DAAN PIAKLEHNAK 27 - Ngawm Bible

Pathian i Daan Suang Humah

¹ Moses le Israel hotu ten mipi lakah, “Tuni ka piak uhmi daan hempoh cu zui khawng un hi.

² Jordan Ngun kantanin, Topa na Pathian uh i piakmi ngam na hen ni uhin, suangpeek ngengpi phut unna, a kok thei ngawlmi si na noih ceng uhten

³ hi daan le zilhnak hempoh hi ngan un hi. Topa na pu le pa uh i Pathian in, a tepsa bangin ngampha le ngamnopah tumin,

⁴ Jordan Ngun ngal na hen uhten hi suangpeek ngengpi hi tuni ka hilh bangin Ebal Mualhumah phut unna, a kok thei ngawlmi si noih un.

⁵ Thik hiamnam tuah suk ngawlmi suang tuah biaklandawh tiang un hi,

⁶ itahim titale Topa na Pathian uh biaknak tukin na tian uhmi biaklandawh cu thik hiamnam tuah suk ngawlmi suang hi tuk hi. Mah laiah halkang biakpiaknak,

⁷ pawlkom biakpiaknak bawl unna, Topa na Pathian uh mai ah lungdamno in ei ten un hi.

⁸ Si na noih uhmi suang humah, Topa i piakmi daan hempoh cu komno le kimno in ngan un hi,” tin ti haw hi.

⁹ Moses cu Levi thiampi tuah langkhatin mipi lakah, “Maw Israel mite, daidenno in um unna, phazetno in ngai un. Tu pepan Topa na Pathian uh i mihing suak zo uh ci;

¹⁰ mah hangin tuni a, ka piak uhmi daan hempoh hi pom unna, zui un,” tin ti haw hi.

Thu Ngai Ngawlte Tamsiatnak

¹¹ Moses in Israel mipi tei lakah,

¹² “Jordan Ngun na tan nung uhten mipi muicu piak tukin Gerizim Mualhumah a ding tuk hinnam cu a nuailamte haw hi: Simeon hinnam, Levi hinnam, Judah hinnam, Issakhar hinnam, Josef hinnam le Benjamin hinnam hi haw tuk hi.

¹³ Ebal Mualhumah dingin tamsiatnak a piatu tuk minam cu Reuben hinnam, Gad hinnam, Asher hinnam, Zebulun hinnam, Dan hinnam le Naftali hinnam haw hi.

¹⁴ Levi miten hi bangin nging zetin au haw tuk hi:

¹⁵ “Topa in, milim bia cu huazet hi tih thei na pi in, suang tuah ahimata thik tuah milim bawlin, a bia kuhtu cu Pathian i tamsiatnak thuak hen,” a tih ten, mipi in, ‘Amen,’ ti haw tuk hi.

¹⁶ A nu ahimata a pa zahcaknak a bawltu cu Pathian tamsiatnak thuak hen! a tih ten, mipi in, ‘Amen,’ ti haw tuk hi.

¹⁷ ‘A unaupih Israel mi i ngamngi a khinsaktu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.

¹⁸ ‘Mitcaw lam a pialtiktu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

¹⁹ ‘Ngamdangmi, nu le pa nei ngawl ca-ngah le meivong a nuainemtu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²⁰ ‘A pa i zi pa kha khat a sualpihtu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²¹ ‘Ngan a sualpihtu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²² ‘A celnu maw, nu dang hin a celnu maw a sualpihtu cu Pathian tamsiatnak thuak hen! a tih ten, mipi in, ‘Amen,’ ti haw tuk hi.’

²³ ‘A sungnu a sualpihtu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²⁴ ‘Mi a that kuhtu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²⁵ ‘Mawhnak nei ngawlmi that tukin nawhthuhnak sumpai a ei tu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’

²⁶ ‘Pathian i piakmi daan le thukham a zui khawng ngawltu cu Pathian i tamsiatnak thuak hen! a tih ten, mipi in, ‘Amen,’ ti haw tuk hi.’