DAAN PIAKLEHNAK 16 - Ngawm Bible

Kaltan Puai

¹ “Topa na Pathian uh pahcoihnak tukin Kaltan Puai cu Abib haa in bawl un hi; itahim titale mah haa sung a zan khat cu Izipt ngam pen nohte cu suahtul hi.

² Pathian biaknak munah hawh unna, na tuu uh ahimata na khui uh pa kha khat Topa na Pathian uh sunloihnakin le Kaltan Puai an kawmnak tukin ngo un.

³ Na an kawm uhmi na eih uhten naman cawhhelmi cangho ei pahsuh un. Izipt ngam pen manlang zetin tul na hih uh bangin, ni salih sung naman hel ngawl cangho ei tuk hi uh ci. Na haksatnak uh a thei lehtiktu tukin hi cangho ei unna, na nunsung hempoh uhah Izipt ngam pen na suahtul ni uh cu phawkngil pahsuh un hi.

⁴ Na ngamsung uhah kuamah in, a inn sungah naman cu ni salih sung koih pahsuh hen. Na puai bawl ni uh masabel taklamin ngahmi sa cu a zing tian koih ngawlin ei khawng un hi.

⁵ “Kaltan Puai bawlnak sa cu Topa na Pathian uh i a piakmi khuasung mun dang pen ngo pahsuh un.

⁶ Mun pa khat, Pathian na biaknak mun uh pen ngo unna, Izipt ngam pen na tul hun uh nitum bek le ngo un hi.

⁷ Tui tuah huan unna, biaknak mun pen ei un; a zingten nangmu inn tenah pin un hi.

⁸ Ni luk sung naman hel ngawl cangho ei unna, a ni salihnakin Topa na Pathian uh bia tukin khawmdun unna, mah ni-in imah dek pahsuh un.

An Lak Puai

⁹ “Ankungcop na pat uh ni pen sial unna, nipi salih a kim ten,

¹⁰ ancop puai cu bawl un hi. Topa na Pathian uh thangphatnakin hi puai cu bawl unna, ama muicu a piakmi sung pen na phalzah ten uhin thin thiangzetno in, a lakah pia un hi.

¹¹ Topa i mai ah na canau uhte, na umlawh uhte, na khuasung uh a, um Levi mite le ngamdang mite, nu le pa nei ngawl ca-ngah le meivong tuah lungdamno in um langkhat un hi. Topa na biaknak uh munah lungdamno in um un.

¹² Izipt ngam salin, na tan uh laih khi ngaisung unna, hi thupiakmite cu komno in zui un hi.

Puanbuk Puai

¹³ “Na an uhte na cil ceng nung uhten le na sabit uh na ngawi ceng nung uhten Puanbuk Puai cu ni salih sung bawl un hi.

¹⁴ Na khuasung uh a, um na canau uhte, na umlawhte, Levi mi, ngamdangmi, nu le pa nei ngawl ca-ngah le meivong tuah lungdam zetin bawl un hi.

¹⁵ Pathian na biaknak munah hi puai cu ni salih sung bawlin, Topa na Pathian uh cu thangphat un. Topa in, na lo an uhte le na nadehnak uhah muicu a piak hangin na lung uh dam un hi.

¹⁶ “Na hin venghawng sung uh a, pano hempoh cu Topa biaknak munah kum khatah vei thum hung un hi. Kaltan Puai, An Laak Puai, le Puanbuk Puai ah hung un. A kuakua hei in laksawng keng tek unna,

¹⁷ Topa i muicu a piak zah hum tawnin, na piak theihzah uh tuah Topa na Pathian uh lakah laksawng keng tek un hi.

Dikcangno In Thukhennak

¹⁸ “Topa na Pathian uh i a piak tukmi khuapi sungah na hinnam uh tekin thukhentu le a dang upa teng tek un. Hi thukhentu ten mipi tei thu cu nuainep peng nei ngawlin khen haw tuk hi.

¹⁹ A dik ngawlpi le patbul nei in, thukhen haw pahsuh henna, nawhthuh vang la haw pahsuh hen, itahim titale nawhthuhin micip le thuman tei mitcawtikin, a thukhen haw mi cu sualtik mek hi.

²⁰ Thudik bebek zei un hi, dikcangno in nung unna, Topa na Pathian uh i a piak tukmi ngam cu luahin, hun ngeipi nung tuk uh ci.”

²¹ “Topa na Pathian uh biakpiaknak tukin biaklandawh na bawl uhten, a elkimah iti bang thing hei biak tukin phut kha hihim pahsuh un hi.

²² iti bang suang hei biak tukin phut kha hihim pahsuh un hi, mah mite cu Topa i huatbelmi haw hi.”