AMOS 1 - Ngawm Bible

¹ Hithu cu Tekoa khua tuucing pa Amos i hilhmi hi. Hi thu in, hiinhing laihngawl kum nih, Judah kumpi Uzziah, Israel kumpi Joash i capa Jeroboam a deh laihin Pathian in Israel tei thu Amos lakah a theihtikmi hi.

² Amos in, “Topa cu Zion Mual pen au sukin, A aw cu Jerusalem pen vanthum bangin nging hi. Tuu tei tatnak hampa ko zo. Karmel mualhum a, hampate ko khawng zo,” ti hi.

³ Topa in, “Damaskas khua mite a sual lelem haw hangin dantat tung hi. Gilead mite hehpih ngawlin siatsuah haw hi.

⁴ Mah hangin Hazael kumpi in inn humah mei alh hahin, kumpi Benhadad i ngal pannakte kang khawng tuk hi.

⁵ Damaskas khua kongkhahte vat ek khawngin, Betheden uktu le Aven munlawn a, umtute vang hawlvawk khawng tung. Siria ngam mite cu Kir ngamah salin, kai khawng haw tuk,” ti hi.

Filistin

⁶ Topa in, Gaza mite cu a sual lelem haw hangin dantat loli tung. A miphun pumpi in, Edom ngamah sal tukin zuak khawng haw hi.

⁷ Mah hangin Gaza i khua kulhtian humah mei khesuk tung a, a inn phazette kang khawng tuk hi.

⁸ Ashdod le Ashkelon khua uktute cu lawl khawng tung. Ekron khua cu dantat tung a, tanglaih Filistin mite cu thi khawng haw tuk hi.”

Taiar

⁹ Topa in, “Taiar khua mite cu atu le tu a sual haw hangin bawlsia loli tung hi. Miphun phun khat salin Edom ngamah pui khawng haw hi. Pawlkomnak thutiam a bawl haw mi cu zui haw ma hi.

¹⁰ Mah hangin Taiar khua i khua upnak pang tian humah mei alh khe tung a, a inn phazette tuah kang khawng haw tuk,” tin ti hi.

Edom

¹¹ Topa in, “Edom mite cu a sual lelem haw hangin bawlsia loli tung hi. A unau Israel mite hehpih ngawlin nam tuah hawlvawk haw hi. A thinuknak haw cu tawp ni nei ngawlin le ituk mah ten phaleh thei haw tukma hi.

¹² Mah hangin Temah khua humah mei alh khesuk tung a, Bozrah inn phate kang khawng tuk hi.”

Ammon

¹³ Topa in, “Ammon mite a sual lelem haw hangin bawlsia loli tung hi. Mi ngam tawtin, ngal a do haw ten Gilead pen naupai numeite cu namin atkeh haw hi.

¹⁴ Mah hangin Rabbah khua kulhtian humah mei alh khesuk tung a, inn phate kang khawng tuk hi. Ngal a do ni haw ten aunak tamin, a dodunnak haw cu huih siapi bangin theu tuk hi.

¹⁵ A kumpipa le a khutnuai bawite cu salin kai haw tuk hi.”