DAAN PIAKLEHNAK 3 - Ngawm Bible

Kumpi Og Neh Haw

¹ “Mahnung ten saklam Bashan ngamah hawhin, Kumpi Og le a ngalkap cu eimuh do tukin Edrei khua ah heng haw hi.

² Mahnaven Topa in, “Lau pahsun! Amah Og hihen, a ngalkap le a ngam hihen na khut sungah pia tung hi. Heshbon uktu Amor kumpi Sihon na bawl bangin amu hum hei ah bawlin hi,” ti hi.

³ “Topa in kumpi Og le a mihingte cu a khut sung uhah a piak hangin, pa khat hei khawih ngawlin that khawng hung.

⁴ Mah hun lelengin a khuapi hempoh vang la khawng hung. A lak ngawl uhmi pa khat hei umma hi. A venghawngin khuapi sawm luk la hung hi. Bashan Kumpi Og i ukmi Argob ngam a venghawngin tel hi.

⁵ Hih khuapi cu kulhtian sangzet tuah umin, kongkhah le kongka kalhte nei tiptep haw hi. Up ngawlmi khuano vang um bok hi.

⁶ A khua cu siatsuah khawng hung a, Heshbon kumpi Sihon i ukmi khuasung, a bawl uh bangbokin pano hihen, numei le naupang hihen that khawng hung hi.

⁷ A ngam haw laksakin, a khuapi cu suam khawng hung hi.

⁸ “Mah hunin, Jordan ngun nisuahnak lam ngam, Amor kumpi pa nih tei khut pen Arnon ngun pepan Hermon mual tian la hung hi.

⁹ Hermon mual cu Sidon miten Sirion ti haw a, Amor miten Senir ti haw hi.

¹⁰ Bashan ngam Kumpi Og i ngam hempoh munlawn khuapi, Gilead le Bashan ngam hempoh le nisuahnak lamah Salekah le Edrei khuapi tianin la khawng hung hi.

¹¹ “Kumpi Og cu Refaim mitei lak pen a nungdawlbel hi. A zaunak cu thik hi a, pi luk zalin, pi sawm le pi li sau hi. Mah a zaunak cu Ammon khuapi Rabbah ah tu tianin umlaih hi.

Jordan Nisuahnak Lam Ummite

¹² “Hi ngam a lak uhten Arnon ngun el a, um Aroer khuapi, a elkim ngam, Gilead mualhum ngam le a khuapi cu Reuben le Gad hinnam tei lakah pia ing.

¹³ A tangmi Gilead ngam le Bashan ngam venghawng, Og i ukmi, Orgob ngam buppi in Manasseh hinnam khenkhat tei lakah pia ing.” Bashan ngam venghawng cu Refaim mitei ngam a tihmi haw hi.

¹⁴ Bashan ngam, le Argob ngam buppi cu Manasseh capa Jair in Geshur le Maakah ngam ngi tian la hi. Mah ngam a, khua cu ama min la in, Jair khuano tin ti haw laih hi.

¹⁵ Manasseh hinnam Makhir lakah Gilead ngam cu pia ing.

¹⁶ Reuben le Gad hinnam tei lakah Gilead le Arnon ngun laklawh ngam cu pia ing. Ngunpi laizang kek cu hanglam tuah ngamngi hi a, Ammon tei ngamngi Jabbok lui cu saklam ngamngi hi.

¹⁷ Nitumnak lamah a ngam haw cu Jordan ngun tian hi. Saklam Galilee tuiting pen hanglamah Tuipi Thi tian, nisuahnak lamah Pisgah mual bul tian a ngamngi haw hi.

¹⁸ “Mah hun lelengin, hi bangin thupia ing hi: ‘Topa a Pathian uhin hi Jordan ngun nisuahnak lam ngam hi, na luah tukin pia hi. Na ngalkapte cu ngalthuam bawltik unna, Israel na unaupih tei maiah a ngam haw a luah theihnak haw tukin Jordan ngun ngalah hawhtik un.

¹⁹ Na zi uhte, na cano uhte le na ngam uhte, (nganhing tampi nei uh ci tih cu thei ing hi) bek ka piakmi khuapi sungah um haw tuk hi.

²⁰ Topa in Jordan ngun pen nitumnak lam a piakmi ngam, a luah haw laih ngawl le nangmuh bangin Topa in lemdaihnak tuah mah ngamah a umtik laklawh na unau dang uh Israel mite panpih un hi. Mahnung bek ten ka piakmi ngamah kik thei tuk uh ci,’ ti ing.

²¹ “Joshua lak hei ah, ‘Topa na Pathian uhin kumpi pa nih tei humah a bawlmi cu na mitcang loli tuah mu zo ci. Na do tukmi ngamsung a, mihing tei humah mah bang lelengin bawl tuk hi.

²² Kuamah lau pahsun hi, Topa na Pathian uhin, nangmu ai-in dosak tuk hi,’ ti hi.

Kanaan Ah Moses Tumtik Ma

²³ “Mah hun laihin Topa i lakah,

²⁴ ‘Topa Pathian, na thawmngennak le thasiahhuai na lak tukmi cu a patnak bek hi laih hi, tih thei ing. Vanah hihen leihumah hihen nangmah bangin na ngengpi bawl theitu pathian kua mah um haw ma hi.

²⁵ Maw Topa Jordan ngun cu tantik inna, ngalkhat lam a, ngam phazet, mualhum ngam mawizet le Lebanon Mual cu hu zotik zalin,’ tin ngen ing”, ti hi.

²⁶ “Mahnaven nangmuhte hangin Topa cu ka humah thinukin ka ngetnak cu ngai ma hi,” Tawk toh hen! Hi thu cu son toh pahsun!

²⁷ Pisgah mualhumah hawh inna, saklam, hanglam, nisuahnak lam le nitumnak lam cuan in hi. Jordan ngun ngal na kai tuk ngawl hangin, na muh mite cu phano in zota in hi.

²⁸ Joshua vang phano in thu hilhin hi. Amah cu tha pia inna, ngiltikin hi, itahim titale na muhmi ngam cu luah tukin mipi cu amah in lampui tuk hi, ti tumsial hi.

²⁹ “Mah hangin, Bethpeor khua i ngalkhat lam munlawnah tanglaih hung,” ti hi.