DAAN PIAKLEHNAK 19 - Ngawm Bible

Buknak Khuapite

¹ Topa na Pathian uh i a piak tukmi ngam a, a um miphun Topa in, a siatsuah khawng nung, a khuapi haw la khawngin mah ngam a, na um uhten,

² mah khuapi tei lak pen khuapi pa thum cu ngelhnakin bawl un.

³ Topa i a piak tukmi ngam cu khen thumin khen unna, mithattu buknak tukin le a himnak tukin khenkhatah buknak khuapi pa khat ten um tuk hi.

⁴ Mi pa khatin, a ngal hi ngawlmi pa khat, bawlhipnak um ngawlin a that kha tale hi khuapi pa kha khatah tai tuk a, himnak ngah tuk hi.

⁵ Tehkipnakin, mi pa nih cu thingphuk tukin tupi sungah hawh haw hi; thing a phuh haw laihin, pa khat pa i heipi cang cu hongin, a ngualcam pa sep ngahin, a thi tale, mah a khialtu pa cu tai tuk a, hi khua pa kha khatah bu in, him tuk hi.

⁶ Khuapi pa thum hi ngawlin pa khat bek a um tale, mi thattu khenkhat tei ca in khawla leita tuk a, phulak a nuam pa in pha in, a thin a sat laihtakin mah a mawh ngawlpa cu that tuk hi. Thungai titale, a ngal ahi ngawlmi pa cu tih himnak um ngawlin that kha sual hi.

⁷ Hi bang cu hangin buknak khuapi pa thum koih tukin thu ka piaknak hi.

⁸ Topa na Pathian uhin, na pi le pu tei lak a, thu a tep bangin na ngam uh cu zal pepeltikin, ngam a venghawngin, na luah uhten,

⁹ khuapi dang pa thum teng leleu un hi. Ka thupiakmi bangin ihempoh bawlin, Topa na Pathian uh cu it in, a thuzilhmi bangin na nung uh ahi tale hi ngam cu pia khawng tuk hi.

¹⁰ Mah hangin ka hilh bangin bawl unna, Topa i a piak tukmi ngam sungah a sual ngawlmi i thisan luang ngawlin, na hum uhah a heng tukmi bawlsiatnak pen suakca tuk uh ci.

¹¹ “Tehkipnakin, mi pa nihte cu ngaldunin, pa khatin, a ngal cu that himin, hi khuapi pa kha khatah a tai tibang ahin,

¹² mahti bangin thil a um tale ama khua a hotu ten mahpa cu phula nuam pa i lakah ap haw tuk a, mahpa in that tuk hi.

¹³ Laithat tei humah hehpihnak nei pahsuh un hi. Israel ngamsung pen laithat cu bo khawng tahen; mahten na lam uh tuang tuk hi.”

¹⁴ “Topa na Pathian uhin, a piak tukmi ngam sungah tanglaih cawngin, a phut sa haw mi suang phut, na innnel pa i ngamngi suangphut cu khinsak pahsun hi.

Theihpihtu Ca In Daan

¹⁵ “Mi pa khat sualnot theihnak tukin, theihpihtu pa khat bek tawk ma hi; a dembel pa nih a um haw kul hi.

¹⁶ Mi pa khatin adang pa khat cu siatsuah nuamin sual a not him ten,

¹⁷ a pa nih haw in, Pathian biaknak munah thiampi le mah laih a, nadek thukhentu tei maiah ding haw tuk a, a thu haw cu son sak hi tuk hi.

¹⁸ Thukhentu ten a thu haw cu komzetno in le cangkimno in dong cangcian haw tuk hi; a dik ngawlin sual notmi hi tih, a thei ciang haw tale,

¹⁹ sual a nawntupa in, a lungkim zahin thuak tuk hi. Sualnot himnak daan pha ngawl cu paitik tuk uh ci.

²⁰ Mi hempohin mah thu cu a zak haw ten ngallinnakin mang haw tuk a, mahtibang daan pha ngawl cu kuamah in bawl haw tukma toh hi.

²¹ Kuamah hehpih pahsuh un; nunnak ai-in nunnak, mit ai-in mit, ha ai-in ha, khut ai-in khut, ke ai-in ke hi bok tuk hi.”