AMOS 6 - Ngawm Bible

Israel Siatsuahnak

¹ Zion ah nop zetin, a ummi le Samaria ah ngimta zetin, a ummi, miphun ngilzet, Israel miphun mihing nasezette, mi tampi ten bopnak deihin, a zuan lih haw mi mihingte, na ca uhin, lauhuai leita!

² Hawh unna, Kalneh khua khi zota un. A ngeng zetmi Hamath khua le Filistin ngam a Gath khua zoleh un! Hite hi Judah ngam le Israel ngam sangin pha saw deuh haw maw? A ngam haw cu na ngam uh sangin ngeng saw cuang a maw?

³ Siatnak ni heng tuk tih hi thei nuam ngawlin, na thil bawl uhmi in, mah ni cu nai sesemtik hi.

⁴ Zaunak phazet humah a zau tu le khunnak nopzet humah a zau hiahhuahtu, khuino cik le tuuno cik tai zetin, a eitu noh tei ca in lauhuai leita thong!

⁵ David bangin la phuah le tingtang tum cu nuamzet uh ci.

⁶ Sabittui cu hai ngengpi tuah viakin, namtui phabel noihdun uh ci; mahnaven Israel a siat ten dawmno hei na thasia ma uh ci.

⁷ Mah hangin sal a hawh masabeltu cu nangmuh hi tuk uh ci. Na an eih puai uh le na nopnak puai uhte bo tuk hi.

⁸ Cungnungbel Topa Ihempoh tithei Pathian in, ngallinnak tuk thupia zo hi: “Israel i pualthaunak cu ka huat zawngzet hi. A khuapibel le a sung ummi na hempoh cu ngal tei khut sungah pia khawng tung,” ti hi.

⁹ Innkua pa khat sungah mihing sawm khat a zam hawta, a sawm khatin thi haw tuk hi.

¹⁰ Mithi pa i unau pa in, mithi pa i luang cu innsung pen pua lamah la tuk hi. A unau pa in innsung a, a ummi pa kha khat nelah. “Akua bek umlaih uh cim maw?” Tin sam tuk hi. “Aw pa khatin, umma tituk hi.” A unau pa in, mengdenin umin! Topa min sal hihim tuk ngawlin cingcai un tituk hi.

¹¹ Topa in thu a piak ten inn ngeng hihen, inn neu hihen, siatsuah khawng tuk hi.

¹² Suangpeekpi humah cipuh tai haw maw? Mihingin tuipi thuanthum humah khuicang tuah leilet haw maw? Mahnaven nohten diknak cu thihsi ah cangtik uh ci.

¹³ Lodebar khua la thei hung tin, pahcawidun uh ci. “Karnaim la tukin ngilzet ung ti uh ci.”

¹⁴ Ihempoh tithei Topa Pathian amah loli in, hi bangin ti hi: “Israel miphunte, na ngam uh luahtu tukin ngamdang ngalkapte hah tung. Mah ngalkap ten saklam Hamath mual kawn pen hanglam Arabah munlawn tiang namsuk haw tuk,” ti hi.