AMOS 2 - Ngawm Bible

Moab

¹ Topa in, “Moab mite a sual lelem haw hangin dantat loli tung hi. Edom kumpipa i nguh cu upat ngawlin mei ah halin, vut cangtik haw hi.

² Mah hangin Moab ngam humah mei alh khesuk tung a, Kerioth inn phazette kang khawng tuk hi. Moab mite cu ngal dodun laihtak, ngalkapte a au haw laihtak le pengkul a tum laihtak haw in thi ti haw tuk hi.

³ Moab ngamuktu le a ngamsung lamhuaitu hempoh vang that khawng tung,” ti hi.

Judah

⁴ Topa in, “Judah mite a sual lelem haw hangin dantat loli tung hi. Ka thu zilhmi nautatin, ka thukhamte zui haw ma hi. A pu le pa tei biak ngawlmi pathian dang ten lampialtik haw hi.

⁵ Mah hangin Judah humah mei alh khesuk tung a, Jerusalem a inn phazette kang khawng tuk,” ti hi.

Pathian In Israel Humah Thukhen

⁶ Topa in, “Israel mite a sual lelem haw hangin dantat loli tung hi. Midik ahi haw hei in leiba a lulh thei ngawlte, kedam dap khat man a pia thei ngawlte cu salin zuak haw hi.

⁷ Bawmtu nei ngawl mi nawmtamte cu cilpekin, mi zawngte cu lampi pen nawm vawkin zam haw hi. Pa le a capa in, a salnu pa khat sualpihin, ka min thiangtho cu nawngkaitik haw hi.

⁸ Biaknak hempoh ah mi ca-ngah tei lak pen leiba i in, a lak haw mi puante phahin zau haw hi. Sumba tei lak pen a lak haw mi zu cu Pathian biakinn sung pen haw hi.”

⁹ “Mahnaven, “Ka miphunte aw, nangmuh ca tukin sidar thing bang a sangmi le sasua thing bang a cangmi Amor mite cu siatsuah khawng ing.

¹⁰ Izipt ngam pen puitul lehin, phillawn lakah kum sawm li sung khol ing. Amor mitei ngam cu nangmuta tukin pia ing.

¹¹ Na capa uh khenkhatte profet tuk tengin, a khenkhatte cu Nazir mi tukin teng ing. Mah kha ma hi, tin tithei tuk uh cim, Israel mite aw? Topa keimah in hilh zo ing.

¹² Mahnaven Nazir mite cu zu khamtik uh ci a, profet tei tangau tuk kham uh ci.

¹³ Mah hangin atu-in lei ah nemcih tung a, van ngitzet a puatu tuk khuileng nging bangin tau tuk uh ci.

¹⁴ Tai cakzette vang suakca thei haw tukma; mi ngilte a zaangtha haw kiam tuk a, ngalkapte hei amu nunnak nangawn humdun cop thei haw tukma hi.

¹⁵ Cei le thalcang a mangtute hei in nang zo haw tukma hi; tai cakbel pa vang suakca tukma, cipuh hum khung ngalkapte vang suakca cuang haw tukma hi.

¹⁶ Mah ni ten ngalhangbel ngalkap pa hei in, a hiamnam vawkin, tai tuk hi tin Topa in hilh zo hi.