DAAN PIAKLEHNAK 21 - Ngawm Bible

Mi Thattu Na Theih Uh Ngawl Ten

¹ Topa na Pathian uh i a piak tukmi ngam sungah mi pa kha khat hampa lakah thatin, a thattu na thei uh ngawl ahi tale

² na hotu uh le na thukhentu cu mah miluang umnakah hawhpihin, a elkim a um khuate izah khawla him tih teh pepel haw hen hi.

³ miluang umnak pen a naibel khua a, khuasung upa ten na a dehtik haw laih ngawlmi khuila pa khat keng haw hen hi.

⁴ Mah khuila cu a kang awng ngawlmi lui ah hawhpihin, tuimawk leileh awng ngawlmi le anci cin awng ngawlnak munah a ngawng cu ektuah haw tuk hi.

⁵ Levi hinnam thiampi hung haw tuk hi; itahim titale hauhdunnakah hei hihen, lukeh, bengbul thu ah hei hihen a muhte cu thukhentu hi haw tuk hi. Topa na Pathian uhin ama nadek tukin le ama minin muicu piatu tukin a tenmi hi haw hi.

⁶ miluang umnak pen a naibel khua a, khuasung upa tei thahmi khui humah a khut haw som haw tuk a,

⁷ ‘Hih mipa thattu cu kohte kha ma ung; a thattu akua him tihvang thei ma ung.

⁸ Mah hangin Maw, Topa; Izipt ngam pen na patsuahmi Israel na mihingte cu ngaidam zalin hi, Mawh nei ngawl i thisan cu ka hum uhah hengtik zal ngawlin ngaidam zalin,’ ti haw tuk hi.

⁹ Topa i mai ah thudik na bawlnak uh hangin mawh nei ngawl pa i thisan hangin thuak tuk cu luat haw tuk hi.

Ngalmatmi Numei

¹⁰ “Topa na Pathian uhin, na ngal tei humah nehnak a piak ten na mat uhmi tampi um tuk hi.

¹¹ Nangmu lak pen pa kha khatin, na mat uhmi lak pen numei melpha pa khat mu in, a huai nuam tale,

¹² a innah hawhpih henna, mah numei nu cu a sammetin, a tintalh henna,

¹³ A puansilhte thek khawng hen hi. Na thah uhmi a nu le pa ngai in, ha khat sung a innah um tuk hi. Mah nung bek ten huai tuk a, a zi hi tuk a; amah vang a pasal hi tuk hi.

¹⁴ Mahnung ten zi tukin a deih lehma toh ahi tale a thu um ngawlin hawhtik hen. A zazalin huaimi a hih hangin sal bangin bawlsia ngawlin a zuak vang zuak tukma hi.”

Capa Tawntil i Lo le Lam

¹⁵ “Tehkipnakin, mipa pa khatin, zi pa nih nei in, a zi pa nihin capa cawi veve haw; mahnaven a deih deuh ngawl saw mi a zi i cawimi capa cu upa deuh hi.

¹⁶ Mahti bang ahi tale, a ca tei lakah lo le lam a sep ten deih cuangmi nei pahsuh hen, capa upabel i co tukmi lo le lam cu capa tawntil ahi ngawlmi a deih saw deuhmi a zi i ca lakah pia pahsuh hen.

¹⁷ A deih saw deuhmi a zi i ca ahi ngawl vangin a capa tawntil cu midang i co mi let nihin, a lo le lam sung pen pia tuk hi. Itahim titale a cihah masabel capa a hih hangin capa tawntil i covo cu amata hi.”

Thuhilh Ngai Ngawl Capa

¹⁸ “Mi pa khatin, capa thinlian, mi zeltel, thu hilh theih ngawl le nu le pa i thu hilh hei ngai ngawl capa a nei kha tale,

¹⁹ a nu le pa in khuasung upa lakah hawhpihin, a thu cu son haw tuk hi.

²⁰ A nu le pa in khuasung upa lakah, ‘Hi ka capa uh hi mi thinlian, zeltel, thuhilh theih ngawl hi bang mihing hi, ka thu uh ngai nuam hihim ma hi; zukham lelengin ka neihmi hempoh theh zau khawng zo,’ ti haw tuk hi.

²¹ Khuasung miten mahpa cu suang tuah sep hum haw tuk a, mahtibang daan pha ngawl cu pai tuk hi. Israel miten thei khawngin ngalling haw tuk hi.”

Daan Dadang

²² “Ama sual hangin mi pa khat cu thatin, a luang cu thinghumah a khai haw tale,

²³ mahlaiah zan tianin umtik tuk kha ma hi. Mah sunin vui tuk uh ci, itahim titale thinghum a miluang khai cu Pathian tamsiat tawkmi hi. Topa na Pathian uh i a piak tukmi ngam na nawngkaitik ngawlnak tukin miluang cu vui un hi.