DANIEL 6 - Ngawm Bible

Kiosa Tei Khumnak Sungah Daniel

¹ Darias in, a ngam buppi uktu tukin ngamkhen uktu bawi za le sawm nih koih hi.

² Mah bawite zotu le hotu tukin bawi upa pa thum koihin, mah lak pen Daniel cu pa khat hi bok hi; ngamkhen uktu bawi za le sawm nih cu a khutnuai ah um haw hi. Amuh ten kumpi ca in thil thupi le a kulmite vaihawm haw hi.

³ A ngei ngawlin Daniel cu hotu a dang pa nihte sangin le ngamkhen uktu bawi dangte sangin a nadeh pha saw tih cu lang hi. Midang sangin a cuangcung saw deuh hangin kumpi in, a ngam buppi uktu tukin Daniel cu ngaisung hi.

⁴ hotu dang pa nih le ngamkhen uktu bawi ten Daniel in sualnak le khelhnak nei maw tih cu zei haw hi, mahnaven a sualnak mu haw ma hi, itahim titale Daniel cu mifel muantakzet a hih hangin, thil sual le muantak ngawl imah bawl awng ma hi.

⁵ Amuh le muh cu, “A biaknak thu tih ngawl Daniel sual a not theihnak tuk uh imah mu tukma ung,” tin tidun haw hi.

⁶ Mah hangin kumpi tawk tuk hawh haw in, a lakah, “Darias kumpipa, na nunkhua sau zal tahen!

⁷ Na ngam buppi uktu bawite, hotute, ngamkhen uktu bawite, ngamkhen uktu bawi bawmtute le bawi dadang ka venghawng uhin, thinkhat zetin thil pa khat ngen ung hi. Thupia inna, na thupiakmi bangin a zui khawng hawnak tuk vaihawmin hi. Ni sawm thum sung kuamah in kumpipa nangma lakah sialngawl iti bang pathian, akua bang mihing lak hei ah thungenin le ngetmi dang nei pahsuh hen. Hi thupiakmi a zui ngawltu cu kiosa khumnak sungah vawk hihen.

⁸ Kumpipa nangmah in thusuah inna, na min khenin hi. Mi hempoh i zui khawng tukin vaihawmin hi; kuamah i thek theih ngawlmi, Media mi le Persia mitei daan bawlmi in suak hen, tin ti haw hi.”

⁹ A tih haw bangin Darias in thupia in, a thupiakmi humah a minkhen hi.

¹⁰ Kumpi in, a min khen zo tih Daniel in, a theih ten a innah pin hi. A inn humta khanah Jerusalem lam hekin tukvelh um hi. Mahlai ah a bawl leleng bangin a hongmi tukvelh pa khat elah a khukdinin ni khatah vei thum Pathian nelah thungen hi.

¹¹ Daniel in, Pathian nelah thungen leleng hi tih cu amah huatu ten amuh haw ten,

¹² Daniel sual nawn tukin a venghawng haw in, kumpi lakah hawh haw hi. Amuh ten, “Maw kumpipa, tu pepan ni sawm thum sung kumpipa nangmah lakah sialngawl kuamah in iti bang pathian le mihing lak hei ah thungenin le ngetmi dang nei ma hen tin thupia zo ci tin ti haw hi.” Kumpipa in, “Hi zuh hi, kuamah i el theih ngawl thupiakmi hi. Kua ma thek theih ngawlmi, Media le Persia mitei daan suahmi,” ti hi.

¹³ Amuh ten kumpipa i lakah, “Judah ngam pen sal matmi pa khat Daniel in kumpipa nangmah upat ngawlin na thusuahmi vang zui ma hi. Nisialin, ni khat vei thum thungen hi,” tin ti haw hi.

¹⁴ Mah thu cu kumpi in, a zak ten thinnop ngawlzet umin, Daniel pat theihnak tuk lampi a phunkim zei hi. Thalengin, zei naven a hup theihnak lampi mu ma hi.

¹⁵ Daniel suamtute cu kumpi lakah hungin, “Kumpi bawipa, Media le Persia daan a hih bangin kumpi i thupiaksa cu thek theih hi ma toh hi tih cu nangmah in thei leng ci tin ti haw hi.”

¹⁶ Kumpipa in Daniel man tukin thupia in, a mat nung haw ten kiosa tampi khumnak sungah vawksuk haw hi. Daniel lakah kumpipa in, “Muantak zetin, a na nadehmi na Pathian in nang pan zal tahen tin,” ti hi.

¹⁷ Kua ma pat theih tuk ngawlin suang ngengpi pa khat tuah kiosa khumnak cu khakin, kumpipa min khetnak tacik le a bawi upa tei tacik tuah khen haw hi.

¹⁸ Kumpipa cu a innah pinkikin, mah zan cu zankhua hihbu ngawl le an hei ei ngawlin, nopnak imah bawl ngawlin um hi.

¹⁹ Zingtungno tho in, kiosa khukah manlang zetin hawh hi.

²⁰ A hen ten, “Maw Daniel, a nungmi Pathian nadektu! Muantak zetin, a na nadehmi na Pathian in kiosa kam sung pen hup thei a maw, tin au hi.”

²¹ Daniel in, “Maw kumpipa, na nunkhua sau zal hen!

²² Pathian in kiosa tei kam huptu tukin a vancungmi hahin, pa khat hei in keimah siatsuah haw ma hi. Sualnak nei mang, kumpipa na humah mawhnak ka neih ngawl hangin,” ti hi.

²³ Kumpipa cu a lungdam leita in, Daniel cu kiosa khuk sung pen suah tukin thupia hi. Suah haw in, liamnak a tawh ngawl cu mu ten haw hi; Pathian a muan hangin himdam hi.

²⁴ Kumpipa in Daniel sual a nawntute cu a zi le canote tuah manin, kiosa khumnak sungah khia tukin thupia hi. A thupiakmi bangin manin, kiosa khumnak sungah a khiak haw ten lei a hen haw laih ngawlin kiosa ten dawkin, a nguh haw tianin cep siksek khawng haw hi.

²⁵ Mahten kumpipa Darias in, miphun, nam le awn a mangtu leihummi hempoh lakah lai ngan hi. “Na hum uhah lemdaihnak um zal hen!

²⁶ Ka ngam sungah mi hempohin Daniel i Pathian cu upat le lau tukin thupia zo ing. “Amah cu a nungmi Pathian kumkhua in, a kho mi Pathian hi. A uknak cu siatsuah hi awng tuk ngawlmi le a huham cu bo ni nei tukma hi.”

²⁷ “Mi pantu le mi humtu hi. Lei le van khua tihkimah, thasiahhuai nalamdang bawl hi. Kiosa kam sung pen Daniel pan hi,” tin ti hi.

²⁸ Daniel cu Darias uksung le Persia mi kumpi Sairas uk sungah mi neinung zetin um hi.