cu it hi, mah hangin mah thuhilh tukin hung zo ing. Na umnak i sullam ka hilhcianmi hi phano in ngai in hi.

²⁴ “Sualnak le phatngawlnak pen na mihingte le na khuapi a luatnak tukin Pathian in kum sawm salih i let salih teksa zo hi. Sualnak cu ngaihdam hi tuk a, diknak cu kumkhua khohtik tuk hi, a hilhsami le na muhmite cu heng ngangai haw tuk a, Biakinn thiangtho cu a thakin, thianthohtik hileh tuk hi.

²⁵ Hi thu hi phano in cing inna, komno ngaisungin hi. Jerusalem tungdingleh tukin thupiak hun a hih hangin Pathian i tenmi hotu a hen laklawh kum salih i let salih phat tuk hi. Jerusalem cu lampi ngengpi le kulhtian khozet tuah tundinleh hi tuk a, kum sawm luk le kum nih i let salih sung ding tuk hi; mahnaven hi hun cu haksatnak le buainak hun hi tuk hi.

²⁶ Mah hun a bo ten Pathian i tenmi hotu cu dik ngawl zetin that haw tuk hi. A ngil zetmi ngamuktu i ngalkap ten khuapi le Biakinn cu siatsuah khawng haw tuk hi. Tuihautung bangin a tawpnak hun heng tuk hi. A ngil zetmi ngamuktu i ngalkap ten khuapi le Biakinn cu siatsuah khawng haw tuk hi. Pathian i vaihawm sami ngal le siatsuahnakte heng tuk hi.

²⁷ Mah ngamuktu bawi in kum salih ca in mi tampi tuah lungkimnak laikhet bawl tuk a, mah hun a lang a bo ten piaknak le biakpiaknakte cu botik tuk hi. Ningdelhhuai mullinghah cu Biakinn sung mun sangbelah koih hi tuk a, mahlai ah a koihtu ten Pathian i tuptah sakmi a tawpnak a tawh laklawh mahlai mun sangbelah um leleng tuk hi.