DAAN PIAKLEHNAK 20 - Ngawm Bible

Ngaldo Ten Zui Tuk Daan

¹ “Ngaldo tukin na hawh uhten na ngal uhte cu mipumin hihen, cipuh le cipuh lengin hihen, nangmuh sangin tam saw deuh ngangai haw tih na muh uhten lau pahsuh un. Topa na Pathian uh, Izipt ngam pen a pansuaktu cu nangmu lakah um tuk hi.

² Na dodun uh laih ngawlin thiampi cu na ngalkap tei maiah tul tukin amah in,

³ ‘Israel mite aw, ngai un! Tuni in, na ngal uhte do tuk uh ci. Na ngal uhte atam haw hei in, lau pahsuh un, lau hemhumin um pahsuh un.

⁴ Topa na Pathian uh cu na lak uhah um tuk a, nehnak pia tuk hi’ tin au tuk hi.

⁵ Ngalbawi ten a ngalkap tei lakah, ‘Nangmu lak pen innthak sa in, a hut laihngawl um uh cim? Na um uh ahi tale na inn uhah kik un. Na thi kha uh tale midang ten na inn uh cu hut haw tuk hi.

⁶ Na lak uhah sabit huan thak bawlin sabit ngah a thawi laihngawl um uh cim? Na um uh ahi tale na inn uhah kik un hi. Na thi sual uh tale midang ten na sabit huan cu co haw tuk hi.

⁷ Na lak uhah zi huai tukin khanglai a hamtu um uh cim? Na um uh ahi tale na inn uhah kik un hi. Na thi sual uh tale na ham uhmi khanglai cu midang ten huai haw tuk, tin ti haw tuk hi.’

⁸ “Ngalbawi ten a ngalkap tei lakah, ‘nangmu sung pen thinnau mi le lauthawngin, a ummi um uh cim? Na um uh ahi tale na inn uhah kik un. Mah ahimata na ngualcam dangte tha nautik kha tuk uh ci,’ ti haw tuk hi.

⁹ Ngalbawi ten ngalkap tei lakah thuhilhnak a celh haw ten ahon, honin ngalkap puitu tukin hotu ten hilh haw tuk hi.

¹⁰ “Khua pa khat na do uhten amasabelin lemnak tuk thu ngaisung un.

¹¹ A kongka haw hongin, lemnak deih ung, a ti haw tale, a venghawng haw in, na sal uhin man khawng unna, na nadektik un.

¹² Mahnaven khuasung miten lemnak bawl nuam ngawlin dodun nuam saw haw, ahi tale mah khua cu umcip khawng un.

¹³ Topa in nehnak a piak ten khuasung mi pano hempoh pa khat hei khawih ngawlin that khawng un.

¹⁴ Nangmu ca in numei, naupang, ngamsa le thildang hempoh cu la thei uh ci. Na ngal tei na hempoh cu na deih babang uhin mang un. Topa in nohtei nelah a piakmi hi.

¹⁵ Na umnak tuk uh ngamsung hi ngawlin, ngam khawlapi in, a ummi khuapi hei hitih bang lengin bawlbok un.

¹⁶ “Mahnaven Topa na Pathian uhin, a piak tukmi ngamsung khuapi na lak uhten khua sungmi venghawngin, that khawng un. Haihawh a nei pa khat mah khawih kha pahsuh un.

¹⁷ Topa i thupiaknak bangin Hit mi, Amor mi, Kanaan mi, Periz mi, Hiv mi le Jebus mite cu a cimittik un.

¹⁸ Mahtibang na bawl uh ma tale, a pathian a biak haw ten a thil tihdan ningdelhhuai bawlbok tukin zilh haw tuk a, Topa na Pathian uh i humah sual kha tuk uh ci.”

¹⁹ “Khuapi lak tumin hun ngeipi sung na umcip uh hei in, a ngah theimi thingkung cu phuk kha pahsuh un. A ngahte cu ei unna, a kungte cu siatsuah kha pahsuh un; na ngal uh hi kha haw ma hi.

²⁰ Thingkung dang ngah nei ngawlte na deih uh tale phuk poh unna, mah khuapi na lak laklawh umin, na panmun khualnak vangin na mangta un.”