DAAN PIAKLEHNAK 28 - Ngawm Bible

A Zuitu Tei Muicu

¹ “Tuni a, ka piakmi thukham hi komno zui in, Topa na Pathian uh i thu na ngai uh ahi tale, leihum hinnam hempoh lak pen a ngengbel hinnamin bawl tuk hi.

² Topa na Pathian uh i thu ngai unna, hi muicu a phunkim hi co tuk uh ci.”

³ “Topa in, na khua le na ngam uhte muicu pia tuk hi.”

⁴ “Topa in canu, capa, an a phunkim le khui le tuuhon muicu pia tuk hi.”

⁵ “Topa in, na bawm le na kuangte muicu pia tuk hi.”

⁶ “Topa in, na deh le zei le phetnak hempoh ah muicu pia tuk hi.”

⁷ “Nangmah a dotu na ngalte cu Topa in nehsak tuk hi. Munkhat pen a not haw hei in mun salih pen tai haw tuk hi.”

⁸ “Topa in, na nadehnak cu muicu pia tuk a, na beemte cu a sungah an dim khawng haw tuk hi. A piak tukmi ngam sungah muicu ngah tuk ci.”

⁹ “Topa na Pathian uh i thu ngai in, a thupiakmi hempoh na zui uh tale, a tepsa bangin ama mihingin bawl tuk hi.

¹⁰ leihum hinnam hempoh ten Topa in ama mihing hi tukin a ten khi amuh haw ten nangmuh cu lau haw tuk hi.

¹¹ Topa in, casuan tampi, ngan tampi le an tampi muicu pia tuk hi.

¹² Van pen a muan bawm hongin, a hunkim ten nguah zutik tuk a, na nadehnak uh hempoh ah lawhtinnak pia tuk hi. Hinnam tampi tei lakah coih tuk uh ci; mahnaven noh ten leicawi tukma uh ci.

¹³ Topa na Pathian uhin, hinnam tampi tei lakah hotu in bawl tuk hi, mitei ho mi cu hi tukma uh ci. Tuni ka piakmi thukham hi komno in, na zui uh tale khangto leleng tuk uh ci; a kiamsuk lam cu hi tukma uh ci.

¹⁴ Hi daante cu ituk mah ten siatsuah pahsuh un; pathian dang vang bia in, a nadek pahsuh un.”

Thuhilh Ngai Ngawl Tei Thuak Tuk

¹⁵ “Mahnaven tuni a, ka piakmi daan le thukham hi komno zui ngawlin Topa na Pathian uh i thu na ngai uh mata, hi tamsiatnak hi na hum uhah heng tuk hi.”

¹⁶ “Topa i tamsiatnak cu na khua na ngam uhah heng tuk hi.”

¹⁷ “Topa i tamsiatnak cu na bawm uh le na kho uhah heng tuk hi.”

¹⁸ “Topa i tamsiatnak cu na canau tei humah hihen, na lo an humah hihen, na khui le na tuuno tei humah hihen heng tuk hi.”

¹⁹ “Topa i tamsiatnak cu na deh na zei le phetnak hempoh uhah heng tuk hi.”

²⁰ “Thil pha ngawl bawlin Topa na nunghek uh tale na paihlal uh laklawh Topa in, na hum uhah buainak, ngilkial dangdumnak hengtik tuk hi.

²¹ Na luah tuk uhmi ngam sungah pa khat hei tangngawlin na hum uhah hizul natsia pa khat nung pa khat hengtik tuk hi.

²² Topa in mi lawh thei natnak bumnat le nattun hengtik tuk hi. Na anci po uhte cu ko in, a cehte ngau haw tuk a, siatsuah khawng hi tuk hi. Hi haksatnak cu na thih khawng uh laklawh na lak uhah um leleng tuk hi.

²³ Van nguah kang tuk a, na leingam uh cu thik bangin cang tuk hi.

²⁴ Na thih khawng uh laklawh Topa in leivul le philnel cu nguah ai-in zutik tuk hi.

²⁵ “Topa in, na ngal tei lakah na hum uh a, nehnak pia tuk hi. Mun khat pen na nawk uh hei in, mun salihah tai tuk uh ci, khua le ngam hempoh ah vakvai in mitkem hah hi tuk uh ci.

²⁶ Na thih uhten na luang uhte cu lei lak a, vak ngamsa hihen, van a, a leng vano ten hihen, ei haw tuk hi; a hawlvawktu kuamah um haw tukma hi.

²⁷ Izipt mitei hum a, a hentik bangin Topa in, na hum uhah uilut meima hengtik tuk hi. Na taksa hum uhah nai kuah tuk hi, na pumpi uh cu thakphelh meima tuah dim tuk a, thakzet tuk hi; mahnaven a dam thei ngawlmi hi tuk hi.

²⁸ Topa in, na lungmu uh cu molhtik tuk hi, na mit uh caw tuk a, na lungmu uh buai leleng tuk hi.

²⁹ Mitcaw bangin sunlamin vak tuk uh ci, na lampi uh vang zei thei tukma uh ci. Iti bang na nadek uh hei in lawhting hihim tukma uh ci. Mitei nuainem mi le thil lonsak a thuak lelengmi hi leleng tuk uh ci, kuamah pantu nei tukma uh ci.”

³⁰ “Khanglai pa khat na ham vangin midang ten sualpih haw tuk hi. Inn pa khat na sa vangin a sungah um awng tukma ci. Sabit huan na bawl vangin ei awng tukma ci.

³¹ Na khui cu na mitmuh cilcelin, thah sak haw tuk a, a cik vang co ngah tukma ci. Na laak cu na mitmuh cilcelin, dok haw tuk a, pialeh haw tukma hi. Na tuu cu na ngal tei lakah piak hi tuk a, kuamah in pan haw tukma hi.

³² Na canu le na capate cu na mitmuh cilcelin, ngamdang mitei lakah piak hi haw tuk hi. Kikleh haw nave ni maw tin, a mit bumvo inn nisial na cuan li hei in, zohman um tukma hi.

³³ Haksa zetin anci na cin mite cu ngamdangmi ten sut haw tuk a, a ngahmi imah nei ngawlin zotsaknak le bawlsiatnak bek tawk leleng tuk ci.

³⁴ Mahtin na thuak hangin na lungkhamtik tuk hi.

³⁵ Topa in, na ke cu a dam thei ngawl, a nase zetmi meima tuah dimtik tuk hi. Na lusip pen na ke lek tian meima dim khawng tuk hi.”

³⁶ “Topa in nangmuh le na pu le pate hei a thei awngngawltu miphun tei umnak ngamah kuat tuk hi. Mahlaiah thing le suang tuah bawlmi milim bia tuk uh ci.

³⁷ Topa in ngam hempoh ah khen khek tuk a, mahmi cu amuh haw ten lamdang sa haw tuk hi. Mitei nuihsan le nautatmi hi tuk uh ci.”

³⁸ “Anci tampi cing tuk nave uhcin na an uhte cu khaau in ei tuk a, na cop uhmi an cu demno bek hi tuk hi.

³⁹ Sabit huan bawlin komno in zo tuk nave uhcin lung ten ei khawng haw tuk hi, sabit ngah thawih pha um tukma, sabittui vang, in ngah tukma uh ci.

⁴⁰ Na ngamsung khua hempoh ah olif thingkung po tuk naven a ngahte cu cak khawng haw tuk hi, mah hangin olif situi vang ngah tukma uh ci.

⁴¹ Canu le capa nei tuk nave uhcin ngalmatmi hi khawng haw tuk a, nangmuta hi haw tukma hi.

⁴² Na thingkung uh le na ankung uhte cu lung ten ei khawng haw tuk hi.”

⁴³ “Na ngamsung uh a, um ngamdang mite cu khangto dedeuh haw tuk a, noh cu kiamsuk dedeuh tuk uh ci.

⁴⁴ Amuhte cu sumpai micoihtu hi haw tuk a, noh cu a leicawitu hi tuk uh ci. Amuh cu lu hi haw tuk a, noh cu a zuitu hi tuk uh ci.

⁴⁵ “Topa na Pathian uh i thu ngai ngawlin a daan le a thukham na zui uh ngawl hangin haksatnak pa khat nung pa khat na hum uhah heng tuk a, pailal tuk uh ci.

⁴⁶ Hi haksatnak cu nangmuh le na casuan tei humah Pathian i dantatnak heng hi tih sialsiahnakin kumkhua in um tuk hi.

⁴⁷ Topa i muicu cu a phunkimin dong tuk uh ci; mahnaven lungdamno in bia ngawlin thatho zetin, a nadek ma uh ci.

⁴⁸ Mah hangin Topa in, na lak uhah a hahmi na ngal tei nadektu in suak tuk uh ci. Ngilkial dangdumin um tuk uh ci, nikcen puansilh le thildang hempoh tingsam lelengin um tuk uh ci. Na ngal uhten siatsuah haw tuk a, na bothal uh laklawh na ngawng uhah thikkawn khaih haw tuk hi.

⁴⁹ Topa in leimawk a, um hinnam cu nangmuh bawlsia tukin hah tuk hi, a awn haw hei na theih awng uh ngawlmi hinnam cu! Mupi in ak a dawk bangin dawk haw tuk hi.

⁵⁰ Pitek le naupang tei humah mi ngaihsak ngawlmi le mi hehpih thiam ngawlmi hi haw tuk hi.

⁵¹ Na ngan uhte le na an uhte ei khawng haw tuk a, an ngawlin thi tuk uh ci. Na eih tukin, an le sabit, olif situi, khui le tuu khawihmi nei haw tukma, mah hangin na ci uh mit tuk hi.

⁵² Topa na Pathian uh i a piak tukmi khuapi hi pa khat hei tang ngawlin sim haw tuk a, na muanzet uhmi kulhtian sangzet cu cim khawng tuk hi.”

⁵³ “Na ngal uhten na khuapi uhte a kilh khawng haw ten, an ngawlin amthong tuk uh ci, mahten Topa na Pathian uh i piakmi na canau uhte tianin ei tuk uh ci.

^54-55 Itih bang mi upa, minam pha le minampi na hi uh, vangin ngal ten a khua haw kil khawngin amthong le lungbingin, a um haw ten an eih tuk a neih ngawl hangin ama sungsuak a ca tatak hei ei tuk hi; a cano i cik cu a unaupih le a ih zetmi a zi le a tang laihmi a ca vang kawm tukma hi.

⁵⁶ Iti bang numei pha le hau hei hihen, a hauh leita hangin a ke in lei a sik awng ngawlmi ahi vangin, mahti bang lelengin a cano i cik cu ei bok tuk hi. A ihmi a pasal le a canu le a capate vang kawm tukma hi.

⁵⁷ Ngal ten a khua a kil haw ten an ngawlin amthong tuk a, a neihsem a canote ei in, ama sul nangawn ei tuk hi. Mah vang cu kuamah kawm ngawlin ei kuh tuk hi.

⁵⁸ “Pathian i thupiakmi, hi laibu sung a ngatmi hi komno in zui unna, a lamdang le lauhuaimi na, Topa Pathian uh i min cu upat un.

⁵⁹ Na zui uh ahimata nangmuh le na casuan tei humah a dam thei ngawl tohmi le a lauhuai natnak a phunkim hengtik tuk hi.

⁶⁰ Izipt ngam a na tawhsa uhmi natsia hempoh cu na hum uhah hengtikleh tuk a, damleh thei tukma uh ci.

⁶¹ Hi Pathian daan le thutep ngatnak laibu sung a, a tel ngawlmi natsia a phunkim na hum uhah hengtik tuk a, bolal tatak tuk uh ci.

⁶² Van a, aksi zahin, na tam uh vangin Topa na Pathian uh i thu na ngai uh ahimata mi demno bek tang tuk uh ci.

⁶³ Nangmuh a hauhtiknak le a pungzai tiknakah Topa cu a lungdamzet hi, mahti bangin nangmuh pailal tuk le siatsuah tukin a lungdam leleng tuk hi. Na luahtum tuk uhmi ngam pen pholhsuah khawng hi tuk uh ci.

⁶⁴ “Topa in leimawk deng pen langkhatlam leimawk deng tianin khenkhek khawng tuk a, mah laih ngamah nangmuh hihen, na pu le pa uhten hihen, na theih awng ngawl uhmi le na biak awng ngawl uhmi suang le thing a bawlmi milim bia tuk uh ci.

⁶⁵ Ilai mun hei ah lungmuannak mu tukma uh ci, ka khua uh, ka ngam uh tih tuk nei tukma uh ci. Topa in thinsuknak, lungbingnak le thinkhamnak tuah dimtik tuk hi.

⁶⁶ Na nunnak uh cu lauthawngnak bebek tuah dim tuk hi. A sun a zanin hingin, can tawtok tuk uh ci, thih tuk lau in, le thinsu in, um leleng tuk uh ci.

⁶⁷ Iti bang nate na mu uh hei in, na muh uh bek ten na thin uh can tawtok leleng tuk hi. Taklam ten, ‘zinglam hi toh le pha,’ tituk uh ci a, zinglam ten, ‘taklam hi toh le pha,’ ti leleu tuk uh ci.

⁶⁸ Topa in, hawhleh tukma toh uh ci tin, tiam zo naven na zui sa uhmi lampi ah zui in, Izipt ngamah kuatleh tuk hi. Mahlai na ngal tei lakah a sal haw tukin na zuakdun li uh vangin a leitu kuamah um haw tukma tin,” ti hi.