DAAN PIAKLEHNAK 14 - Ngawm Bible

Khammi Mithi Ngaihdan

¹ “Nohte cu Topa na Pathian uh i mihing hi uh ci. Mah hangin mithi na ngaih uhten na taksa uh at pahsuh un, na sam malam vang met khawng pahsuh un.

² Leihumah a ummi hinnam hempoh sung pen ama mihing hi tukin a tenmi na hih uh hangin nohte cu Topa na Pathian uh i hinnam hi uh ci.”

Nganhing Thiang le Thiang Ngawl

³ “Topa in, a thiang ngawl a tihmi cu ei pahsuh un hi.

⁴ Na eih tuk uhmi ngamsa cu khui, tuu, keel,

⁵ Sakhi, Saleel, Sathak le Sazuk,

⁶ a tinkakmi le an hemsa thaileh hi tuk hi.

⁷ Mahnaven iti bang ngamsa hei hihen a tinkak ngawlmi le an hemsa a thaileh ngawlmi cu ei pahsuh un hi. Kalauk, Sabek le meican cu ei pahsuh un. Ngamsa thiangtho ngawl hi, an hemsa thai lehin, a tinkak ma hi.

⁸ Vokcik cu ei pahsuh un, a thiang ngawlmi hi. A ketin kak naven an hemsa thaileh ma hi. Hi ngamsa cu ei pahsuh un hi, a luang haw hei zen pahsuh un hi.”

⁹ “Ha le lip nei ngamsa cu ei unna,

¹⁰ tuisung a um ha le lip a nei ngawlmi cu ei pahsuh un hi, a thiang ngawlmi hi.”

¹¹ “A thiangmi vano cu ei un hi.

^12-18 Mahnaven a nuailam a vano: muvanlai, simbu, muthi, mupi, muhaang, musia, va-ak, sam ak, baihaang, cikdawt, nga man, vaca, lih ak, cempu le baak cu ei pahsuh un hi.”

¹⁹ “Ha a neimi lungsivai cu a thiang ngawlmi hi; ei pahsuh un.

²⁰ Adang lungsivai a thiangmi cu ei thei uh ci.”

²¹ “A thi cawmmi ngamsa hempoh cu ei pahsuh un. Nangmu lak a um ngamdang ten ei haw hen, ahimata ngamdangmi tei lakah zuak thei tuk uh ci. Mahnaven nohte cu Topa na Pathian uh i mihing na hih uh hangin hinnam thiangte hi uh ci. Tuuno ahimata keelno cu ama nui nawitui tuah huan pahsuh un hi.

Seh Sawm Seh Khat Piaknak Daan

²² “Kumsialin, na lo uh le na huan uh pen a suakmi an lak pen seh sawm seh khat cu a dangno in koih un hi.

²³ Topa na Pathian uh biaknak munah hawh unna, na piak uhmi an, sabit, olif situi le na khui le tuu tei catawntil cu Topa i maicang pen ei un hi. Mahti bangin a kumkhua in, Topa na Pathian uh kihca thiam un hi.

²⁴ Topa i muicu piakmi tuah na neih uhmi an le a dadang na piak uhmi cu biaknak munah hawhpih tukin a khawla leita tale, hi bangin bawl un hi.

²⁵ Na piak uhmite cu zuak unna, na ngah uhmi sumpai tuah biaknak munah hawh un.

²⁶ Mah munah na deih uhmi, khuicik maw tuu cik maw, sabittui maw, cangzu maw cu lei unna, Topa na Pathian uh i maicang pen lungdam zetin, na innkua hawng uhin ei un hi.

²⁷ “Levi mite cu covo a neih haw ngawl hangin zamthong pahsuh un.”

²⁸ “Kum thumnak a kim sial ten seh sawm seh khat na piak uhmi an tuah hunpih unna, na khuasungah khawl un hi.

²⁹ Topa na Pathian uhin, na bawl uhmi hempoh muicu a piak theihnak tukin, hi an cu na khuasung uh a um covo a nei ngawl Levi mite le ngamdang mite, nu le pa nei ngawl ca-ngah le meivong teita tuk hi. A kulzah tenin suah haw hen hi.”