DAAN PIAKLEHNAK 13 - Ngawm Bible

¹ Profet ahimata mang let thiamtu pa khat nangmu lakah suaktulin, milim hei hihen, nalamdang hei hihen lak hi.

² Mahnaven na biak awng ngawl uhmi pathian dang cu bia in le a nadek tuk hung tin, na ngengpi le thasiahhuai lakin, mah a lakmi bangin ahi ngangai hei in,

³ imah simsial kha pahsuh un. Topa cu na lungmu uh venghawngin it uh cim maw, it ma uh cim tin nangmuhte khingkhainak tukin Topa na Pathian uhin amah cu mang hi.

⁴ Topa cu zui unna, kihca un. Ama thu cu ngai unna, a thupiakmite zui un. Amah cu bia unna, a muantakmi hi un. A nadek unna, amah cu kho zetin pom un.

⁵ Mahnaven sal na tannak uh Izipt ngam pen nohte a puitultu Topa langpang tukin a sosuahtu profet ahimata mang let thiamtu cu that un. Amah cu mipha ngawl hi, Topa i a deihsakmi nunnak lampi pen pui sual tukin a tup hangin amah cu thah tuk hi. Hi na pha ngawl cu botik tuk uh ci.

⁶ Na unau, na capa, na canu, na ihmi na zi, ahimata na ngualcam phabel cu nangmuh le na pi le pu tei na biak awng uh ngawlmi pathian dang bia tukin a sosuah kuhtu hi thei hi.

⁷ Na elno uh a, um hinnam tei pathian dang bia tukin a sosuahtu pa kha khat na hi thei hi.

⁸ Mahnaven na zui pahsuh un; a otmi vang ngai nuam pahsuh un. Amah cu hehpih hihim pahsuh un.

⁹ That un hi! Suang tuah a sep masabel tu hi un; midang vangin sep ten haw hen.

¹⁰ Suang tuah sep hum hihim un hi! Sal na tannak uh pen a puitultu Topa na Pathian tuah khawla tukin nangmuh pui tum hi.

¹¹ Israel mi in thei haw tuk a, lau haw tuk hi, tunung ten mahtibang thilpha ngawl cu kuamah in bawl haw tukma toh hi.

¹² “Topa na Pathian uh i piakmi khuapi sungah na um uhten,

¹³ na biak awng uh ngawlmi pathian dang bia tukin, na hinnam sung uh a, ummi awklawl khenkhat ten khua sung mite a puisualnak thu na theih uhten,

¹⁴ komno in dongkan un. Nohtei lakah mahtibang thilpha ngawl a um ngangai ahi tale,

¹⁵ mah khuasung a, ummi hempoh cu a ngan tuah nam tuah sat hum khawng unna, mah khua cu siatsuah khawng un.

¹⁶ Khua sungmi tei neihmi na hempoh cu khuasung khopnak munah khawm khawng un hi. Topa na Pathian uh lakah na bawl uhmi biakpiaknak tukin mah khua le a sung a, ummi hempoh cu haal khawng un hi. Mah khua cu kumkhua sialalta in tundinleh hi tukma toh hi.

¹⁷ Siatsuah khawng tuk tihmi sung pen nangmuta tukin imah la pahsuh un, mahnung ten Topa i thinuknak cu lawmcangin, nohte cu hehpih tuk hi. Tuni ka thutiammi na zui uh tale,

¹⁸ na hum uhah hehpihnak nei in, na pu le pa tei lak a, thutepmi bangin pungzai tuk uh ci.”