DAAN PIAKLEHNAK 33 - Ngawm Bible

Moses In Israel Hinnamte Muicu Pia

¹ Pathian i mihing Moses in, a thih laih ngawlin hi bangin Israel tei humah muicu pia hi:

² Topa cu Sinai Mual pen hung hi; Ni bangin Edom hum pen tulin, Paran Mual pen a mihing tei humah lang hi. A lakah vancungmi thawng sawm um haw in, a taklam khutah mei alh cawi hi.

³ Topa in, a mihingte cu it in, ama sung a, a umte humhim hi. Mah hangin a kebulah kunin, a thupiakmi ngai ung hi.

⁴ Moses i piakmi Daan cu zui un hi. A hinnam uh i sunloihbelmi cu pia hi.

⁵ Topa cu a mihing Jeshurun tei kumpi suak hi. Israel hinnam le hotu a tawhdun khawm haw ten.

⁶ Reuben hinnam cu hi bangin muicu pia hi: “Reuben hinnam cu cimit zal pahsuh hen, A mihing demzet haw naven,” ti hi.

⁷ Judah hinnam cu hi bangin muicu pia hi: “Topa aw, bop a ngetnak haw aw cu za inna, Israel hindangte tuah khawmin hi. Topa aw, a khut khohtik inna, a ngal haw do sakin hi,” ti hi.

⁸ Levi hinnam cu hi bangin muicu pia hi: Topa aw, Levi mi nelah na Thummim pia inna, thuman mitei humah Urim cu pia in hi. Muantak na mihingte haw hi. Massah ah khingkhai zo ci, Meribah tui ah zuam zo toh hi ci.

⁹ Nangmah saw belhnak mang haw, a nu le pa tei lakah: imah simsial ma ung ti haw hi. A u le nau thupi sa haw ngawlin, Amu cano hei thei nuam haw ma. Mahnaven na thu cu zui haw in, Na thutiam cu phazetno in cingkhawi haw hi.

¹⁰ Na thupiak cu na mi Jakob lakah zilh haw tuk a, na daan cu Israel mi lakah zilh haw tuk hi. Na maiah namtui biakpiaknak bawl haw tuk a, na biaklandawhah halkang biakpiaknak pia haw tuk hi.

¹¹ Topa aw, a nadehnak haw humah thupha pia inna, a khut thiamnak haw humah na lungdam zalin hi. A ngal tei elnguh vat inna, tholeh tuk ngawltohin, amuh a ngaltu le a huatu, a ngal haw cu ngawizanin, tin ti hi.

¹² Benjamin hinnam cu hi bangin muicu pia hi: “Hi hinnam cu Topa i deihmi hi in, lungmuangno in cawl hi. Pathian amah in sun thaleng cingkhawi in, a mi laizangah um hi.”

¹³ Josef hinnam cu hi bangin muicu pia hi: “Topa in, a ngam haw cu van daita tuah muicu pia zal tahen. Leinuai a tuikhal hei in, nawngtikin muicu pia tahen.

¹⁴ Ni i mintikmi thingngah le, Ha sial a hunkim ten a ngahmi thingngah phabel tuah dim hen.

¹⁵ Kumkhua a kho mi a mualsang haw cu thingthei ngah nuamnak tuah dim hen.

¹⁶ A ngam haw cu lei pen a suakmi thilpha namkim tuah dim tahen. Sawlcaam kang sung pen a awntu, Topa i phatnakin diat zal hen. Hi muicu cu Josef lu humah heng hen. Itahim titale a unau tei lak pen puitu hi.

¹⁷ Josef ngilnak cu sunglawi in, a zaangtha cu khuicang bang hi, A ki cu Manasseh mi a thawng a thawng le Efraim mi thawng sawm bang haw hi. Mah a ki tuah hinnam tampi khi in, Leipi mawktian nawkvawk hi,” ti hi.

¹⁸ Zebulun le Issakhar hinnam cu hi bangin muicu pia hi: “Zebulun cu tuipi humah sumbawlin, a hawh le vahnak pen lawhting zal hen; Issakhar cu inn pen a hauhnak pung tahen.

¹⁹ A mualhum hawah hinnam dadang zawm haw in, Mahlaiah a dikmi biakpiaknak bawl haw hi. Tuipi pen hauhnak ngah haw in, Tuipi mawk tuan philnel lak pen ngah haw,” ti hi.

²⁰ Gad hinnam cu hi bangin muicu pia hi: Gad ngam zal zetin, a bawltu, “Pathian cu thangphat un hi. Gad cu kiosa bang hi, ei tukin pang hi. A baan haw le a lu haw botkek tukin hi.

²¹ Amuta tukin ngam phabel teng haw a, Hotu i dehvo cu piak hi haw hi. Topa i thukham le daan cu zui haw, Israel hotu a tawhdun khawm haw ten,” ti hi.

²² Dan hinnam cu hi bangin muicu pia hi: “Dan cu pawpino hi, Bashan pen a tulmi kiosa bangin,” ti hi.

²³ Naftali hinnam cu hi bangin muicu pia hi: “Naftali cu Topa i mitmaipha co hi. A ngam haw cu Galilee tuiting pen hanglam tian heng hi,” ti hi.

²⁴ Asher hinnam cu hi bangin muicu pia hi: “Asher in hinnam dang sangin muicu tam saw deuh co hi, A unau tei deihbelmi hi zal tahen. A ngam cu olif kung tuah dim hen.

²⁵ A khuapi tei kongkhah cu thik le daal tuah ngeh hi henna, A nun sung lungmuang zetin khuasa thei mi hi zal tahen,” ti hi.

²⁶ Maw Israel mite: Na Pathian uh bang pathian dang umma hi. Vanah huham nei zetin um hi. A sunloihnak meingo hum pen nangmuh bawm nuamin hung hi.

²⁷ Topa cu a kumkhua in, na belhnak uh hi, Kumkhua in, a baanzakmi cu na ngai ngap uhmi baan hi. Mailam na nawt pepel uhten na ngal uhte cu hawlvawkin, thah khawng tukin thupia hi.

²⁸ Mah hangin Israel casuante cu ngimta zetin um haw hi. Jakob casuante cu lau tuk imah nei haw ma. An le sabit tamnak ngam hi. Van pen leihumah daitatik hi.

²⁹ Maw Israel mite: Iti zahta in mi bawngpha hi uh cim! Nangmuh bang kuamah um haw ma maw? Topa i pat tulmi hi uh ci. Topa amah cu na lumphaw uh le na naam uh hi. Noh a pantu le nehnak piatu tukin; Na ngal uhte cu hehpihnak ngen tukin hung haw tuk naven, Na ke nuai uhah sikpek tuk uh ci.