DAAN PIAKLEHNAK 32 - Ngawm Bible

¹ Maw van le lei, ka awn hi thei un hi, ka hilhmi hi phano in ngai hem un.

² Ka thu zilhmi cu van nguah bangin zuu hen, Leihumah daita bang hi tuk hi. Ka awn cu thingkung dawnno humah nguahsial bangin cak tuk hi. Nguah nemno bangin hampa dawnno tei humah zuu tuk hi.

³ Topa i min cu thangphat tung, Nohten, a thawmngengnak hilh tuk uh ci.

⁴ Topa cu nangmuh nunpantu a ngilbel hi. A bawlmi hempoh cu dikcangin, cangkim hi. Na Pathian uh cu a dikmi le muantak hi. A dikmi le a manmi bek bawl hi.

⁵ Mahnaven noh cu numei pha ngawl hinnam, A mihing tukin a tak ngawlmi misual le mizol thei hinnam uh ci.

⁶ Hitin maw Topa i humah na nuntuk uh; Misil le theihtupnak nei ngawl mihingte! Amah cu a semsuahtu le na Pa uh hi, Minam pa khatin, a bawltu cu amah hi.

⁷ Tanglaih cawng a hun, a bosa hunte ngaisungleh hem un. Na pa uhte dong unna, hilh tuk hi, Na pa uhte ngen unna, phuang haw tuk hi.

⁸ Cungnungbel i hinnam cu ngam pia hi. A umnak haw tukin mun sem hi. Miphun ca tukin ngamngi bawlsak, Israel capate, a tam a dawm zo in sem hi.

⁹ Mahnaven Jakob casuante cu Amata tukin teng hi.

¹⁰ Phillawnah vakvai in, a vahlih haw mu hi. Ngamkhing, huih kongka phillawnah, Ama mitcang a cinkhawi bangin, hupin cingkhawi hi.

¹¹ Muvanlai in, a bu hingin, a cano humah lengin; a cano cu leen zilhin, himdamno in, a ha humah a cawi bangin, Topa in Israel mite cu, himdamno in cawi hi.

¹² Topa bekin a mihingte cu ngamdang tei pathian tel ngawlin pui hi.

¹³ Leihum munsangte cu uktikin, lo sungsuak mite cu ei haw hi. Suang ngengpi lak pen khuaihum mu haw a, suangtep lakah olif kung pha sathau tuah vak hi.

¹⁴ A khui le a keel tei nawitui cu tam hi. Tuu, keel le khui phabel nei haw hi. Sangvut hempoh pen sangvut phabel ei haw in, Sabit hempoh pen sabit ukbelin haw hi.

¹⁵ Topa i mihing Jeshurun cu hau zetin pualthau haw hi. An kham zetin thau haw hi. Amuh semsuahtu a Pathian haw cu nunghek haw a, amuh nunpantu ngilbel cu deih ngawlin lawl haw hi.

¹⁶ Milim a biak haw mi cu Topa in cing hi, Thil nawngkai a bawl haw hangin a thinuk hi.

¹⁷ A biakpiaknak haw cu Pathian nelah hi ngawlin pathian dang lakah pia haw hi. A pupa tei a kihcak awng ngawl haw mi, Tu naino in, a hengmi pathian dang zuk lakah pia haw hi.

¹⁸ Nangmuh Semsuahtu Bulpi cu hahzau uh ci. Nangmuh nunpantu ngilbel Pathian cu phawkngil uh ci.

¹⁹ Mahmi cu Topa in mu in, ama canu le capa ten a lawl haw hangin a thinuk hi

²⁰ “Amuhte bawmleh tukma toh ing, i suak haw tuk hum tih zo hih tung.” Hi mizol thei casuan le mi muantak ngawlte!

²¹ A milimte hangin ka thinuktik haw hi. A milimte hangin cing ing. Mah hangin son tham ngawl misil hinnam mangin a thin haw uktik tung. Misil hinnamte hangin iksiknak neitik tung hi.

²² Ka thinuknak cu mei bangin alhtik tung a, leihum le leinuai a, ummi hempoh kang khawng tuk hi. Lei le ankung kang tuk, mual tei a bulpatnak haw cu kang khawng tuk hi.

²³ A hum hawah catngawlin, bawngsiatnak hengtik tung, Amuh donakin ka thalcang mang tung hi.

²⁴ Ngilkialnak le nattunin thi haw tuk hi. Mullinghah natsia tuah thi haw tuk hi. Amuh mantu tukin sahang hah tung. Micik thei ngu nei hangsan ngul vang amu lakah vaktik tung hi.

²⁵ Ngaldonak hangin lamtuanah thi haw tuk hi. Thinsu linglawngin innsung hei ah thi haw tuk hi. Tangval le khanglai vang thi haw tuk hi. Nauno le putek vang luat haw tukma hi.

²⁶ Keimah in lengkektik khawng tung tin ngaisung ing. Kuamah in, a cungcang haw theileh haw tukma toh hi.

²⁷ Mahnaven a ngal haw ten, keimuh ten neh khawng ung hi. Pathian cahnak imah umma hi tin, Tuangkhawng pahsuh hen, ti hi.

²⁸ Israel cu theihtupnak nei ngawl hinnam haw hi. Cihnak nei haw ma hi.

²⁹ Ita ngal sung ung kaw, tih mu thei haw ma hi. Ita hi bangin cangta ung kaw tihvang mu thiam haw ma.

³⁰ Ita mi pa khatin thawng khat nehin, Mi pa nih bekin thawng sawm a neh theih haw? Topa a Pathian haw in zamsanin, A Pathian ngilzet haw in, a nunghek hangin hi.

³¹ Thu ngangai ti ahin, a pathian dang ten, Israel i Pathian kim viangma hi, tih a ngal uhten thei haw hi.

³² A ngal haw ten Sodom le Gomorrah bangin a sehuaidan haw cu a kha mi le thihnak ngu in, a ngahtu sabit kung bang haw hi.

³³ A sabittui haw cu ngul tei ngu bang hi, a lauhuai ngul tei ngu bangin!

³⁴ Topa in, a ngal tei bawlmi cu thei hi. Amuh bawlsia tukin khawihcangin ngak hi.

³⁵ Topa in phuba la in thuk kiknak cu Amata hi. Lumin, a cak hun haw nai zo, a siatnak ni cu hengpal tuk toh hi.

³⁶ Itahim titale a ngilnak haw bo tih a theih ten, a ngilnak haw bo in, miluat le sila tih hei um ngawltohin Topa in ama mihingte cu pan tuk hi. Ama nadektu cu hehpih tuk hi,

³⁷ Topa in, a mihingte cu dong tuk hi. Ilai ah kaw na muanzet uhmi, pathian dang ngilzet a um haw?

³⁸ Na biakpiaknak uh thau a eitu le, na sabittui ukzet a intute cu? Atu hungin bawm haw hen, nangmuh pan tukin tai haw hen.

³⁹ Keimah bek, Keimah bebek hi Pathian hi ing hi, Pathian tatak cu hi ing. Adang kuamah um haw ma hi. That ing a, nungtikleh ing, liamsuah ing a, dam lehtik ing, Ka khut sung pen a doktul theitu kuamah um haw ma.

⁴⁰ Kei cu a nungmi Pathian ing hi, Van lamah ka baanzakin, Ka nunnak min salin thutiam ing.

⁴¹ Ka ngalnam de cu tat hiam tung, thuman tuah thuson tung. Ka ngal tei humah phu la tung a, Kei a huatu cu bawlsia tung.

⁴² Ka thalcangte cu a thisan haw tuah diat tung a, ka ngalnam tuah kei a ngaltu sat tung. Kei a dotu hotu samsau, Kuamah khawih tuk mang, A liam mite le thawngta vang thi haw tuk hi.

⁴³ Maw leihum mite, Topa i mihingte tuah na lung uh dam un, A mihing a thattu cu bawlsia tuk, a ngal tei humah phuba la tuk hi. A mihing tei ngamsung a, mawhnak cu somciang khawng tuk hi.

⁴⁴ Moses le Nun capa Joshua ten hi la cu Israel mi pi tei theih cilcelin au haw hen hi.

Nungdawlbel Moses Thucah

⁴⁵ Moses in Pathian thutiamte cu Israel tei lakah a hilh ceng ten,

⁴⁶ “Tuni ka piakmi thukham zui tukin ngalling zetin um un. Na cano tei zui tukin zilh un.

⁴⁷ Hi zilhnakte hi nangmu ca in, zilhnuammi nei ngawl hi ma hi, na nunnak uh hi. Zui unna, na luahtum tuk uhmi Jordan Ngun ngal ngamah ngeipi um tuk uh ci,” ti hi.

⁴⁸ Mah ni lelengin, Topa in Moses lakah,

⁴⁹ “Jerikho khuapi pen nisuahnak lam, Moab ngamsung, Abarim Mualtuanah hawh inna, Nebo mualhumah kai in hi; mahlai pen Israel mite ka piak tukmi Kanaan ngam cu cuanin hi.

⁵⁰ Na u Aaron cu Hor Mualah thi zo hi; nang vang Nebo Mualah thi tuk ci,

⁵¹ itahim titale Israel tei muh cilcelin, na pa nih uhin, keimah muang ngawlin nung uh ci. Zin ngamkhing, Kadesh khua el, tui umnak Meribah a, na um uh laih khin Israel tei muh cilcelin upatnak pia ngawlin ka minsiatik uh ci.

⁵² Kanaan ngam cu a lang theihnak mun pen cuan tuk navecin Israel mite ka piak tukmi Kanaan ngamah tum tukma ci,” ti hi.