DAAN PIAKLEHNAK 25 - Ngawm Bible

¹ “Tehkipnakin, Israel mi pa nih cu thu a neih haw hangin thukhennak mun hengin thusontu ten a thu a khen haw ten pa khat cu mawh ti haw tuk a, a dang pa khat cu mawh ma ti haw tuk hi.

² A mawh tu pa cu mipi mai ah vah tukin a son haw tale thukhentu in leihumah boktik tuk a, amah cu vah hi tuk hi. Vei izah vah tuk tih cu iti zahin sual him tih hum pen zo in tek hi tuk hi.

³ Vei sawm li tian vat thei haw hi; mahsang tam saw in, a vat haw tale na unaupih uh mipi tei maiah mualphotik leita tuk uh ci.”

⁴ “Khuicang cu cang a cil laihin, a muk ken pahsuh un.”

Unau Thih Ten Dehvo

⁵ “Unau pa nih munkhatah umin pa khat deuh cu capa pa khat hei nei ngawlin a thi tale, a zi cu a pasal unau pih sial ngawl pualeu mi pasalin nei tukma hi, a pasal i unau pa in huai tuk hi.

⁶ Capa a nei tale, a thi tu a pasal i capa in sial hi tuk hi a, a hinnam sungah nuntik pepel hi tuk hi.

⁷ Mahnaven a unau pa in, a huai nuamma ahi tale numei nu cu khuasung upa lakah hawhpihin, ‘Ngaihsut pih tek un: ka pasal i unau pa in, a dehvo la nuam ma hi: Israel mi lak pen a unau i min cu nuntik tum ma hi,’ tituk hi.

⁸ khuasung upa ten mahpa cu sam haw tuk a, hilh haw tuk hi. A huai nuam leleng ahimata,

⁹ a unau pa i zi in khuasung upa tei maiah a pasal i unau pa i kedam pa khat cu laksak tuk a, ‘A unau ca in ca a neihsak nuam ngawltu cu hi bangin bawl tuk hi,’ a tih nungten a maiah cilsiak tuk hi.

¹⁰ Israel mi lak pen a innkua cu, ‘kedam lon mipa i innkua,’ tin sam hi tuk hi.”

Daan Dangte

¹¹ “Pano pa nih sualdunin, pa khat saw cu a zi in panin, a dang pa i til mu pen a dok ahi tale,

¹² a khut cu talh tuk hi: hehpih tuk kha ma hi.”

^13-14 Na dip sung uhah cuai suang a ngitmi le a zangmi nei pahsuh un: na an tehnak uh vawh vang a ngeng le a nau tin ho kawm pahsuh un.

¹⁵ Topa na Pathian uh i a piak tukmi ngam sungah ngeipi damin, na um theihnak tukin, a man mi cuai suang nei unna, a dikmi an vawh nei un.

¹⁶ Mahti bangin mi zoltu cu Topa in huazet hi.

Amalek Mite That Tuk Thupiaknak

¹⁷ “Izipt ngam pen na tul uhten Amalek miten na hum uhah a bawl haw mi khi ngaisung hem un.

¹⁸ Pathian kihcaknak a neih haw ngawl hangin cawlin, na colh nop laihtak uhin, na nunglam uh pen hilin, mi a pha zo ngawlte that khawng haw hi.

¹⁹ Mah hangin Topa na Pathian uh i, a piakmi ngam hengin, ngaldo tuk na neihleh ngawl toh uhten Amalek mite cu that khawng un hi. A hinnam min hei in, khua le ngam hempoh ah um tuk ngawltohin, cimit khawng un hi. Hihi cu phawkngil hihim pahsuh un.”