DAAN PIAKLEHNAK 4 - Ngawm Bible

Pathian Thu Ngai Tuk

¹ Moses in mipi lakah, ‘Ka zilhmi daan hi zui unna, nung tuk uh ci.’ Topa na pu le pa uh i Pathian i piakmi ngam cu luah tuk uh ci.

² Ka thupiakmi humah imah bet pahsuh un, a kiam vang kiam pahsuh un. Topa na Pathian uh i thupiak ka hilhmi hi zui khawng un hi.

³ Peor mualhum a, Topa i bawlmite cu na mit uh tuah mu cikcek zo uh ci. Baal a biatu hempoh cu pa khat hei tang ngawlin siatsuah hi.

⁴ Mahnaven Topa na Pathian uh a muangtu nohte cu tuni tian nunglaih uh ci.

⁵ “Topa ka Pathian i hilhmi bangin daan hempoh zilh zo ing. Mah daante cu na do tuk uhmi le na luah tuk uhmi ngamsung na tum uh hei ten zui leleng un.

⁶ Komno in zui unna, minam dadang tei maiah micip le theitu na hihnak uh lang tuk hi. Hih daante a theih haw ten, ‘Hi hinnam cu minampi, cihnak le theihnak a nei ngangai mite haw hi,’ ti haw tuk hi.

⁷ “Iti zahin, a ngengmi hinnam ahi haw hei in, Topa a Pathian uh bangin a sam uhten oh a nek lelengtu Pathian bang cu nei cuang haw tukma hi. Bawm tukin a sam uhten amah in donleh hi.

⁸ Iti zahin, a ngengmi hinnam ahi haw hei in, tuni ka zilhmi daan bangin a dikmi daan cu kuamah in nei cuang haw tukma hi.

⁹ Mah hangin ngalling un! Na nunsung hempoh uhah na mit tatak uh tuah na muh zo uh mite cu phawk ngil hihim pahsuh unna; cing leleng un. Na canau uhte le na casuan uhte zilh khawng un hi.

¹⁰ Topa na Pathian uh i mai, Sinai Mualah na din uhten, Topa in ka lakah, ‘Mipi samkhawmin hi. Keimah kihcak upat tukin a cate a zilh hawnak tukin le a nunsung haw hempoh keimah kihcak upat a thiam hawnak tukin ka mukkam hihim tuah ka otmi a theih haw tuk deih ing hi,’ a tih mite cu na canau tei lakah hilh un hi.

¹¹ “Meikhu haangpi bang meingo haangpi khuhmi van tawngkha in, meivak a kap zuzungmi mual bulah na din uh laihin na canau uhte na hilh un hi.

¹² Mah mei sung pen Topa cu na lak uhah awnin, a otmi vang na beng uhin za nave uhcin Topa i mellim cu imah mu ma uh ci.

¹³ Nangmuh tuah thutepnak bawlin mah thutep na zui theihnak tukin lampi vang hilh hi. Mah lampi cu suangpeek pa nih hum a, ngatmi na zui tuk uhmi Thukham Sawm hi.

¹⁴ Na do tuk le na luah tuk uhmi ngamah na zui tuk uh daan hempoh zilh tukin Topa in keimah hilh hi.

Milim Bia Tukma

¹⁵ “Topa in, Sinai Mual mei sung pen nangmu lakah thu a hilh ten mellim imah muma uh ci. Mah hangin cingcai zetin um unna,

¹⁶ pano ahimata numei melin maw,

¹⁷ lei vak nganhing ahimata van a leng vano mellimin maw,

¹⁸ a bokvak ngamsa ahimata tuisungah ata mi ngasa bangin maw, milim bawlin, na sual ngawlnak tukin ngallingin um un.

¹⁹ Van a, na muh uhmi ni le hade le aksi cu vanhaang nuai mihing hempoh tei ca in hi a, noh ten bia in, a na dek sual pahsuh un.

²⁰ Mahnaven na dinmun uh hi ama mihing na hih theihnak tukin, nohtei ca in thik huan tuinak bang Izipt ngam pen a suahtulmi hi uh ci.

²¹ Nohte hangin Topa a Pathian uh cu ka humah a thinukin, nohte a piak tukmi ngam pha sungah tum tuk ngawlin, ‘Jordan ngun tan pahsun,’ ti hi, mahmi cu tamsiatnak tuah phuang zo hi.

²² Mah hangin kei cu hi ngamah thi tung a, Jordan ngun cu tan thei tuk mang hi; mahnaven noh cu tan tuk uh ci a, mah ngam pha cu luah tuk uh ci.

²³ Topa na Pathian uhin nohte tuah thutepnak a bawlmi cu phawkngil tuk ngawlin ngalling un. Ama thupiakmi cu zui unna, na biak tukin, iti bang milim hei bawl pahsuh un.

²⁴ Itahim titale Topa na Pathian uh cu micing thei Pathian hi a, ihempoh a kangtumtik theitu mei bang hi.

²⁵ “Na luahtum tuk uhmi ngamah kum ngeipi umin, tu le casuan na neih uh hei ten itih bang milim hei bawlin sual pahsuh un hi. Milim biak cu Topa i maiah a pha ngawl ngangai mi le a thinuktiktu hi.

²⁶ Mahti bangin na bawl ngangai uh ahi tale lei le van salin tuni in hilh ing hi: hi ngamah ngei ngamta tukma uh ci, a ngeican um ngawl pailal tuk uh ci. Na luah tuk uhmi Jordan ngun ngalah ngei nung tukma uh ci, siatsuah khawng hi tuk uh ci.

²⁷ Topa amah hihimin miphun dang tei lakah khenkhek khawng tuk hi. Mi demno son tham ngawl bek tang tuk uh ci.

²⁸ mihing khut tuah bawlcopmi pathian, thing le suang tuah bawlmi pathian, khua amu thei ngawl le zaknak a nei ngawlmi, an a ei thei ngawl mi pathian bia tuk uh ci.

²⁹ Mahlaiah Topa a Pathian uh cu zei in, na lungmu ngai uh tuah na zei uh tale tawk tuk uh ci.

³⁰ Mahnaven lungkhamnak na tawh uhten le hi na hempoh na hum uhah a hen ten a dawlbel bek ten Topa i lakah hekkikin, a thu ngai tuk uh ci.

³¹ Topa cu mi hehpihtu Pathian hi. Hahzau in nohte cu siatsuah tukma hi; na pu le pa tei lakah amah hihimin thutepnak a bawl mite vang phawkngil tukma hi.

³² “A bosa hun, na pian laih ngawl uhin leihumah Pathian in mihing a bawl hun tian, a bosa hunte zo hem un, leihum buppi hi cuan hem un. Hiti bang na ngengpi hi ilai ah um awng kaw? Hiti bang nalamdang hi a thei awng pa khat bek um haw maw?

³³ Mei sung pen Pathian awnkam zain, a nungmi nangmuh bang mihing um awng haw maw?

³⁴ Topa na Pathian uhin, Izipt ngam a, a bawl bangin miphun pa khat cu ngam pa khat pen tulpihin, ama hinnamin, a bawl ngamtu Pathian dang ilai mun bekah um awng maw? Na mitmuh cikcek uhin a ngilnak le a huham cu langtikin, natsia le ngaldonak hengtik a, na lamdang le thasiahhuai tampi bawlin, a lauhuai na tampi hengtik hi.

³⁵ Amah bek Pathian hi, Amah sial ngawl pathian dang umma hi, tih na theihnak tuk uhin hi nate cu Topa in nohte lak hi.

³⁶ A zilh theihnak tukin van pen a aw zatik a, leihumah mei alh mutikin, mahlai sung pen nangmuhte otpih hi.

³⁷ Na pu le pa uhte cu a ihnak tuah a casuan haw tian amah hihimin, a ngilnak huham tuah Izipt ngam pen nohte cu suahtul hi.

³⁸ Hi ngam hi na nawk tum dedeuh uhten nangmu ngam a hih theihnak tukin, nangmuh sang a ngeng deuh hinnam cu amah in hawlvawk hi.

³⁹ Mah hangin Topa cu vancung le leihumah Pathian hi, tih cu cing leleng unna, pathian dang um haw ma tih cu phawkngil hihim pahsuh un hi.

⁴⁰ Tuni ka piakmi ama daan hempoh hi zui unna, nangmuh le na casuan tei lampi tuang tuk hi. Topa na Pathian uhin, a kumkhua in nangmuta tukin a piak tukmi ngamah um leleng tuk uh ci,” ti hi.

Buknak Khuapite

⁴¹ Moses in, Jordan ngun pen nisuahnak lamah khuapi pa thum koih hi.

⁴² Mi pa kha khatin, a ngal ahi ngawlmi pa khat a that kha tale ngelhin, a himdamnak tukin hi. Hi khuapi pa kha khatah a ngelh tale thah hi tukma hi.

⁴³ Reuben hinnam tei ca in mualhum ngam a, um Bezer khuapi, Gad hinnam tei ca in Gilead ngam a, um Ramoth khuapi le Manasseh hinnam tei ca in Bashan ngam a, um Golan khuapi hi.

Pathian i Daan Piaknak

⁴⁴ Topa i daan le thuzilhmi cu Moses in Israel tei lakah pia hi.

⁴⁵ Hi daan cu Izipt ngam pen a tul nung haw,

⁴⁶ Bethpeor khua pen ngalkhat lam, Jordan ngun i nisuahnak lam phillawn a um haw laihin pia hi. Mah mun cu Heshbon khua a, bawi a dektu Amor Kumpi Sihon i ngam sungah um hi. Izipt ngam pen a tul nung haw ten Moses le Israel miten Kumpi Sihon cu do in neh haw hi.

⁴⁷ A ngam cu luah haw a, Bashan Kumpi Og i ngam vang luah khawng haw hi. Hi kumpi pa nihte cu Amor mitei kumpi hi haw a, Jordan nisuahnak lam a, ummi haw hi.

⁴⁸ Ngam a lak haw mi cu Arnon ngun mawk a um, Aroer khuapi pen Sirion Mual (Hermon Mual) tian,

⁴⁹ Jordan ngun pen nisuahnak lam a um Arabah ngam hempoh tel a, Tuipi Thi vang tel hi, mahten Pisgah mual bul tian tel hi.